مينسكىدەگى حالىقارالىق تۋرنيردە ەكى بوكسشىمىز جەڭىمپاز اتاندى

استانا. 9 مامىر. بەلارۋس استاناسى – مينسكىدە وتكەن بوكستان ۆيكتور ليۆەنتسەۆتى ەسكە الۋعا ارنالعان حالىقارالىق تۋرنيردە قازاقستان بوكسشىلارى قورجىنعا 4 مەدال سالدى. اتاپ ايتساق, ەرجان جومارت (49 كگ., سۋرەتتە) پەن ەركىن مۇحامەدجان (91 كگ.) جارىس جەڭىمپازى اتانسا, ابىلايحان ءجۇسىپوۆ (64 كگ.) پەن شايمۇرات قۇسايىنوۆ (81 كگ.) قولا جۇلدەگە قول جەتكىزدى. بۇل تۋرالى قازاقستان بوكس فەدەراتسياسىنىڭ رەسمي سايتى kfb.kz حابارلادى. جارتىلاي فينالدا ابىلايحان تۇركيا بوكسشىسىنا ەسە جىبەرسە, شايمۇرات گرۋزيا وكىلىنەن جەڭىلدى. ال فينالعا شىققان قوس سپورتشىمىز جوعارى دەڭگەيدە جۇدىرىقتاسىپ, وتاندىق جانكۇيەرلەردىڭ العىسىنا بولەندى. ەرجان شەشۋشى باسەكەدە تۇرىك بوكسشىسىنان باسىم ءتۇسىپ, ابىلايحاننىڭ جىبەرگەن ەسەسىن قايتارىپ بەردى. ەركىن چەمپيوندىق اتاققا تالاستا وزبەكستاندىقتى تىزە بۇكتىردى. سونىمەن قاتار, ءتۋرنيردىڭ «ەڭ ۇزدىك تورەشىسى» اتاعى قازاقستاندىق نۇربەك باتىروۆقا بۇيىرعانىن ايتا كەتەيىك. جالپى, سايىسقا الەمنىڭ 10 ەلىنەن 85 بوكسشى قاتىستى. ەلامان قوڭىر. دەرەك, سۋرەت: kfb.kz.