فوتو: ۆيدەودان الىنعان كادر
ساعات شامامەن 17:30-دا مۋزەيگە كىرگەن بلوگەرلەر تەكسەرىستەن ەش قيىندىقسىز ءوتۋ ءۇشىن الدىن الا ايلا ويلاپ تاپقان. ولار Lego بولشەكتەرىنەن قۇراستىرىلعان, وڭاي شەشىلەتىن جانە قايتا جينالاتىن رامكا جاساعان.
«قاۋىپسىزدىك قاتاڭ بولاتىنىن بىلدىك, سوندىقتان Lego رامكاسىن قولداندىق. بارلىق بولشەكتەردى دۇكەن پاكەتىنە سالىپ وتتىك», دەيدى سەننە.
ناتيجەسىندە, جوسپار ويداعىداي ورىندالىپ, ولار تاڭداعان جەرىنە كارتينانى ءىلىپ, سۋرەتكە ءتۇسىپ كەتىپ قالعان.
مۋزەي اكىمشىلىگى BFMTV-گە بەرگەن جاۋابىندا بلوگەرلەردىڭ الىپ جۇرگەن زاتتارى لۋۆر ەرەجەلەرىنە قايشى كەلمەيتىنىن, سوندىقتان ولاردى كىرگىزۋگە تىيىم سالۋ مۇمكىن بولماعانىن ايتتى.
«ولار رامكانى جيناپ, قاۋىپسىزدىك تەكسەرىسىنەن وتكەننەن كەيىن ورناتقان. الدىمەن مونا ليزا قاسىنا ىلۋگە تىرىسقان, بىراق بەينەباقىلاۋدى كورىپ, زالداعى بوس جەرگە بىرنەشە سەكۋند ىشىندە بەكىتىپ كەتكەن», دەپ حابارلايدى مۋزەي باسشىلىعى.
مۋزەي قىزمەتكەرلەرى پورترەتتى ءۇش مينۋتقا جەتپەي تاۋىپ, الىپ تاستاعان. زالعا ەشقانداي زيان كەلمەگەنىمەن, لۋۆر بۇل وقيعاعا قاتىستى شاعىم ءتۇسىرۋ مۇمكىندىگىن قاراستىرىپ جاتىر. لۋۆردا ءبىر اي بۇرىن ورىن العان ۇرلىق دەرەگىنەن كەيىن, بۇل پرانك مۋزەيدىڭ قاۋىپسىزدىك جۇيەسىنە قاتىستى الاڭداۋشىلىق تۋدىردى.
6 قاراشادا فرانتسيانىڭ ەسەپ پالاتاسى جاريالاعان ەسەپتە لۋۆرداعى بەينەباقىلاۋدىڭ ازدىعى مەن قاۋىپسىزدىك جۇيەسىن جاڭارتۋداعى كىدىرىستەر سىنعا الىنعان.
«مۋزەي كوزگە كورىنەتىن جوبالارعا باسىمدىق بەرىپ, عيماراتتار مەن تەحنيكالىق ينفراقۇرىلىمدى, سونىڭ ىشىندە قاۋىپسىزدىك جۇيەلەرىن جاڭارتۋدى كەيىنگە قالدىردى», دەلىنگەن ەسەپتە.
