كەزدەسۋ بارىسىندا تاراپتار كومپانيانىڭ اقتوبەدە ءتورتىنشى زاۋىتىن سالۋعا دايىندىق بارىسىن, ينجەنەرلىك-ينفراقۇرىلىمدىق قامتاماسىز ەتۋ ماسەلەلەرىن جانە جوبانى تابىستى ىسكە اسىرۋ ءۇشىن قاجەتتى جاعدايلاردى تالقىلادى.
اسحات شاحاروۆ حالىقارالىق ينۆەستورلارمەن ۇزاقمەرزىمدى ىنتىماقتاستىقتىڭ ماڭىزدىلىعىن اتاپ ءوتىپ, اقتوبە وبلىسىنىڭ ەلەۋلى ەكونوميكالىق جانە ونەركاسىپتىك الەۋەتكە, سونداي-اق ينۆەستيتسيالار ءۇشىن قولايلى جاعدايلارعا يە ەكەنىن ايتتى.
ء«بىز Coca-Cola-نىڭ جاڭا زاۋىتىنىڭ قۇرىلىسى ءوڭىر ەكونوميكاسىنىڭ دامۋىنا قۋاتتى سەرپىن بەرىپ, جاڭا جۇمىس ورىندارىن اشاتىنىنا جانە زاماناۋي ەكولوگيالىق تازا تەحنولوگيالاردى ەنگىزىلۋىنە ىقپال ەتەدى دەگەن سەنىمدىمىز. ءبىز جوبانى ىسكە اسىرۋدىڭ بارلىق كەزەڭىندە جان-جاقتى قولداۋ كورسەتۋگە دايىنبىز», دەدى ءوڭىر باسشىسى.
اكىمنىڭ سوزىنشە, ءوڭىردىڭ تۇركيا رەسپۋبليكاسىمەن ىنتىماقتاستىعى وڭ ديناميكانى ساقتاپ كەلەدى. بيىلعى جىلدىڭ توعىز ايىندا اقتوبە وبلىسىنىڭ تۇركيامەن سىرتقى ساۋدا اينالىمى 71,2 ملن اقش دوللارىن قۇرادى, ونىڭ 58,4 ملن دوللارى - ەكسپورتقا, 12,8 ملن دوللارى - يمپورتقا تيەسىلى.
ءوز كەزەگىندە ۆەلي دينچەل جوبانىڭ ءوندىرىس كولەمىن ۇلعايتۋعا جانە كومپانيانىڭ قازاقستانداعى نارىقتىق ورنىن كۇشەيتۋگە ايىرىقشا ۇلەس قوساتىنىن العا تارتتى.
زاۋىت قۇرىلىسىنا وبلىس اكىمدىگى اقتوبە قالاسىنداعى وڭتۇستىك اينالما جولى بويىنان 25 گەكتار جەر تەلىمىن ۇسىندى. قۇرىلىس جۇمىستارى 2026 جىلى باستالادى دەپ جوسپارلانعان. نىسان پايدالانۋعا بەرىلگەننەن كەيىن 120-دان استام جاڭا جۇمىس ورنى اشىلادى. كاسىپورىن ەكولوگيالىق تازا تەحنولوگيالاردى جانە قالدىقتاردى باسقارۋدىڭ حالىقارالىق ستاندارتتارىن قولدانادى, بۇل ونى ءوڭىردىڭ تۇراقتى وندىرىستىك ەكوجۇيەسىنە ينتەگراتسيالاۋعا مۇمكىندىك بەرەدى.
ايتا كەتەيىك, اقتوبە وبلىسىندا تۇرىك ينۆەستورلارىنىڭ قاتىسۋىمەن جۇزەگە اسىرىلىپ جاتقان جوبالار بار. سونىڭ ىشىندە S Sistem Lojistik Ltd. كومپانياسى جىلىنا 12 مىڭ توننا قۋاتتىلىقپەن, 19 ملرد تەڭگە ينۆەستيتسيا كولەمىمەن, 180 جۇمىس ورنىن قۇرۋدى قاراستىراتىن كولىك-لوگيستيكالىق حاب قۇرىلىسىن جۇرگىزىپ جاتىر.
