فوتولار: ۇلتتىق ۇلان
ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى گەنەرال-مايور اڭساعان بالتابەكوۆ ەلورداداعى 5573 اسكەري بولىمىندە جاڭارتىلعان ۇۇا وپەراتورلارىن دايارلاۋ سىنىبىمەن تانىسىپ, ونىڭ مۇمكىندىكتەرىنە جوعارى باعا بەردى.
زاماناۋي وقۋ سىنىبى مەرزىمدى اسكەري قىزمەتشىلەردى وقىتۋعا تولىق بەيىمدەلگەن. مۇندا ساربازدار درونداردىڭ قۇرىلىمىن, باسقارۋ ەرەجەلەرىن, تەحنيكالىق قىزمەت كورسەتۋ ءتارتىبىن جانە تاكتيكالىق قولدانۋ ەلەمەنتتەرىن مەڭگەرەدى. كۋرس جاۋىنگەرلىك ەسەپتى دايىنداۋعا باعىتتالعان, ونىڭ قۇرامىنا ەسەپ كومانديرى, FPV-درون وپەراتورى, وق-ءدارى جونىندەگى مامان جانە بارلاۋ وپەراتورى كىرەدى.
وقىتۋ جۇيەسى الدىمەن ءاربىر اسكەري قىزمەتشىگە ءوزىنىڭ ماماندىق باعىتى بويىنشا جەكە دايىندىقتان وتۋگە, كەيىن شىنايى جاعدايعا بارىنشا جاقىن توپتىق جاتتىعۋلارعا قاتىسۋعا مۇمكىندىك بەرەدى.
«قازىرگى ۋاقىتتا ۇۇا وپەراتورلارىن دايارلاۋ ساپالىق جاڭا دەڭگەيگە كوتەرىلىپ جاتىر. مۇندا پراكتيكالىق وقىتۋعا تولىق جاعداي جاسالعان. بىزگە ءدال وسىنداي جۇيەلى ءتاسىل قاجەت», دەدى گەنەرال-مايور اڭساعان بالتابەكوۆ.
اسكەري بولىمدەگى جۇمىس بارىسىن باعامداي وتىرىپ, باس قولباسشى الداعى مىندەتتەردى ايقىندادى: ماتەريالدىق-تەحنيكالىق بازانى ودان ءارى دامىتۋ, جەكە جوندەۋ شەبەرحاناسىن قۇرۋ, بىرىڭعاي وقۋ باعدارلاماسىن ازىرلەۋ جانە جىل بويى وقۋ پروتسەسىن جۇرگىزۋگە ارنالعان وقۋ قالاشىعىن جوبالاۋ.
بۇل وقۋ سىنىبىن ۇلگى رەتىندە الىپ, درون وپەراتورلارى بولىمشەلەرى قۇرىلاتىن باسقا اسكەري بولىمدەردە دە وسىنداي ورتالىقتار اشۋ ۇسىنىلدى.
وسىنداي وقۋ ورتاسىنىڭ قۇرىلۋى ءىىم ۇلتتىق ۇلانىنىڭ جاۋىنگەرلىك الەۋەتىن ارتتىرۋعا جانە اسكەري قىزمەتشىلەردى زاماناۋي باعىتتار بويىنشا دايارلاۋدى دامىتۋعا ماڭىزدى سەرپىن بەرەدى.
