فوتو: atameken.kz
شقو كاسىپكەرلەر پالاتاسىنا وڭىردەگى بىرنەشە ستوماتولوگيالىق كلينيكا جۇگىنگەن. بيزنەس وكىلدەرى قوردىڭ جىلدار بويى قولدانىستاعى كەلىسىمشارتتار مەن تاريفتەر بويىنشا تولەنىپ كەلگەن انەستەزيا قىزمەتتەرىن كەنەتتەن «قوسارلانعان تولەم» دەپ تانىپ, تالاپ قويا باستاعانىن حابارلاعان.
كاسىپكەرلەر پالاتاسى كلينيكالاردىڭ وتىنىشتەرىن مۇقيات قاراپ, نورماتيۆتىك اكتىلەردى جانە سوت ماتەريالدارىن زەرتتەدى, سەبەبى مۇنداي تالاپتار وڭىردەگى بۇكىل ستوماتولوگيالىق سەكتور ءۇشىن تاۋەكەلدى جاعدايلاردى تۋدىرعان.
الەۋمەتتىك مەديتسينالىق ساقتاندىرۋ قورى انەستەزيا قىزمەتتەرى نەگىزسىز تولەمگە قويىلدى دەپ ەسەپتەپ, كومپانيادان 16,5 ملن تەڭگە ءوندىرىپ الۋدى تالاپ ەتكەن, سونىمەن قاتار:
- قىزمەتتەر 2023 جىلعا ارنالعان قولدانىستاعى كەلىسىمشارت اياسىندا كورسەتىلگەن;
- ورىندالعان جۇمىس اكتىلەرى ەكى تاراپپەن دە قول قويىلعان;
- قور 2021, 2022, 2023, 2024 جىلدارى كورسەتىلگەن قىزمەتتەردى قابىلداپ, تولەگەن;
- تالاپكەر سىلتەمە جاساعان دەنساۋلىق ساقتاۋ مينيسترلىگىنىڭ تۇسىندىرمەلەرى رەسمي نورماتيۆتىك ءتۇسىندىرۋ مارتەبەسىنە يە ەمەس.
«اتامەكەن» ۇلتتىق كاسىپكەرلەر پالاتاسىنىڭ (ۇقپ) ءباسپاسوز قىزمەتىنىڭ حابارلاۋىنشا, اپەللياتسيالىق القا ءبىرىنشى ينستانتسيا سوتىنىڭ قۇقىق نورمالارىن دۇرىس قولدانباعانىن جانە تالاپ قويۋ شەگىنەن شىعىپ كەتكەنىن انىقتادى. سوتتىڭ نەگىزگى تۇجىرىمى: قولدانىستاعى كەلىسىمشارت بولعان كەزدە داۋدى «نەگىزسىز بايىتۋ» رەتىندە قاراستىرۋعا بولمايدى. مۇنداي جاعدايلاردا تالاپكەر «نەگىزسىز بايىتۋ» ەمەس, زالالدى ءوندىرۋ تۋرالى تالاپ قويۋى ءتيىس.
وسىلايشا, سوت 16 ملن تەڭگەنى ءوندىرىپ الۋ ءۇشىن قۇقىقتىق نەگىز بولماعانىن مويىنداپ وتىر.
شقو كاسىپكەرلەر پالاتاسى اتاپ وتكەندەي, وبلىستىق سوتتىڭ بۇل شەشىمى ءمامس جۇيەسىندە جۇمىس ىستەيتىن بارلىق مەديتسينالىق ۇيىمدار ءۇشىن ماڭىزدى. ول كەلەسىلەردى راستايدى: كەلىسىمشارت تالاپتارىن ەكى تاراپتىڭ دا مىندەتتى تۇردە ساقتاۋى; قۇقىقتىق نەگىزسىز تالاپ قويۋعا جول بەرىلمەۋى; تاريفتىك ادىستەمەلەر مەن دەنساۋلىق ساقتاۋ مينيسترلىگىنىڭ نورماتيۆتىك اكتىلەرىن قاتاڭ ساقتاۋ قاجەتتىلىگى.
«مۇنداي داۋلار بيزنەستى بەلگىسىزدىك پەن قارجىلىق تاۋەكەل جاعدايىندا قالدىرماۋى ءتيىس. كاسىپكەرلەر مەملەكەتتىك تاپسىرىس جۇيەسىنىڭ اشىقتىعىنا جانە بولجامدىلىعىنا سەنىمدى بولۋى قاجەت», دەدى شقو كاسىپكەرلەر پالاتاسىنىڭ قۇقىقتىق ماسەلەلەر جونىندەگى ديرەكتوردىڭ ورىنباسارى ايجان جاڭگىرحانوۆا.
شىعىس قازاقستان وبلىسىنىڭ كاسىپكەرلەر پالاتاسى مەديتسينالىق ۇيىمداردىڭ وتىنىشتەرىن ءارى قاراي دا قارايدى جانە ءمامس سالاسىنداعى قۇقىق قولدانۋ پراكتيكاسىن باقىلاۋدى جالعاستىرادى. ۇقساس تالاپتارمەن بەتپە-بەت كەلگەن بارلىق كلينيكالار كەڭەس پەن قۇقىقتىق قولداۋ ءۇشىن پالاتاعا جۇگىنە الادى.
