الماتىدا العاش رەت «ماڭگىلىك پولك» شاراسى ۇيىمداستىرىلدى

استانا. 9 مامىر. الماتىدا جەڭىستىڭ 70 جىلدىعىنا وراي «ماڭگىلىك پولك» ازاماتتىق شاراسى ۇيىمداستىرىلدى. وعان ءارتۇرلى جاستاعى 1 000-نان استام ادام قاتىسىپ, «استانا» الاڭىنان «28 پانفيلوۆشىلار» ساياباعىنا دەيىن جاياۋ ءجۇرىپ ءوتتى. بۇل تۋرالى «قازاقپارات» حابارلادى. شاراعا قاتىسۋشىلار ۇلى وتان سوعىسىنا قاتىسقان اتالارى مەن اكەلەرىنىڭ جانە تۋعان-تۋىستارىنىڭ سۋرەتتەرىن ۇستاپ شىقتى. ساياباققا كەلگەن ولار ماڭگىلىك الاۋعا گۇل شوقتارىن قويىپ, قازاقستاندىق جاۋىنگەرلەردىڭ سوعىستاعى ەرلىكتەرىن ەسكە الدى. «ماڭگىلىك پولك» شاراسى العاش رەت 2012 جىلى رەسەيدىڭ تومسك قالاسىندا ءوتتى. 2013 جىلى 120 قالادا ۇيىمداستىرىلسا, بىلتىر 7 ەلدىڭ 500-دەن استام قالاسىندا جارتى ميلليون ادام كوشەگە شىقتى. ال الماتىدا اتالعان اكتسيا العاش رەت ءوتىپ وتىر. ايتا كەتەيىك, «ماڭگىلىك پولك» ازاماتتىق اكتسياسى بۇگىن ەلىمىزدىڭ بىرقاتار ءىرى قالالارىندا ۇيىمداستىرىلدى. ەلامان قوڭىر. دەرەك, سۋرەت: «قازاقپارات».