بالكىم مۇنداي وقيعا بولىپ تا جاتقان شىعار. اقمولا وبلىستىق كوپبەيىندى اۋرۋحاناسىنىڭ جانىنداعى ونكولوگيالىق ديسپانسەردىڭ حيميا تەراپيا ءبولىمىنىڭ مەڭگەرۋشىسى مەڭدىگۇل ءلاتيفتىڭ باسىنان وتكەن تاعدىردىڭ تالكەگىن جان دۇنيەڭ تەبىرەنبەي تىڭداۋ ءتىپتى دە مۇمكىن ەمەس. اتام قازاقتىڭ ء«بىرىنشى بايلىق – دەنساۋلىق» دەۋى دە وسىدان شىعار.
مەڭدىگۇل ساۋىتحانقىزى س.اسفەندياروۆ اتىنداعى الماتى قازاق ۇلتتىق مەديتسينالىق ۋنيۆەرسيتەتىنىڭ تۇلەگى. ەڭبەك جولىن الماتىدا باستاعان. كەيىن موڭعوليانىڭ بايان-ولگەيىندە ۇلكەن كلينيكادا تابىستى ەڭبەك ەتكەن. ارادا ءبىراز جىل وتكەن سوڭ اتاجۇرتىنا ورالىپ, سولتۇستىك وڭىردەن ءدام بۇيىرعان.
– ايىرتاۋ اۋداندىق اۋرۋحاناسى حيرۋرگيا ءبولىمىنىڭ مەڭگەرۋشىسى بولىپ جۇمىس ىستەپ جۇرگەن كەزىمدە اسا ءىرى جول اپاتى بولدى. بىردەن سەگىز ادام اۋرۋحاناعا ءتۇستى. جالعىز ءوزىم وپەراتسيا جاسادىم. بالكىم سول كەزدە ۆيرۋس جۇقتىرىپ الدىم با دەپ ويلايمىن, ءومىر مەن ءولىم تارازى باسىن الما-كەزەك تارتىپ جاتقاندا قاۋىپسىزدىك شارالارىن تۇگەل ساقتاۋ مۇمكىن ەمەس قوي. وندايدا بار نيەتىڭ ادامداردى قۇتقارىپ قالۋ عانا بولادى. ءوز باسىڭدى ويلاپ, تارتىنىپ تۇرۋ ءسىرا دا مۇمكىن ەمەس. جۇمىس بارىسىندا مۇنداي وقيعالار وتە كوپ بولدى, – دەيدى م.ساۋىتحانقىزى.
اۋەل باستا ەلەڭ قىلماعان. قاۋىپتى ۆيرۋس ۋاقىتشا قالعىپ كەتكەنگە ۇقسايدى. 2019 جىلى جولداسى ولجاباي بۇيرەك اۋرۋىنا شالدىعادى. قاتتى كۇيزەلىستىڭ سالدارىنان ۆيرۋس ويانىپ كەتسە كەرەك. ەندى ءتان ازابى مەڭدىگۇلدىڭ ءوزىن قيناي باستايدى. قان سۇيىلعان, اياق-قولى ىسكەن. سوندا دا جۇمىسىن جالعاستىرا بەرەدى. دەرت جانىنا باتقان سوڭ ەمدەلۋدىڭ جولىن ىزدەيدى. استاناعا بارىپ قارالادى. باۋىر اۋرۋىمەن شۇعىلداناتىن پروفەسسوردىڭ اقىل-كەڭەسىن تىڭدايدى. بولاشاق ب ۇلىڭعىر, ەرتەڭگى كۇن قاراڭعى. دەنساۋلىق ساقتاۋ مينيسترلىگىنە كىرگەن. شەتەلدەردە ەمدەلۋگە نيەت ەتكەن. بىراق قايران بولمادى. داتكە قۋات – جاپون ءدارىسى تىم قىمبات. بار جيعان-تەرگەنىن جۇمساعان, باسپاناسىن ساتقان. ءۇمىت ءجىبى قولىنان سۋسىپ بارا جاتقانداي. جارىق كۇننىڭ جالعىز ساۋلەسى قىمبات قوي. كىشكەنتاي قىزىن, جالعىز ۇلىن, جان جارىن ويلايدى. مۇندايدا كوڭىلگە نە كەلمەيدى. ءالى دە ءومىر سۇرگىسى كەلەدى. قانشاما ناۋقاستى ەمدەپ, العىسىن ارقالاپ, اق باتاسىن الىپ ەدى. ءبىر قايىرى بولار دەگەن. ىشتەي ءمۇجىلدى, بىراق, سىنعان جوق. انا رۋحىنىڭ مىقتىلىعى. قالاي قايران قالماسسىڭ. بوتاداي بوزداپ, بورداي توزىپ كەتەتىن-اق جاي. جالعىز قالسا بولدى قاراڭعى, قالىڭ ويلار قاۋمالايدى, جانىن جەگىدەي جەيدى. ءومىر-وزەننىڭ سارقىراي اعىپ كەلىپ, قۇمعا سىڭەر جەرى وسى بولعانى ما؟
