زەينەت جاسىنداعى ارداگەر ويىنشىلار ساپ تۇزەگەن ءتۋرنيردىڭ اشىلۋ سالتاناتىندا اۋداندىق «دەنە شىنىقتىرۋدى جانە سپورتتى دامىتۋ ورتالىعىنىڭ» ديرەكتورى گايدار مۇقانقوجاەۆ تالاي شاكىرتتى ءبىلىم نارىمەن سۋسىنداتقان كەڭەسبەك قارسىبەك ۇلىنىڭ قوعامدىق جۇمىستا اتقارعان ەڭبەكتەرىنە توقتالدى. سپورتتىق شاراعا مۇرىندىق بولعان باۋىرلارى مەن ۇرپاقتارىنا العىس ءبىلدىرىپ, قاتىسۋشى كوماندالارعا ساتتىلىك تىلەدى. ءوز كەزەگىندە العاباس ورتا مەكتەبىنىڭ ديرەكتورى ماقسات ماماەۆ تا ۇلاعاتتى ۇستازدىڭ ونەگەلى ءومىرى ۇرپاققا ونەگە ەكەنىن اتادى.
كەڭەسبەك قارسىبەك ۇلى ءبىلىم سالاسىندا ءۇزىلىسسىز 58 جىل ەڭبەك ەتىپ, ونىڭ 35 جىلىن مەكتەپ باسقارۋ سالاسىنا ارناعان. رەسپۋبليكالىق گازەت-جۋرنالداردا شتاتتان تىس ءتىلشى, ءفوتوتىلشى بولىپ, ەسىمى ەلگە تانىلعان. «لەنينشىل جاس», «قازاقستان مۇعالىمى», «قازاقستان مەكتەبى», «جەتىسۋ», «كوممۋنيزم نۇرى» سىندى گازەت-جۋرنالداردا 100-دەن اسا ماقالا مەن وچەركتەرى جاريالانعان. ونىڭ قالامىنان بالا تاربيەسى, اۋىل ءومىرى, ەڭبەك ادامدارىنىڭ كەلبەتى كورىنىس تاۋىپ, سان مىڭداعان وقىرماندارمەن قاۋىشتىرعان. قالامى قارىمدى ۇستاز قوعامداعى اسا ماڭىزدى تاقىرىپتاردى قامتىپ, قازاق باسپاسوزىندە كەلىستى وي-پىكىر قالىپتاستىردى.
جارىسقا قاتىسۋشى سپورتشىلار جەرەبە ارقىلى ەكى توپقا ءبولىنىپ, باق سىنادى. تۋرنير قورىتىندىسىندا 1-ورىندى كەگەن اۋىلىنىڭ سپورتشىلارى جەڭىپ السا, 2-ورىندى العاباستىڭ ارداگەرلەرى يەلەندى. ال جۇلدەلى 3-ورىن جىلىساي اۋىلىنىڭ كومانداسىنا بۇيىردى. كولباستاۋ اۋىلىنىڭ كومانداسى 4-ورىننان كورىندى. بۇدان بولەك, ۇزدىك ويىنشىلارعا دا قۇرمەت كورسەتىلىپ, ءتۇرلى ماراپات تارتۋ ەتىلدى.
جەڭىمپازدار مەن جۇلدەگەرلەردى ارداگەر-سپورتشى ەرتاي نارىنباەۆ پەن گايدار مۇقانقوجاەۆ قۇتتىقتاپ, «دەنە شىنىقتىرۋدى جانە سپورتتى دامىتۋ ورتالىعىنىڭ» ديپلومدارى, مەدالدارى مەن كۋبوكتارى جانە باعالى سىيلىقتارمەن ماراپاتتادى. ۇلاعاتتى ۇستازدىڭ ۇرپاقتارى تالعات كەڭەسبەك ۇلى اۋلەت اتىنان جارىسقا قاتىسقان سپورتشىلار مەن قوناقتارعا العىسىن ءبىلدىردى.
الماتى وبلىسى
