ءبىرىنشى كەزەكتە مامانداندىرىلعان قالالىق بالالار كلينيكالىق ينفەكتسيالىق اۋرۋحاناسىندا (قبكيا) بالالارعا تاۋلىك بويى كومەك كورسەتىلە باستادى. اۋرۋحانا نەگىزگى كورپۋس پەن ەكى فيليالدان تۇرادى. ۇيىم 18 جاسقا دەيىنگى بالالارعا ينفەكتسيالىق اۋرۋلار بويىنشا شۇعىل تۇردە, تەگىن مەديتسينالىق كومەكتىڭ كەپىلدىك بەرىلگەن كولەمى (تمككك) اياسىندا قىزمەت كورسەتەدى.
«بالالارعا جرۆي مەن تۇماۋعا قارسى ەم جۇرگىزۋ ءۇشىن ينفەكتسيالىق اۋرۋحانادا 536 توسەككە ارنالعان 14 بولىمشە اشىلعان, ولاردىڭ ىشىندە 48 رەانيماتسيالىق توسەك بار. سوڭعى اپتاداعى توسەك قورىنا تۇسكەن جۇكتەمە شامامەن 51% بولدى. قاجەت بولعان جاعدايدا ەپيدەميولوگيالىق جاعدايعا بايلانىستى قوسىمشا قورداعى 92 توسەك-ورىن قوسىلۋى مۇمكىن», دەيدى الماتى قالاسى قوعامدىق دەنساۋلىق باسقارماسى باسشىسىنىڭ ورىنباسارى ءلايلا يمانعاليەۆا.
ستاتسيونارلىق جۇكتەمە بويىنشا بالالار اراسىندا العاشقى ورىندا تۇماۋ مەن جرۆي, ودان كەيىن پنەۆمونيا تۇر. قبكيا ستاتسيونارلارىندا جرۆي جانە تۇماۋمەن 274 بالا ەمدەلىپ جاتىر, ولاردىڭ 139-ىنا پنەۆمونيا دياگنوزى قويىلعان. اۋرۋحانادا ينفەكتسيالاردى جەدەل انىقتاۋعا مۇمكىندىك بەرەتىن زەرتحانا بار.
س.جەكەنوۆا اتىنداعى قالالىق كلينيكالىق ينفەكتسيالىق اۋرۋحانادا ەرەسەك تۇرعىندارعا مەديتسينالىق كومەك كورسەتىلەدى. مۇندا جرۆي جانە تۇماۋمەن اۋىراتىندارعا ارنالعان 280 توسەگى بار 5 بولىمشە جۇمىس ىستەيدى, ونىڭ ىشىندە 9 توسەك – رەانيماتسيادا. قاجەت بولعان جاعدايدا قوسىمشا 100 توسەك اشىلۋى مۇمكىن. 2025 جىلدىڭ 17 قاراشاسىنداعى جاعداي بويىنشا ستاتسيوناردا 203 جرۆي دياگنوزى بار ناۋقاسقا قوسا, پنەۆمونيادان 6 ەرەسەك ادام ەم قابىلداپ جاتىر.
ال №4 قالالىق پەرزەنتحانادا جۇكتى ايەلدەرگە مامانداندىرىلعان كومەك كورسەتىلەدى. جۇكتىلىگى 28 اپتادان اسقان ايەلدەرگە جرۆي مەن تۇماۋعا قارسى ەم جۇرگىزۋگە ارنالعان 70 توسەك اشىلعان, ولاردىڭ ىشىندە 6 رەانيماتسيالىق توسەك بار. ەپيدەميولوگيالىق جاعدايدىڭ وزگەرۋىنە قاراي قوسىمشا 10 رەزەرۆتىك توسەك اشۋعا مۇمكىندىك بار.
قوعامدىق دەنساۋلىق ساقتاۋ باسقارماسى توسەك-ورىن قورىن باقىلاپ وتىرادى. ينفەكتسيالىق ستاتسيونارلاردا رەزەرۆتىك توسەك قورى قاراستىرىلعان. قاجەت بولعان جاعدايدا توسەك سانىن جەدەل ارتتىرۋعا بولادى. مەديتسينالىق ۇيىمدار توسەك قورىن قايتا بەيىمدەۋ, ەم الۋشىلاردى باعىتتاۋ جوسپارلارىن ازىرلەگەن, بۇل ەپيدەميولوگيالىق جاعدايدا جەدەل ارەكەت ەتىپ مۇمكىندىك بەرەدى.
«ەمحانالاردا ەمدەلۋشىلەرگە جرۆي مەن تۇماۋعا «فيلتر-كابينەتتەر» ارقىلى كومەك كورسەتىلەدى. وندا ينفەكتسيا بەلگىلەرى بار ادامداردى قابىلداپ, اۋرۋدىڭ تارالۋ قاۋپىن ازايتادى. سونداي-اق ۇيگە شىعاتىن ءموبيلدى بريگادالار جۇمىس ىستەيدى. باستاپقى مەديتسينالىق سانيتارلىق كومەك جۇيەسى ماۋسىمدىق سىرقاتتانۋدىڭ ءوسۋ كەزەڭىندە كۇشەيتىلگەن باقىلاۋمەن جوسپارلى رەجيمدە قىزمەت اتقارادى», دەدى سپيكەر.
جۇكتى ايەلدەر مەن ءبىر جاسقا دەيىنگى بالالارعا ەرەكشە كوڭىل بولىنەدى. بۇل ساناتتاعى ناۋقاستار ۇيگە شاقىرتقاندا ءبىرىنشى كەزەكتە قابىلداپ, تۇراقتى پاتروناج جانە قاجەت بولعان جاعدايدا ۋاقتىلى شارالار ۇسىنىلادى.
