ءبىر كۇندە 45 جۇرگىزۋشى جول ەرجەسىن بۇزدى

وبلىس ورتالىعىندا جولاۋشىلاردى تاسىمالدايتىن اۆتوبۋستاردى تەكسەرۋ ماقساتىندا كولىك باقىلاۋ دەپارتامەنتىنىڭ اۋماقتىق بولىمشەلەرى جانە قوعامدىق باقىلاۋ وكىلدەرىنىڭ قاتىسۋىمەن جول ەرەجەلەرىن ساقتاۋدىڭ «اۆتوبۋس» اتتى الدىن الۋ شاراسى ءوتتى. ەستاي كوشەسى بويىمەن جۇرەتىن №152, 151, 157,115, 3 شاعىن كولىك اۆتوبۋستارى وتە تار, ال جولاۋشى كوپ. شاعىن اۆتوبۋستاردىڭ كوبى ەسكى. كەيبىرى ءتىپتى, ابدەن توزسا دا, ادام تاسىمالداۋعا شىعادى. جۇرگىزۋشىلەردىڭ دەنساۋلىعى دا, تارتىپتەرى دە كۇمان كەلتىرەدى. اسىعىس كەلىپ توقتايدى, القىن-جۇلقىن الا جونەلەدى. شاعىن اۆتوبۋستار تالاپقا ساي ەمەس. سوندىقتان, پوليتسەيلەر اۆتوبۋس جۇرگىزۋشىلەرىن ءبىر كۇندىك رەيد, باقىلاۋدان سوڭ بۇرىنعى «ادەتتەرىنە» قايتا باسپايتىنداي قاتاڭ تالاپ قويا بىلۋلەرى قاجەت. اي سايىن «اۆتوبۋس» شاراسى ءوتىپ تۇرسا جۇرگىزۋشىلەر دە تارتىپكە ۇيرەنەر ەدى. بۇل اۆتوبۋستا جۇرەتىن تۇرعىندار ءۇشىن قاۋىپسىز بولار ەدى. وبلىستىق ىشكى ىستەر باسقارماسىنىڭ حابارىنا قاراعاندا, قابىلدانعان شارالار ناتيجەسىندە ءبىر كۇن ىشىندە جول-پاترۋلدىك پوليتسيا قىزمەتكەرلەرى جول ءجۇرۋ ەرەجەسىن بۇزعان 45 اۆتوبۋس جۇرگىزۋشىسىن توقتاتقان, ياعني, ونىڭ 4-ءۋى جولاۋشىلاردى تاسىمالداۋ ەرەجەسىن ساقتاماعان, 11-ءى ۇيالى تەلەفون قولدانعان, 2-ءۋى جىلدامدىقتى كوبەيتكەن كورىنەدى. ءبىر كۇن ىشىندە ەمەس-اق, ءبىر ساعاتتىڭ ىشىندە جول ەرەجەسى ءتارتىبىن بۇزۋشىلار قاراسى كوبەيۋدە. سونداي-اق, «اۆتوبۋس» جول ەرەجەسىن بۇزباۋدىڭ الدىن الۋ شاراسى كەزىندە «فولكسۆاگەن كاسپەر» ماركالى شاعىن اۆتوبۋس جۇرگىزۋشىسى ۇستالىپ, وعان اكىمشىلىك حاتتاما تولتىرىلدى. فاريدا بىقاي, «ەگەمەن قازاقستان». پاۆلودار.