فوتو: اشىق دەرەككوز
ۇلتتىق ەكونوميكا ءمينيسترى سەرىك جۇمانعارين ۇكىمەت وتىرىسىندا «بايتەرەك» حولدينگىنىڭ ءرولىن كۇشەيتۋ جوسپارلارى تۋرالى حابارلادى. ونىڭ ايتۋىنشا, حولدينگتىڭ نەگىزگى قىزمەتى ءبولۋ قىزمەتىنەن ستراتەگيالىق ينۆەستيتسيالىق جوبالاردى ىسكە اسىرۋعا باعىتتالادى.
قازىر «بايتەرەك» ەلدىڭ ينۆەستيتسيالىق حولدينگىنە اينالىپ, 15-20 جۇيە قۇراۋشى جوبانى جۇزەگە اسىرۋعا شوعىرلانباق.
قارجىلاندىرۋدىڭ باسىم باعىتتارى رەتىندە تاۋ-مەتاللۋرگيا, ماشينا جاساۋ, ەنەرگەتيكا, ينفراقۇرىلىم, تۋريزم, اگروونەركاسىپتىك كەشەن, تاماق ونەركاسىبى, حيميا, مۇناي-گاز حيمياسى, اگروحيميا جانە قۇرىلىس ماتەريالدارىن ءوندىرۋ كورسەتىلدى.
«ۇكىمەت رەسپۋبليكالىق بيۋدجەت پارامەترلەرىنە سايكەس 2026 جىلى «بايتەرەك» اق-عا 1 ترلن تەڭگەگە دەيىن قاراجات ءبولۋدى جالعاستىرادى. بۇدان كەيىن قارجىلاندىرۋدىڭ نەگىزگى كوزى رەتىندە ەكىنشى دەڭگەيدەگى بانكتەردىڭ رەسۋرستارى تارتىلادى», دەدى سەرىك جۇمانعارين.
