جەڭىس كۇنىنە وراي استانادا مەرەكەلىك ءىس-شارالار ءوتتى

استانا. 9 مامىر. بۇگىن – ۇلى جەڭىس كۇنى استانانىڭ باستى الاڭدارىندا مەرەكەلىك ءىس-شارالار ءوتتى. وعان ەلىمىزدىڭ ءار ايماعىنان كەلگەن 500-گە جۋىق ۇلى وتان سوعىسىنىڭ ارداگەرى مەن تىل ەڭبەككەرى جانە قالا تۇرعىندارى قاتىستى. بۇل تۋرالى egemen.kz حابارلادى. جەڭىس كۇنىنە وراي اكتسيانى ۇيىمداستىرۋشىلار سالتاناتتى قابىلداۋ وتكىزىپ, شاتىرلى قالاشىقتار تۇرعىزدى. وسىنداي قالاشىقتاردىڭ بىرىنە جاۋاپتى – استانا قالاسى تابيعات قورلارى باسقارماسىنىڭ جەتەكشىسى ميراس گايسين ءوز شاتىرلارىندا 50-گە جۋىق ارداگەرگە قۇرمەت كورسەتكەندەرىن ايتتى. «بۇل ارداگەرلەر قىزىلوردا مەن استانا قالاسىنان كەلگەن. ءبىز ولارعا كەڭ داستارقان جايىپ, شىن جۇرەكتەن تىلەك بىلدىردىك. قارت مايدانگەرلەردىڭ قۇرمەتىنە كونتسەرتتىك باعدارلاما قويىپ, ولارعا بەيبىتشىلىك ءۇشىن العىسىمىزدى ايتتىق», – دەيدى باسقارما جەتەكشىسى. شارا شەڭبەرىندە «وتان قورعاۋشىلار» مونۋمەنتىنە جينالعان قاۋىم جاۋىنگەر بوتقاسىنان ءدام تاتسا, استانانىڭ اشىق الاڭدارىندا ۇلى جەڭىستىڭ 70 جىلدىعىنا ارنالعان كونتسەرتتىك باعدارلامالار قويىلدى. ءدال وسىنداي مەرەكەلىك شارالار «بايتەرەك» مونۋمەنتى, قالا اكىمدىگى الدىنداعى الاڭ, «ستۋدەنت» پاركى, «جاستار» تەاترى مەن ەسىل وزەنىنىڭ جاعاسىندا دا ۇيىمداستىرىلدى. قۇرمەتتى قوناقتاردى مەرەكەلىك شارالارعا الىپ كەلۋ ءۇشىن قالالىق اۆتوبۋس پاركى 11 جايلى اۆتوبۋسىن ۇسىنعانىن ايتا كەتەيىك. ەلامان قوڭىر. دەرەك: egemen.kz. سۋرەت: yvision.kz.