فوتو: ru.freepik.com
تالقىلاۋ بارىسىندا Ecojer قاۋىمداستىعىنىڭ باس ديرەكتورى رۇستەم قابجانوۆ ەندى قالدىقتاردى وڭدەۋدىڭ بارلىق ۇدەرىسى اشىق جۇرگىزىلەتىنىن ايتتى. وسى باعىتتا بىرىڭعاي تسيفرلىق ەسەپ جۇيەسى ەنگىزىلەدى.
كومپانيالار قالدىقتىڭ تۇزىلۋىنەن باستاپ قايتا وڭدەۋگە دەيىنگى ءار كەزەڭ ەسەبىن بەرۋگە مىندەتتەلەدى.
بۇدان بولەك, قايتا وڭدەۋ ينفراقۇرىلىمىن دامىتۋ پوليگوندارعا تۇسەتىن جۇكتەمەنى ايتارلىقتاي ازايتىپ, اينالمالى ەكونوميكاعا كوشۋدى قامتاماسىز ەتەدى. قايتالاما ماتەريالدارعا ستاندارتتاردى ەنگىزۋ جانە سۇرىپتاۋ نىساندارىن كەڭەيتۋ, وڭىرلەردەگى بيزنەس ءۇشىن ءتيىمدى بولىپ, تۇراقتى قايتا وڭدەۋ نارىعىن قالىپتاستىرۋعا مۇمكىندىك بەرەدى.
رۇستەم قابجانوۆ جاڭا ەرەجەلەردى بەكىتۋ ءۇشىن جەكە سالالىق زاڭ قابىلداۋ مەن تاريفتىك تەتىكتەردى جاڭارتۋ جوسپارلانعانىن اتاپ ءوتتى.
«تۇجىرىمدامانى جۇزەگە اسىرۋ قالدىقتاردى كومۋ كولەمىن ەداۋىر قىسقارتۋعا, قايتا وڭدەۋ ۇلەسىن ۇلعايتۋعا جانە ەكونوميكاعا قايتالاما رەسۋرستاردى تارتۋعا مۇمكىندىك بەرەدى. قازاقستاننىڭ تسيركۋليارلىق ەكونوميكا مودەلىنە كوشۋى ەكولوگيالىق جاعدايدى جاقسارتۋ ءۇشىن قولايلى جاعدايلار جاسايدى جانە بيزنەس ءۇشىن جاڭا مۇمكىندىكتەر اشادى», دەدى رۇستەم قابجانوۆ.
ال شىعىس قازاقستان وبلىسىندا قالدىقتاردى قايتا وڭدەۋ سالاسىنا شەتەلدىك ينۆەستورلار تارتىلادى. وڭىر اكىمى نۇرىمبەت ساقتاعانوۆ قالدىقتاردى باسقارۋ بويىنشا ايماقتا اتقارىلىپ جاتقان جۇمىستاردى باياندادى.
«وندىرىستىك كاسىپورىنداردان 2 ميلليارد توننادان استام تەحنوگەندى مينەرالدىق تۇزىلىمدەردى زاماناۋي ەسەپكە الۋ, قاۋىپسىز ساقتاۋ جانە قايتالاما اينالىمعا تارتۋ تالاپ ەتىلەدى. سونىمەن قاتار وبلىس حالقىنان جىل سايىن 300 مىڭ تونناعا جۋىق تۇرمىستىق قالدىقتار جينالادى», دەدى نۇرىمبەت ساقتاعانوۆ.وڭىردە قالدىقتاردى قايتا وڭدەۋ ءۇشىن گەرمانيا, قىتاي جانە شۆەيتساريالىق ينۆەستورلاردى تارتۋ جۇمىستارى جۇرگىزىلىپ جاتىر. سونىمەن قاتار تۇرمىستىق قالدىقتاردى جيناۋ, شىعارۋ جانە سۇرىپتاۋ ءىسى جولعا قويىلعان. 2026 جىلدان باستاپ كوممۋنالدىق قالدىقتاردى باسقارۋ بويىنشا تسيفرلىق ورتا قۇرۋ جوسپارلانىپ وتىر.
