فوتو: biletik.aero
مۇنداي تومەن كورسەتكىش اپەللياتسيا مەحانيزمىنىڭ بولماۋى, باعالاۋ راسىمدەرىن جۇيەلى تۇردە قايتا قاراۋ تاجىريبەسىنىڭ جوقتىعى جانە تالاپتاردىڭ ورىندالۋىنا باقىلاۋدىڭ السىزدىگىمەن بايلانىستى بولىپ وتىر.
سونداي-اق 2008 جىلى بەكىتىلگەن قولدانىستاعى سانات بەرۋ ەرەجەلەرى قازىرگى زامان تالاپتارى مەن حالىقارالىق ستاندارتتارعا سايكەس كەلمەيتىنى انىقتالعان. بۇگىندە «جۇلدىزدى» ساناتتى وزدىگىنەن يەلەنۋ تاجىريبەسى تۇتىنۋشىلاردى جاڭىلىستىرۋدا.
وسىعان بايلانىستى تۋريزم جانە سپورت مينيسترلىگى قوناق ۇيلەرگە «جۇلدىز» بەرۋ جۇيەسىن جاڭارتۋ بارىسىندا Hotelstars Union حالىقارالىق قاعيداتتارىنا بەيىمدەلگەن ناقتى باعالاۋ ولشەمدەرىن ەنگىزگەن.
جاڭا جۇيەنى ەنگىزۋ ناتيجەسىندە:
- قوناق ءۇي قىزمەتتەرىنىڭ ساپاسى ارتادى;
- كەلۋشىلەردىڭ قىزمەت كورسەتۋ دەڭگەيىن وڭ باعالاۋ كورسەتكىشى ارتادى;
- قازاقستاننىڭ تۋريستىك باعىت رەتىندەگى تارتىمدىلىعى كۇشەيەدى;
- ورنالاستىرۋ نىساندارىنىڭ رەسمي ساناتقا قاتىسۋ ۇلەسى ۇلعايادى.
حالىقارالىق تاجىريبە مۇنداي تاسىلدەردىڭ تيىمدىلىگىن كورسەتىپ وتىر.
مينيسترلىك ەلىمىزدە تۋريستىك ينفراقۇرىلىمدى دامىتۋ جانە قىزمەت ساپاسىن جاقسارتۋعا باعىتتالعان بىرقاتار مەملەكەتتىك قولداۋ شاراسى جۇزەگە اسىرىلىپ جاتقانىن دا مالىمدەدى.
«ولاردىڭ قاتارىندا تاۋ شاڭعىسى كۋرورتتارىنا ارنالعان تەحنيكا مەن جابدىقتى ساتىپ الۋعا جۇمسالعان شىعىنداردىڭ ءبىر بولىگىن وتەۋ, جول بويىنداعى قىزمەت كورسەتۋ نىساندارىن سالۋدى قولداۋ, تۋريستىك قىزمەت كورسەتۋگە ارنالعان اۆتوكولىك ساتىپ الۋدى سۋبسيديالاۋ, تۋروپەراتورلاردىڭ شىعىندارىن جانە اۋە بيلەتتەرىنىڭ قۇنىن سۋبسيديالاۋ, سونداي-اق سانيتارلىق-گيگيەنالىق توراپتاردى كۇتىپ-ۇستاۋعا ارنالعان قاراجات قاراستىرىلعان», دەلىنگەن مينيسترلىك حابارلاماسىندا.
