پارلامەنتاريزم ينستيتۋتى ديرەكتورىنىڭ ورىنباسارى ءلاززات سۇلەيمەننىڭ سوزىنشە, بالالار دەنساۋلىعىنا قاۋىپ توندىرەتىن ونىمدەر ماسەلەسى – ۇلتتىق قاۋىپسىزدىككە تونگەن قاتەر.
«بۇگىن بىزگە كەشەندى جۇيە قۇرۋ قاجەت: باقىلاۋ, الدىن الۋ, اعارتۋ جانە ەكونوميكالىق شارالاردى بىرىكتىرۋ – كەزەك كۇتتىرمەس ماسەلە», دەيدى ول.
سەنات دەپۋتاتى بيبىگۇل جەكسەنبايدىڭ ايتۋىنشا, بالالاردىڭ قاۋىپسىزدىگى مەن ساپالى ونىمگە قول جەتكىزۋى زاڭنامالىق تۇرعىدان قورعالاتىن ماسەلە. قوعام تاراپىنان دا باقىلاۋ كۇشەيۋى كەرەك.
ال ءماجىلىس دەپۋتاتى نۇرگۇل تاۋقىزى ەنەرگەتيكالىق سۋسىندار, فاستفۋد جانە قۇرامىندا قانت, تۇز, جاساندى قوسپالارى بار ونىمدەردىڭ زيانىن ايتا كەلە, ەلىمىزدە 6-9 جاس ارالىعىنداعى بالالاردىڭ 21%-دا ارتىق سالماق نەمەسە سەمىزدىك بار ەكەنىن, جاسوسپىرىمدەردىڭ 40%-دان استامى ەنەرگەتيكالىق سۋسىنداردى تۇراقتى تۇردە تۇتىناتىنىن تىلگە تيەك ەتتى. سونداي-اق دۇرىس تاماقتانۋ مادەنيەتىن قالىپتاستىرۋ, ونىمدەردىڭ ارنايى تاڭبالانۋى مەن وتاندىق پايدالى ءونىم ءوندىرىسىن دامىتۋ قاجەتتىگىن ايتتى.
«استانا» مەديتسينا ۋنيۆەرسيتەتى, نۋتريتسيولوگيا كافەدراسىنىڭ دوتسەنتى ساۋلە تارجىباەۆانىڭ سوزىنشە, دۇرىس تاماقتانۋ سالاسىندا الاڭداتارلىق ۇردىستەر كوپ. ول بالالار مەن جاسوسپىرىمدەر اراسىندا تىنىس الۋ جولدارى, اس قورىتۋ جۇيەسى, جۇيكە جۇيەسى, سونداي-اق ينفەكتسيالىق جانە پارازيتارلىق اۋرۋلار كوبەيگەنىن جەتكىزدى. سونىمەن قاتار ءتاتتى سۋسىنداردى تۇتىنۋ 10,9%-دان 16,7%-عا وسكەن, كۇندەلىكتى تۇتىنۋ 11-15 جاس ارالىعىنداعى جاسوسپىرىمدەردە 67,8%-عا جەتكەن, ال قىزدار اراسىندا 65,5%-دى قۇرايدى.
«TechnoWomen» ۇيىمىنىڭ ءتورايىمى ءازيزا شوجەەۆا ءوز سوزىندە دۇكەندەردە اشىق ءارى باقىلاۋسىز ساتىلاتىن زياندى ونىمدەردىڭ بالالار ءۇشىن وڭاي قولجەتىمدى ەكەنىن ايتتى. ول وتكەن جىلى وسىنداي ونىمدەردى قولدانۋ ناتيجەسىندە 24 بالانىڭ اۋرۋحاناعا تۇسكەنىن جەتكىزدى. ونىڭ الدىن الۋ ءۇشىن مۇنداي ونىمدەردى مىندەتتى تۇردە ماركيروۆكالاۋ قاجەت ەكەنىن اتاپ ءوتتى.
