سۋرەت جي كومەگىمەن جاسالدى
اتىراۋ وبلىستىق ءبىلىم بەرۋ باسقارماسى ءباسپاسوز قىزمەتىنىڭ مالىمەتىنە سۇيەنسەك, بەيبارىس اۋىلدىق وكرۋگىندە كەمىرگىشتەردىڭ (تىشقانداردىڭ) كوبەيگەنى انىقتالعان. وسىعان بايلانىستى ەپيدەميولوگيالىق احۋالدىڭ ناشارلاۋىنا جول بەرمەۋ, بالالاردىڭ دەنساۋلىعىن قورعاۋ ماقساتىندا بىرقاتار الدىن الۋ شاراسى قابىلدانعان.
«بەيبارىس اۋىلدىق وكرۋگىندەگى ەكى مەكتەپ پەن ەكى بالاباقشا بار. وقۋشىلار ءدارىس الاتىن مەكتەپتىڭ ءبىرى – ا.بايتۇرسىن ۇلى اتىنداعى ءبىلىم ورداسى, ەكىنشىسى – تالدىكول ورتا مەكتەبى. ەپيدەميالىق قاۋىپتىڭ الدىن الۋ ءۇشىن 19 قاراشادا اتالعان مەكتەپتەر ساباق ۋاقىتشا قاشىقتان وقۋ فورماتىنا اۋىستىرىلدى. دەزينفەكتسيالىق جۇمىستاردى تولىق ءارى ساپالى جۇرگىزۋ ءۇشىن «بالدىرعان جانە «بالاقاي» بالاباقشاسىنىڭ قىزمەتى ۋاقىتشا توقتاتىلدى», دەپ حابارلادى باسقارمانىڭ ءباسپاسوز قىزمەتى.
سۋرەت اتىراۋلىق جۋرناليست جانات جاقسىبايقىزىنىڭ الەۋمەتتىك پاراقشاسىنان الىندى
قازىر ارنايى مامانداندىرىلعان قىزمەتتەر تاراپىنان دەزينفەكتسيالاۋ, سانيتاريالىق باقىلاۋ جۇمىسىن جۇرگىزۋ قولعا الىندى. مەكتەپتەر مەن بالاباقشالاردا قاۋىپ تولىق جويىلعاننان كەيىن وقۋ-تاربيە پروتسەسى قالىپتى رەجيمگە اۋىستىرۋ كوزدەلىپ وتىر.
«وبلىستىق ءبىلىم بەرۋ باسقارماسى جاعدايدى تولىق باقىلاۋدا ۇستاپ وتىر. تۇرعىنداردى رەسمي اقپارات كوزىنە سەنۋگە شاقىرامىز», دەپ ءمالىم ەتتى باسقارمانىڭ ءباسپاسوز قىزمەتى.
