وسى بەدەلدى جەلىگە ەلىمىزدەن تۇڭعىش بولىپ Astana IT University (AITU) قوسىلدى. بۇل – ەلىمىزدىڭ يننوۆاتسياعا باعىتتالعان جاڭا كەزەڭگە قادام باسقانىن ايقىن كورسەتەتىن ماڭىزدى وقيعا.
Astana IT University ەندى MIT-ءتىڭ كاسىپكەرلىككە ارنالعان تولىققاندى ءبىلىم بەرۋ جۇيەسىن ەنگىزەدى. ياعني ۋنيۆەرسيتەت جەكەلەگەن كۋرستاردى عانا ەمەس, يننوۆاتسيا مەن بيزنەس قۇرۋعا ارنالعان تۇتاس «وپەراتسيالىق جۇيەنى» قابىلدايدى. MIT ازىرلەگەن Disciplined Entrepreneurship (24 قادام) جانە 15 Startup Tactics اتتى تانىمال ادىستەمەلەر AITU-دىڭ باكالاۆر, ماگيستراتۋرا جانە اكسەلەراتور باعدارلامالارىنىڭ نەگىزىنە اينالادى.
باعدارلاما ەكى باعىتتا جۇزەگە اسادى:
1. وقىتۋشىلاردىڭ بىلىكتىلىگىن ارتتىرۋ.
MIT-ءتىڭ Train-the-Trainer باعدارلاماسى AITU مۇعالىمدەرىنە سول جەردە وقىپ, MIT تاسىلدەرىن تولىق مەڭگەرۋگە جول اشادى. العاشقى توپ 2026 جىلعى قاڭتاردا اقش-تا وقۋعا اتتانادى. جىل بويى ولار GLEEN ونلاين-ساباقتارىنا قاتىسادى, ال جازدا MIT بازاسىندا وتەتىن ستراتەگيالىق ۆوركشوپتا حالىقارالىق ماماندارمەن بىرگە AITU ستارتاپ-ەكوجۇيەسىنىڭ بولاشاق جوسپارىن جاسايدى.
2. ستۋدەنتتەردىڭ پراكتيكالىق داعدىلارىن دامىتۋ.
AITU ستۋدەنتتەرى جىل سايىن StartMIT يننوۆاتسيالىق ينتەنسيۆىنە قاتىسا الادى. سونىمەن بىرگە MIT Orbit جانە Jetpack AI پلاتفورمالارىنا تولىق قولجەتىمدىلىك الادى. بۇل جۇيەلەر ستۋدەنتتەرگە بيزنەس مودەلىن جاساۋ, گيپوتەزالاردى تەكسەرۋ, ءونىمنىڭ قۇندى ۇسىنىسىن ازىرلەۋ سەكىلدى ستارتاپقا قاجەتتى ناقتى داعدىلاردى ۇيرەتەدى. كاسىپكەرلىك ۋنيۆەرسيتەتتىڭ بارلىق ستۋدەنتى ءۇشىن قولجەتىمدى نەگىزگى قۇزىرەتكە اينالادى.
Astana IT University رەكتورى ءالتايىر احمەتوۆ بۇل سەرىكتەستىكتىڭ ۇلتتىق دەڭگەيدەگى ماڭىزىن اتاپ ءوتتى:
«GLEEN MIT باعدارلاماسىنا قوسىلۋ – ەلىمىز ءۇشىن جاڭا مۇمكىندىكتەر اشادى. AITU جاھاندىق ءبىلىم جانە يننوۆاتسيا قوزعالىسىنا قوسىلىپ, الەمدىك دەڭگەيدە باسەكەگە قابىلەتتى ستارتاپتار دايىندايتىن ورتالىققا اينالادى», دەدى ول.
MIT-پەن ارىپتەستىك AITU-دىڭ حالىقارالىق بەدەلىن ارتتىرىپ, زەرتتەۋ, جاڭا تەحنولوگيالار جانە ينۆەستيتسيالار باعىتىندا كەڭ مۇمكىندىكتەر اشادى. ۋنيۆەرسيتەت قازاقستان مەن ورتالىق ازياداعى يننوۆاتسيالىق دامۋدىڭ ماڭىزدى درايۆەرىنە اينالىپ كەلەدى.
