فوتو: pinterest.com
كۇنى كەشە قالا اكىمى دارحان ساتىبالدى «الماتى–1» ۆوكزالىنداعى قايتا جاڭعىرتۋ جۇمىستارىن بارىپ كوردى. 1974 جىلى سالىنعان تاريحي نىساننىڭ باستاپقى ساۋلەتتىك بولمىسىن بۇزباي جۇزەگە اسىرىلىپ جاتقان جوندەۋ بارىسى تۋرالى اقپارات بەرىلدى.
اكىمدىك بەرگەن دەرەككە قاراعاندا, ۆوكزال كەشەنىندە ۆيزيت-ورتالىق, مۋزەي كەڭىستىگى جانە شاعىن دەمالىس كاپسۋلالارى بار قوناقۇي اشۋ كوزدەلىپ وتىر.
دارحان ساتىبالدى جوبانىڭ قالا تۇرعىندارى مەن جولاۋشىلار ءۇشىن بارىنشا قولايلى ءارى قاۋىپسىز بولۋى كەرەكتىگىن ايتتى. سونداي-اق مەردىگەرلەرگە جۇمىس ساپاسى مەن بەلگىلەنگەن مەرزىمگە ەرەكشە جاۋاپكەرشىلىكپەن قاراۋ كەرەكتىگىن ەسكەرتتى.
ايتا كەتەيىك, جۋىردا ۇكىمەت وتىرىسىندا ەلدەگى بىرقاتار ۆوكزالدىڭ جاعدايى سىنعا الىنعان ەدى. سول جيىندا كولىك ۆيتسە-ءمينيسترى الماتى–1 ۆوكزالىنداعى جوندەۋ جۇمىستارى نەبارى 5 پايىز عانا ورىندالعانىن جەتكىزگەن. پرەمەر-مينيستر ولجاس بەكتەنوۆ بۇل جاعدايدى «اكىمدىك تاراپىنداعى سالعىرتتىق» دەپ باعالاپ, ءبىرىنشى باسشىلاردىڭ جەكە جاۋاپتى بولاتىنىن اتاپ وتكەن.
2025 جىلدىڭ جازىندا الماتى–1 جانە الماتى–2 ۆوكزالدارى «قازاقستان تەمىر جولى» كومپانياسىنىڭ باسقارۋىنا بەرىلگەن بولاتىن. ۇلتتىق كومپانيا سول كەزدە ەكى نىساندى دا كەشەندى تۇردە جاڭارتۋ جوسپارىن جاريالاعان.
