سۋرەت جي كومەگىمەن جاسالدى
«پاۆلودار وبلىسى پوليتسيا دەپارتامەنتىنىڭ كينولوگيالىق قىزمەت ورتالىعى قىلمىسقا قارسى كۇرەستە قىزمەتتىك-ىزدەستىرۋ يتتەرىن ساۋاتتى ءارى بارىنشا ءتيىمدى پايدالانۋدى ماقسات ەتكەن ءبىرتۇتاس تەتىك رەتىندە جۇمىس ىستەيدى. بۇگىندە ورتالىقتا پوليتسيادا 22 قىزمەتتىك يت بار. ولار نەمىس وۆچاركالارى, لابرادورلار, سپانيەلدەر, بەلگيالىق وۆچاركالار», دەپ حابارلايدى پاۆلودار وبلىسى پد كينولوگيالىق قىزمەت ورتالىعىنىڭ باستىعى نياز ۋاليەۆ.
قىزمەتتىك يتتەردىڭ كۇن ءتارتىبى ناقتى جوسپارلانعان. ءار تاڭ ۆەتەرينارلىق تەكسەرۋدەن باستالىپ, ودان ءارى باعىتتارى بويىنشا جاتتىعۋلارمەن جالعاسادى. كۇن سايىن پوليتسياعا ءتۇرلى شاقىرتۋلار ءتۇسىپ جاتادى.
قىزمەتكەرلەر وقيعا ورنىنا جەدەل تۇردە شىعادى. يتتەر دە ادامدار سەكىلدى سەزىنەدى, الاڭدايدى, سوندىقتان ولار ءوز قىزمەتتەرىن بارىنشا جاۋاپكەرشىلىكپەن اتقارۋعا تىرىسادى. ولار بارلىق كوماندالاردى مۇلتىكسىز ورىنداپ, ءتۇرلى جاعدايلاردا كومەككە كەلەدى: جوعالعان زاتتاردى ىزدەۋدەن باستاپ قىلمىسكەرلەردى ۇستاۋعا دەيىن.
«مۇنىڭ ارتىندا پوليتسيا قىزمەتىمەن ءومىرىن بايلانىستىرعان كاسىبي كينولوگتاردىڭ ۇزاق ءارى تىنىمسىز ەڭبەگى جاتىر. كينولوگتار ءۇشىن قىزمەتتىك يتتەر – ءوز بالاسىنداي. ولار كۇشىكتەردى كىشكەنتاي كۇنىنەن باستاپ تاربيەلەپ, باپتاپ, مەيىرىم مەن قامقورلىق تانىتادى. قىزمەتتىك يتتەردىڭ وتكىر ءيىس سەزىمىن جانە ادالدىعىن ەشبىر تەحنيكا الماستىرا المايدى», دەيدى ءتارتىپ ساقشىسى.
جىل باسىنان بەرى قىزمەتتىك يتتەر ارقىلى 150-دەن استام قىلمىس اشىلدى, ونىڭ ىشىندە 55-ءى ەسىرتكى قىلمىستارى بويىنشا. ماسەلەن, پوليتسيانىڭ بۋران اتتى ەرجۇرەك قىزمەتتىك يت پوليتسيادا 5 جىلدان بەرى قىزمەت اتقارىپ كەلەدى. ول ەسىرتكى زاتتارىن ىزدەۋ باعىتىندا ماماندانعان. ونىڭ كومەگىمەن ونداعان قىلمىس اشىلعان.
پاۆلودار قالاسىندا گەرينگ – ەلگينا كوشەلەرىنىڭ قيىلىسىندا پوليتسەيلەر تەكسەرۋ ماقساتىندا Nissan اۆتوكولىگىڭ توقتاتتى. جۇرگىزۋشىمەن اڭگىمەلەسۋ بارىسىندا «بوران» اتتى قىزمەتتىك يت مىنەز-قۇلقىمەن اۆتوكولىك سالونىندا كۇماندى زات بار ەكەنىن كورسەتتى. كولىكتىڭ ارتقى ورىندىعىنىڭ استىن تەكسەرۋ كەزىندە ءتارتىپ ساقشىلارى وسىمدىك تەكتەس سۇر-جاسىل ءتۇستى ەكى بريكەتتى انىقتادى.
