ەلباسى جوعارى ەۋرازيالىق ەكونوميكالىق كەڭەستىڭ وتىرىسىنا قاتىستى

استانا. 9 مامىر. ەلباسى جوعارى ەۋرازيالىق ەكونوميكالىق كەڭەستىڭ وتىرىسىنا قاتىستى. بۇل تۋرالى akorda.kz حابارلادى. كەزدەسۋگە پرەزيدەنتتەر – قازاقستاننان – نۇرسۇلتان نازارباەۆ, ارمەنيادان – سەرج سارگسيان, بەلارۋس رەسپۋبليكاسىنان – الەكساندر لۋكاشەنكو, قىرعىزستاننان – المازبەك اتامباەۆ, رەسەي فەدەراتسياسىنان ۆلاديمير پۋتين, سونداي-اق, ەۋرازيالىق ەكونوميكالىق كوميسسيا القاسىنىڭ توراعاسى ۆ.حريستەنكو قاتىستى. مەملەكەت باسشىلارى ەۋرازيالىق ەكونوميكالىق وداق قىزمەتىنىڭ قازىرگى ماسەلەلەرىن, ۇيىم اياسىنداعى سەرىكتەستىكتى تەرەڭدەتۋ مەن حالىقارالىق ىنتىماقتاستىق اياسىن كەڭەيتۋ كەلەشەگىن, سونداي-اق, قىرعىزستاننىڭ وداققا قوسىلۋ ۇدەرىسىن تالقىلادى. وتىرىسقا قاتىسۋشىلارعا ارناعان سوزىندە نۇرسۇلتان نازارباەۆ ەۋرازيالىق ەكونوميكالىق وداق قۇرۋ تۋرالى شارتقا قول قويىلعانىنا ءبىر جىل تولعاندا ءوتىپ وتىرعان كەزدەسۋدىڭ ايرىقشا سيپاتىن اتاپ ايتتى. «مۇددەلەر تەڭدىگى, پراگماتيزم جانە كەزەڭدىلىك قاعيداتتارىنا نەگىزدەلگەن ينتەگراتسيالىق بىرلەستىك ءبىزدىڭ مەملەكەتتەرىمىزدى جانە ەكونوميكالارىمىزدى الەمدىك داعدارىستىڭ كۇردەلى جاعدايىندا نىعايتۋعا قابىلەتتى ەكەنىنە سەنىمدىمىن. ەۋرازيالىق ەكونوميكالىق وداق جۇمىسى تۇبەگەيلى باستالعالى بەرى ءبىزدىڭ قاتارىمىز ارمەنيا جانە قىرعىزستاننىڭ قوسىلۋى ارقىلى تولىقتى. بىرلەسكەن ىنتىماقتاستىق بولاشاقتا ەلدەرىمىزدىڭ بايلانىسىن نىعايتىپ, ەۋرازيالىق وداقتىڭ دامۋىنا تىڭ سەرپىن بەرەرى انىق», – دەدى قازاقستان پرەزيدەنتى. مەملەكەت باسشىسى حالىقارالىق قوعامداستىقتىڭ بۇل ەكونوميكالىق بىرلەستىككە قىزىعۋشىلىعى ارتىپ كەلە جاتقانىنا توقتالدى. «بۇگىندە بىرقاتار مەملەكەتتەر بىزگە ساۋدا-ەكونوميكالىق قاتىناستار ورناتۋ, ەركىن ساۋدا ۇسىنىسىمەن شىعۋدا. ماسەلەن, ۇكىمەتارالىق كەڭەس وتىرىسىنىڭ اياسىندا ەۋرازيالىق ەكونوميكالىق وداق پەن ۆەتنام اراسىندا ەركىن ساۋدا ايماعى تۋرالى ءبىرىنشى كەلىسىمگە قول قويۋ جوسپارلانىپ وتىر. كەلىسىم جوباسى قازىر مەملەكەتىشىلىك ۇدەرىستە قاراستىرىلىپ جاتىر. سونداي-اق, بۇگىندە قىتاي حالىق رەسپۋبليكاسىمەن سەرىكتەستىك جانە ىنتىماقتاستىق تۋرالى كەلىسىم جاساۋ جونىندەگى كەلىسسوزدەردى باستاۋ ماسەلەسى كۇن تارتىبىندە تۇر. تۇركيا, يران, ءۇندىستان, موڭعوليا, ازەربايجان وسى كەزەڭدەگى كەلەسى الەۋەتتى سەرىكتەستەر بولا الار ەدى,, – دەدى نۇرسۇلتان نازارباەۆ. قازاقستان پرەزيدەنتى قابىلدانعان شەشىمدەردى جۇزەگە اسىرۋ جۇمىسى ۇكىمەت تاراپىنان دا, كوميسسيا تاراپىنان دا جۇيەلى جانە ءبىرىزدى ىڭعايدان كەلۋدى تالاپ ەتەتىنىنە نازار اۋداردى. «بارلىق ۋاعدالاستىقتاردى كەزەڭ-كەزەڭمەن ىسكە اسىرۋ مەرزىمدەرىن ءبىز ايقىنداپ الدىق. ۇيىمىمىز بىرتىندەپ بارىنشا ءتيىمدى سيپات الىپ كەلەدى, قاجەتتى شارتتىق بازا قالىپتاسۋدا. ونىڭ ورنىقتى دامۋى وسىعان نەگىزدەلەدى», – دەدى مەملەكەت باسشىسى. نۇرسۇلتان نازارباەۆ الەمدەگى كۇردەلى ەكونوميكالىق جاعدايعا قاراماستان, ەۋرازيالىق ەكونوميكالىق وداق وزىنە مۇشە ەلدەردىڭ بارلىعىنىڭ يگىلىگى جولىندا بۇدان ءارى دامۋ ءۇشىن زور الەۋەتكە يە ەكەنىنە سەنىم ءبىلدىردى. «قازىر, داعدارىس پەن باتىستىڭ سانكتسيالىق ساياساتى جاعدايىندا تاۋار اينالىمىنىڭ تومەندەۋى بايقالادى. بىراق ءبىزدىڭ قارىم-قاتىناسىمىزدىڭ جالپى جاعدايى سونداي – كاسىپورىندار مەن تاۋارلاردىڭ اۋىسۋى, بىرلەسكەن كاسىپورىنداردىڭ قۇرىلۋى ۇدەرىسى ءجۇرىپ جاتىر. ءبىز دۇرىس جولدا كەلەمىز دەپ سانايمىن. قازاقستان ەلدەرىمىزدىڭ اراسىنداعى ساۋدا-ەكونوميكالىق ىنتىماقتاستىقتىڭ وراسان الەۋەتىنە يە ەۋرازيالىق ەكونوميكالىق وداق جۇمىسىنا اسا زور ماڭىز بەرىپ كەلدى جانە سولاي بولا دا بەرەدى. ءبىز ءوزارا ءتيىمدى قۇجاتتاردى ازىرلەۋ مەن قابىلداۋ ءۇشىن قاجەتتى كۇش-جىگەردى جۇمىلدىراتىن بولامىز», – دەدى قازاقستان پرەزيدەنتى. وتىرىس بارىسىندا مەملەكەتارالىق ىنتىماقتاستىقتى ءتۇرلى سالالاردا ودان ءارى دامىتۋعا باعىتتالعان بىرقاتار قۇجاتتارعا قول قويىلدى. ەلامان قوڭىر. دەرەك, سۋرەت: akorda.kz.