ءمايىت دونورلاردىڭ شاراپاتى تيەر مە دەپ تە ويلاعان. وي ونعا, سانا سەگىزگە ءبولىنىپ جۇرگەن تۇستا ۇلى ءدىنبولات اناسىنىڭ جان كۇيزەلىسىنە شىداي الماي, بۇيرەگىمنىڭ ءبىر بولىگىن مەن بەرەمىن انا, دەمەسى بار ما. التى جىل ازاپتى اۋرۋمەن الىسقان انا جۇرەگى شىم ەتە ءتۇستى. ءوزى دە دارىگەر بولعان سوڭ بۇل سالاداعى جاڭالىقتان حاباردار. ەلىمىزدە ءمايىت دونورلاردىڭ كەزەگى دە ۇزاق ەكەن. شامامەن ءتورت مىڭداي ادام كەزەكتە تۇر. ول جەتكەنشە قاشان. بىراق بالاسىن ويلايدى. تەپسە تەمىر ۇزەتىن جىگىت. ەركىن كۇرەستەن سپورت شەبەرى. رەسپۋبليكالىق, حالىقارالىق جارىستاردا جۇلدە الىپ ءجۇر. مۇمكىن ەمەس, بالاسىنىڭ باعىن بايلاعان دۇرىس بولمايتىن شىعار. بولاشاعىن ويلاپ ءوزى دە جىلايدى. ۇلى مەن قىزى دا, نەمەرەسى دە.
بىردە موينىنان قان كەتتى. سۇپ-سۇيىق, جىلىمشى قان. جان جۇرەگى ەلجىرەپ كەتكەن بولار, مىنا كورىنىس جانىنا باتقان ۇلى ناعىز ەرلەرگە ءتان مىنەزبەن:
– بولدى ەندى, ەشقانداي دونوردى كۇتۋدىڭ قاجەتى جوق – دەيدى.
پەرزەنتتىك شىنايى پەيىلمەن, تاڭعى شىقتاي مولدىرەگەن اپپاق ماحابباتىمەن تاۋەكەلگە بەل بۋعان بولار. جۇزىندە قورقىنىش-قوبالجۋ جوق. قيىندىققا بەكىنگەن, شاربولاتتاي شيرىققان قالپى. وعان دا وڭاي ەمەس قوي. ونسىز دا جانى جۇدەپ, جۇرەگى جىلاپ جۇرگەن اناسىنىڭ بوساڭسىعانىن كورگىسى كەلمەگەن بولار. ۇلتتىق ونكولوگيا جانە ترانسپلانتولوگيا عىلىمي ورتالىعىندا ءدىنبولاتتىڭ باۋىرىنىڭ ءبىر بولىگىن الۋعا 6,5 ساعات, اناسىنا 9,5 ساعات وپەراتسيا جاسالدى.
– مەن ءوزىمنىڭ ارىپتەستەرىم دارىگەرلەرگە تولىق سەندىم. وسىلايشا, 57 جاسىمدى جانساقتاۋ بولىمىندە قارسى الدىم, – دەيدى م.ساۋىتحانقىزى.
ەسىن جيىسىمەن بالاسىن ىزدەگەن. كوڭىلى بوساپ, كوزىنىڭ جاسىن كول ەتكەن. جانساقتاۋ بولىمىندە سەگىز كۇن جاتقاندا جانىن قويارعا جەر تابا الماي, باۋىر ەتى بالاسىن اڭساۋمەن بولعان.
– ەكەۋىمىز كەزدەسكەنشە قۇتتى ءبىر عاسىر وتكەندەي. جانساقتاۋ بولىمىنەن تۇسىرگەن كەزدە بولمەمە ۇلىم كىرىپ كەلدى, – دەيدى كەيىپكەرىمىز, – جۇرەگىم جارىلىپ كەتەردەي قۋاندىم.
ۇنسىزدىك. اۋىر ويلاردى ارقالاعان, جان دۇنيەسىن استاڭ-كەستەڭ ەتكەن ازاپتى ءسات. ءبىر-ءبىرىن جانارلارىمەن ايمالاپ, جان جۇرەكتەرىمەن قۇشاقتاعانداي. اناسىنا ەكىنشى ءومىر سىيلاعان پەرزەنتى ءدىنبولات قازىر سپورت مەكتەبىندە جاتتىقتىرۋشى, ءوزى دە وتباسىلى. پەرزەنتتەرى قۇلديلاپ جۇگىرىپ ءجۇر. ال مەڭدىگۇل ساۋىتحانقىزى ديسپانسەردە ناۋقاستارعا ەم-دوم جاسايدى.
كوكشەتاۋ
