قازاقستان ۇلى جەڭىس كۇنىن اتاپ وتۋدە

الماتى. 9 مامىر. بۇگىن – 9 مامىر جەڭىس كۇنى! بەرليننىڭ تۇبىندە فاشيستەردىڭ قارسىلىقسىز تىزە بۇككەنى تۋرالى اكتىگە 1945 جىلدىڭ 8 مامىرىندا تۇنگى ساعات 22:43-تە قول قويىلدى. ماسكەۋ ۋاقىتى بويىنشا بۇل ءسات – 9 مامىر 00:43 ەدى. ۋاقىت ايىرماشىلىعىنا بايلانىستى سول كۇننەن باستاپ جەڭىس مەرەكەسىن – ەۋروپا 8 مامىر, كەڭەس وداعى – 9 مامىر كۇنى اتاپ وتەتىن بولعان. بۇل تۋرالى egemen.kz حابارلادى. تاريح پەن ۋاقىت بەزبەنىنە سالىنعان بۇل سوعىس بۇگىنگە دەيىن ۇلى وتان سوعىسى دەگەن اتاۋعا يە. ونىڭ بولاشاقتا قالاي اتالۋى ادامدار مەن تاريحتىڭ ەنشىسىندە. دەگەنمەن, بۇل زۇلماتتىڭ ەكىنشى دۇنيەجۇزىلىك سوعىس دەگەن اتاۋىنا كوزىمىز دە, قۇلاعىمىز دا ۇيرەنىپ كەلەدى. سونىمەن, اتالعان سوعىس 1941 جىلدىڭ 22 ماۋسىمىندا باستالىپ, 1945 جىلدىڭ 9 مامىرىندا اياقتالدى. قازاقستاننان 1,5 ميلليونعا جۋىق ازامات مايدانعا اتتاندى. ونىڭ تەڭ جارىمى وتانىنا ورالمادى. ەلدىڭ 500-دەن استام ازاماتى كەڭەس وداعىنىڭ باتىرى اتاعىنا يە بولدى. جاھاندىق قانتوگىستە قازاقتىڭ ۇلەسى قانداي دەگەن ساۋالدىڭ جاۋابى دا دايىن! سوعىس باستالعان ساتتە قويشا قىرىلدى. كەڭەس اسكەر باسىلارىنىڭ اقىلىنىڭ جەتكەنى – قازاقتاردى اتقا مىنگىزىپ, اۋىر تانكىگە قارسى شاپتىردى! باۋداي ءتۇستى, قىرىلىپ قالدى. ماشۋكوۆا, رجەۆ, سمولەن سەكىلدى شايقاستاردا, قانشاما بوزداق سۇراۋسىز كەتتى, قۇربان بولدى. بىراق, قازاق سوعان قاراماستان, جانىن اياماي, وتانى ءۇشىن, بولاشاعى ءۇشىن شايقاستى. باۋىرجان, ءاليا مەن مانشۇك, تالعات, راحىمجان, قاسىم. تولىپ جاتقان ۇلت ماقتانىشتارىنىڭ ەسىمدەرى ۇلى وتان سوعىسىنىڭ تاريحىندا التىن ارىپتەرمەن جازىلدى. بۇگىن حالقىمىزدىڭ وسىنداي باتىر ۇل-قىزدارىنىڭ ەرلىگىن پاش ەتىپ, قايسارلىعىن ناسيحاتتار كۇن. سوعان بايلانىستى استانا, الماتى جانە قازاقستاننىڭ بارلىق قالالارى مەن اۋدان ورتالىقتارى ۇلى جەڭىسى مەرەكەسىن سالتاناتتى تۇردە اتاپ وتۋدە. تالعات ءسۇيىنباي. دەرەك: egemen.kz. سۋرەت: bnews.kz.