فوتو: اشىق دەرەككوز
ءورت ءسوندىرۋ بريگاداسى كەلگەندە, ءۇيدىڭ تولىعىمەن جالىنعا ورانعانى انىقتالدى. قىزىل جالىن 360 شارشى مەتردى شارپىعان.
قۇتقارۋشىلاردىڭ ايتۋىنشا, ءورتتى ءسوندىرۋ كەزىندە ۇيدەن ەس-ءتۇسسىز ءۇش ادام ەۆاكۋاتسيالانىپ, جەدەل جاردەم بريگاداسىنا تاپسىرىلدى. ىشىنەن توعىز بالانى قوسا العاندا, ون ەكى ءمايىت تابىلدى.
قازىرگى تاڭدا ءورتتىڭ سەبەبىن انىقتاۋ ءۇشىن تەرگەۋ جۇمىستارى باستالىپ, قىلمىستىق ءىس قوزعالدى.
قايعىلى وقيعاعا قاتىستى بالا قۇقىقتارى جونىندەگى ۋاكىل دينارا زاكيەۆا الەۋمەتتىك جەلىدەگى پاراقشاسىندا قازا بولعانداردىڭ وتباسىنا كوڭىل ايتتى.
«تۇركىستان وبلىسى جەتىسۋ اۋدانى العاباس اۋىلىندا ءورت سالدارىنان 9 بالا قازا بولدى. اتالعان ۇيدە ەكى وتباسى, اتا-انالارى مەن بالالارى تۇرعان. ۇيدەن ءورت شىعىپ, شاتىرى وپىرىلىپ تۇسكەن. وڭىرلىك ۋاكىل پسيحولوگيالىق قولداۋ ورتالىعى ماماندارىمەن بىرگە وقيعا ورنىنا شىقتى. ءورتتىڭ شىعۋ سەبەبى مەن ءمان-جايى تەرگەلىپ جاتىر. قازا بولعانداردىڭ تۋىستارىنا كوڭىل ايتامىز», دەپ جازدى زاكيەۆا.
بۇعان دەيىن, مەملەكەت باسشىسى جەكە ۇيدە بولعان ءورتتىڭ سالدارىنان كوپتەگەن ادامنىڭ قازا تابۋىنا بايلانىستى كوڭىل ايتقان ەدى.
