فوتو: invest.gov.kz
بۇل تۋرالى invest.gov.kz سايتىنىڭ مالىمدەۋىنشە, جوبا «GES مىرزاتاي» جشس كومپانياسىمەن 60 ملن اقش دوللارى كولەمىندەگى ينۆەستيتسيالار ەسەبىنەن جۇزەگە اسىرىلىپ جاتىر. ىسكە اسىرۋ ەكى كەزەڭگە بولىنگەن: العاشقى كەزەڭدە قۋاتى 50 مۆت ستانتسيا سالىنادى, ال ەكىنشى كەزەڭدە قۋات 150 مۆت-قا دەيىن ۇلعايىپ, جالپى ءوندىرىس كولەمى 200 مۆت-قا جەتەدى.
جوبا جەتەكشىسى حوۋ چۋانتسۋن اتاپ وتكەندەي, بارلىق دايىندىق جۇمىستارى اياقتالدى – 7 گەكتار جەر تەلىمى راسىمدەلدى, ينجەنەرلىك جانە گيدروگەولوگيالىق زەرتتەۋلەر جۇرگىزىلدى, 185 مەتر تەرەڭدىكتەگى ۇڭعىما بۇرعىلاندى, باس مەردىگەر انىقتالدى جانە گازبەن قامتۋعا قوسىلۋ بويىنشا تەحنيكالىق شارتتار الىندى.
قۇرىلىس كەزەڭىندە شامامەن 500 مامان جۇمىس ىستەيدى, ال ستانتسيا پايدالانۋعا بەرىلگەننەن كەيىن 80 تۇراقتى جۇمىس ورنى اشىلادى.
قازىرگى ۋاقىتتا جامبىل وبلىسىندا جالپى قۋاتى 1 721,3 مۆت بولاتىن 24 ەنەرگەتيكالىق نىسان جۇمىس ىستەيدى, ولاردىڭ ىشىندەگى ەڭ ءىرىسى – جامبىل گرەس (1 107 مۆت). 2025 جىلدىڭ 10 ايىنىڭ قورىتىندىسى بويىنشا وبلىستا 3,6 ملرد كۆت·ساع ەلەكتر ەنەرگياسى ءوندىرىلدى, بۇل وتكەن جىلدىڭ سايكەس كەزەڭىمەن سالىستىرعاندا 21%-عا جوعارى.
«GES مىرزاتاي» جوباسى ءوڭىردىڭ ەنەرگەتيكالىق ينفراقۇرىلىمىن دامىتۋعا ماڭىزدى ۇلەس قوسىپ, وڭتۇستىك ايماقتاردىڭ ەنەرگەتيكالىق تۇراقتىلىعىن ارتتىرادى جانە جامبىل وبلىسىنداعى ينۆەستيتسيالىق بەلسەندىلىكتىڭ ودان ءارى وسۋىنە ىقپال ەتەدى.
