فوتو اشىق دەرەككوز
بۇل تۋرالى ول وڭتۇستىك افريكاداعى G20 سامميتىنەن كەيىن وتكەن ءباسپاسوز ءماسليحاتىندا ايتتى.
«وسى اپتادا مەن زەلەنسكيمەن كەزدەستىم, ال ەرتەڭ پۋتينمەن تەلەفون ارقىلى سويلەسەمىن. ءبىز بەيبىت ءومىر ءۇشىن ىنتا-شىنتامىزدى جۇمساپ كەلەمىز ءھام وعان قول جەتكىزەمىز», دەدى ەردوعان.
ال TRT تەلارناسى تاراتقانداي اقپاراتقا ساي, تۇرىك باسشىسى G20 ءسامميتى اياسىندا فرانتسيا پرەزيدەنتى ەممانۋەل ماكرونمەن كەزدەسۋدە رەسەي مەن ۋكراينا اراسىنداعى سوعىس ءادىل ءارى تۇراقتى بەيبىت كەلىسىممەن اياقتالۋى ءتيىس ەكەنىن اتاپ ءوتتى.
«ەردوعان بارلىق ديپلوماتيالىق تەتىكتەردى پايدالانۋ قاجەتتىگىن ايتتى جانە تۇركيا كەلىسسوزدەر جۇرگىزۋگە قولايلى جاعداي قالىپتاستىرۋ باعىتىنداعى جۇمىستارىن جالعاستىرىپ جاتقانىن راستادى», دەلىنگەن ماتەريالدا.
رەسەيلىك اقپارات قۇرالدارىنىڭ مالىمەتىنشە, رەسەي پرەزيدەنتىنىڭ ءباسپاسوز حاتشىسى دميتري پەسكوۆ تا ەكى ەل باسشىلارىنىڭ دۇيسەنبى كۇنى تەلەفون ارقىلى سويلەسەتىنىن راستادى.
ەسكە سالا كەتەيىك, ۆلاديمير زەلەنسكيمەن انكارادا وتكەن كەلىسسوزدەردىڭ قورىتىندىسىنا سايكەس ەردوعان ماسكەۋ مەن كيەۆ اراسىنداعى ستامبۋلدا باستالعان كەلىسسوزدەردى قايتا جالعاستىرۋعا جانە ولاردىڭ تاقىرىپتىق اياسىن كەڭەيتۋگە شاقىرعان بولاتىن. ول تۇركيا ۋكراينانىڭ جانە رەسەيدىڭ قاتىسۋىمەن بولعان ءۇش راۋند «بەيبىت كەلىسسوزدەردى» قابىلداعانىن, سول كەزدەسۋلەردە اسىرەسە گۋمانيتارلىق ماسەلەلەر بويىنشا بەلگىلى ءبىر پروگرەسس بولعانىن اتاپ ءوتتى.
ءوز كەزەگىندە زەلەنسكي كيەۆ ءۇشىن تۇركيانىڭ ۇستانىمى ايرىقشا ماڭىزدى ەكەنىن ايتىپ, ۋكراينا تاۋەلسىزدىگى مەن ەگەمەندىگىن قولداعانى ءۇشىن العىس ءبىلدىردى.
