فوتو: جي/ ru.freepik.com
كەڭەستە وتاندىق كاسىپورىنداردىڭ جوباعا قاتىسۋى, تەحنولوگيالار ترانسفەرتى, جەرگىلىكتى ونەركاسىپتى قولداۋ جانە جاڭا جۇمىس ورىندارىن قۇرۋ جايى تالقىلاندى.
قاتىسۋشىلار اەس قۇرىلىسى بارىسىندا شىعىنداردىڭ ەداۋىر بولىگى قوسالقى ينفراقۇرىلىمعا, ينجەنەرلىك جۇيەلەرگە, ماتەريالدار مەن سەرۆيستەردىڭ كەڭ اۋقىمىنا باعىتتالاتىنىن انىقتادى. بۇل قۇرىلىسقا قازاقستاندىق وندىرۋشىلەر مەن مەردىگەرلەردى كەڭىنەن تارتۋعا مۇمكىندىك بەرمەك.
سونداي-اق اتوم ەنەرگەتيكاسى سالاسى ءۇشىن تاۋار جەتكىزۋشىلەردىڭ, جۇمىستار مەن قىزمەت اتقارۋشىلاردىڭ ارنايى ءتىزىلىمى جاساقتالادى.
بۇل ءتىزىلىم راسىمدەردىڭ اشىقتىعىن, ساپانى باقىلاۋدى جانە جوباعا قاتىسۋعا تەڭ قولجەتىمدىلىكتى قامتاماسىز ەتەدى.
كەڭەس بارىسىندا اەس قۇرىلىسى كەزىندە وقشاۋلاۋدى دامىتۋدىڭ كەشەندى جوسپارى جوباسىنىڭ نەگىزگى ەلەمەنتتەرى تانىستىرىلدى. وندا قازىرگى جاعدايعا تالداۋ, وقشاۋلاۋدىڭ پەرسپەكتيۆالىق باعىتتارى, ونەركاسىپتى دامىتۋدى ىنتالاندىرۋ تەتىكتەرى جانە مەملەكەتتىك قولداۋ شارالارى قامتىلعان.
ء«بىز تەك بىلىكتى جانە سەنىمدى قىزمەت كورسەتۋشىلەردى تارتۋعا مۇمكىندىك بەرەتىن جۇيە قالىپتاستىرىپ جاتىرمىز. بۇل – اتوم جوبالارىنىڭ قاۋىپسىزدىگى مەن تيىمدىلىگىنىڭ نەگىزى. كەشەندى جوسپاردى ىسكە اسىرۋ وتاندىق ونەركاسىپ كاسىپورىندارىنىڭ ەداۋىر بولىگىن جاڭعىرتۋعا, جۇزدەگەن وتاندىق كومپانيانى جەتكىزىلىم تىزبەگىنە تارتۋعا, مىقتى بازا قالىپتاستىرۋعا جانە جاڭا وندىرىستەردىڭ اشىلۋىنا مۇمكىندىك بەرەدى. سونداي-اق شاعىن جانە ورتا بيزنەستىڭ دامۋىنا, جاڭا جۇمىس ورىندارىنىڭ قۇرىلۋىنا جانە وڭىرلىك ينفراقۇرىلىمنىڭ جاقسارۋىنا ۇلەس قوسادى», دەدى اگەنتتىك توراعاسى ا. ساتقاليەۆ.
جيىن قورىتىندىسى بويىنشا ونەركاسىپ پەن قۇرىلىس سەكتورىنىڭ جاعدايىنا تەرەڭ تالداۋ جۇرگىزۋ تۋرالى شەشىم قابىلداندى. مەملەكەتتىك ورگاندارعا كەشەندى جوسپار جوباسىن قاراستىرىپ, ءوز ۇسىنىستارىن ەنگىزۋ تاپسىرىلدى.
