سۋرەت: kz.emb-japan.go.jp
ەلشىلىكتە وتكەن ءىس-شارادا جاپونيانىڭ ەلىمىزدەگى توتەنشە جانە وكىلەتتى ەلشىسى يدجيما ياسۋماسا مەن وسكەمەن قالاسىنداعى «سترانا چۋدەس» وڭالتۋ-دامىتۋ ورتالىعى» قب توراعاسى اننا يپاتوۆا گرانتتىق كەلىسىمشارتقا قول قويدى.
جاپونيا ەلشىسى قارجىلاي قولداۋعا يە بولعان ورتالىقتى قۇتتىقتاي وتىرىپ, «Kusanone» باعدارلاماسى قاراپايىم حالىقتىڭ ءومىرىن جاقسارتۋعا, سونداي-اق جاپونيا مەن قازاقستان اراسىنداعى ەكىجاقتى قارىم-قاتىناستاردى ودان ءارى نىعايتۋعا ىقپال ەتەتىنىنە سەنىم ءبىلدىردى.
ورتالىق باسشىسى گرانت قارجىسىنا بالالاردى ۇيلەرىنەن وڭالتۋ ورتالىقتارىنا تاسىمالدايتىن كولىك الۋدى جوسپارلاپ وتىرعانىن ايتتى.
«اۋتيست بالالارمەن قوعامدىق كولىككە ءمىنۋ ءبىراز قيىندىق تۋعىزادى. مەنىڭ بالام وسىنداي دەرتكە شالدىققان, سوندىقتان وسىنداي بالالارى بار اتا-انالاردى جاقسى تۇسىنەمىن. ولاردى دامىتۋ قاجەت, سول سەبەپتى وڭالتۋ, دامىتۋ ورتالىقتارىنا كۇندە قاتىناۋعا تۋرا كەلەدى. تاكسي نەمەسە جەكە كولىكپەن اپارامىز, تاكسيمەن شىعىن كوپ, ال جەكە كولىك بارىندە بولا بەرمەيدى. سوندىقتان الدىمەن كولىك ماسەلەسىن شەشۋىمە تۋرا كەلىپ تۇر», دەدى ول.
گرانت سوماسى – 64 069 دوللار كولەمىندە. «سترانا چۋدەسكە» ناقتى قانشا قارجى بەرىلەتىنى جوبانى جۇزەگە اسىرۋ بارىسىندا جاسالاتىن كەلىسىمشارتتارعا بايلانىستى بولماق.
ەلشى يدجيما ياسۋماسا «Kusanone» باعدارلاماسىنا توقتالىپ ءوتتى.
«Kusanone» – جاپونيا ۇكىمەتىنىڭ ادام قاۋىپسىزدىگىن قامتاماسىز ەتۋ جونىندەگى شاعىن اۋقىمداعى الەۋمەتتىك جوبالارعا قايتارىمسىز كومەگى. ونىڭ ماقساتى – حالىقتىڭ قاراپايىم توپتارىنا جاردەمدەسۋ, ولاردىڭ قاۋىپسىزدىگىن قامتاماسىز ەتىپ, الەۋەتىن ارتتىرۋ ارقىلى جەرگىلىكتى تۇرعىنداردىڭ الەۋمەتتىك دامۋىن قامتاماسىز ەتۋ. باعدارلاماعا جەرگىلىكتى بيلىك ورگاندارى, مەديتسينا, ءبىلىم بەرۋ مەكەمەلەرى, ۇكىمەتتىك ەمەس, قوعامدىق ۇيىمدار, قوعامدىق قورلار قاتىسا الادى. جوبا دەنساۋلىق ساقتاۋ, ءبىلىم بەرۋ, الەۋمەتتىك قامتاماسىز ەتۋ, ەكولوگيا, قورشاعان ورتانى قورعاۋ, كەدەيلىكپەن كۇرەس, ت.ب. سالالارعا ارنالعان», دەدى ەلشى.
اتالعان باعدارلاما ەلىمىزدە 1997 جىلدان بەرى جۇزەگە اسىرىلىپ كەلەدى. وسى ۋاقىتتا 8 266 005 دوللاردى قۇرايتىن 122 جوبا ىسكە اسقان.
