ۇلتتىق عىلىمي ونكولوگيا ورتالىعى – رادياتسيالىق ونكولوگيا بويىنشا ەلدەگى جەتەكشى ورتالىق. مۇندا جىل سايىن 12 مىڭعا جۋىق دياگنوستيكالىق زەرتتەۋ مەن كۇردەلى وپەراتسيا, 4 مىڭعا دەيىن ساۋلەلىك ءارى پروتوندىق تەراپيا كۋرسى, 330-عا دەيىن اعزا مەن سۇيەك كەمىگىن ترانسپلانتاتسيالاۋ جاسالادى.
پاتسيەنتتەرگە كورسەتىلەتىن بارلىق ونكولوگيالىق كومەك تمككك پەن ءمامس اياسىندا تولىعىمەن تەگىن. مەملەكەت ونكولوگيالىق قىزمەتتى قارجىلاندىرۋدى ءۇش جىلدا 6 ەسە ۇلعايتقان. جىل سايىن بۇل ماقساتقا 170 ملرد تەڭگەدەن استام قاراجات بولىنەدى.
ورتالىققا «اەحا-نىڭ زاكىرلىك ورتالىعى» مارتەبەسىن بەرۋ جۇمىستارى ءجۇرىپ جاتىر. بۇل ەلىمىزدى ورتالىق ازياداعى يادرولىق مەديتسينا مەن رادياتسيالىق ونكولوگيانىڭ ايماقتىق حابى رەتىندە تانىتۋعا مۇمكىندىك بەرەدى.
رادياتسيالىق تەحنولوگيالار ورتالىعىندا راديوفارمپرەپاراتتاردىڭ تولىق ءوندىرىس تسيكلى جولعا قويىلىپ جاتىر. قازىردىڭ وزىندە پەت/كت مەن ەلدە العاش ەنگىزىلەتىن پەت/مرت ءۇشىن قاجەت 18F-FDG ءوندىرىسى ىسكە قوسىلعان. جاقىن ارادا تاعى 13 پرەپارات شىعارۋ جوسپارلانعان, ونىڭ ءبىر بولىگى ەلىمىزدە العاش رەت سينتەزدەلمەك. ءوندىرىستىڭ ارقاسىندا جىلىنا 12 مىڭعا دەيىن زەرتتەۋ جۇرگىزۋ مۇمكىن بولادى.
راديونۋكليدتىك تەراپيا بولىمشەسىندە قالقانشا بەزى ىسىگىن ەمدەۋگە ارنالعان يود-131 قولدانىلادى. مۇندا جىلىنا 300-دەن استام پاتسيەنت ەم قابىلداي الادى. دەنساۋلىق ساقتاۋ مينيسترلىگى ەلىمىزدە راديوفارمپرەپاراتپەن ەم الۋدى قولجەتىمدى ەتۋ ءۇشىن استانا, الماتى, شىمكەنت, سەمەي, قاراعاندى مەن اقتوبەدە قوسىمشا بولىمشەلەر اشۋدى جوسپارلاپ وتىر.
ۇعوو ەلىمىزدە العاشقىلاردىڭ ءبىرى بولىپ ساۋلەلىك تەراپيادا جاساندى ينتەللەكت (جي) جۇيەلەرىن ەنگىزۋدە. «Varian» كومپانياسىنىڭ EDGE مەن ETHOS جۇيەلەرى ساۋ تىندەرگە اسەردى ازايتا وتىرىپ, ىسىك ايماعىن جوعارى دالدىكپەن نىقتايدى.
پروتوندىق تەراپيا ورتالىعى – ورتالىق ازيادا بالاماسى جوق نىسان. ProBeam 360 جۇيەسىمەن جابدىقتالعان ورتالىق بالالارداعى كۇردەلى ىسىك تۇرلەرىن ەمدەۋگە وتە قولايلى. جىلىنا 1 مىڭ پاتسيەنتكە دەيىن قابىلداي الادى. ەكى كت-سيمۋلياتور مەن العاش رەت ورناتىلعان مرت-سيمۋلياتور ارقىلى جوعارى دالدىكتى قامتاماسىز ەتەدى. بۇل ورتالىق مەديتسينالىق ءتۋريزمدى دە دامىتۋعا جول اشادى.
پرەمەر-مينيستر نازارباەۆ ۋنيۆەرسيتەتىندەگى جاڭا بيومەديتسينالىق زەرتتەۋ ورتالىعىنىڭ جۇمىسىنا دا باعا بەردى. 5,6 مىڭ شارشى مەتر اۋماقتا گەنوميكا, مولەكۋليارلىق بيولوگيا, تىندىك ينجەنەريا, رەگەنەراتيۆتى ءارى ترانسلياتسيالىق مەديتسينا باعىتتارىندا زەرتتەۋلەر جۇرگىزىلىپ جاتىر.
ورتالىقتىڭ باستى ەرەكشەلىگى – حالىقارالىق بيوقاۋىپسىزدىك ستاندارتتارىنا ساي جابدىقتالعان ۆيۆاري. ول AAALAC International اككرەديتاتسياسىن الۋعا دايىندالىپ جاتىر. بۇل وتاندىق عالىمدارعا ءدارى-دارمەك ازىرلەۋدىڭ جاڭا دەڭگەيىنە شىعۋعا مۇمكىندىك بەرەدى.
ۇكىمەت باسشىسىنا NU ەكوجۇيەسىندە ازىرلەنگەن بىرنەشە يننوۆاتسيالىق جوبا تانىستىرىلدى. ALEM قۇرىلعىسى – دونورلىق ورگانداردى ۇزاق ۋاقىت ساقتاۋعا ءارى تاسىمالداۋعا مۇمكىندىك بەرەتىن وتاندىق تەحنولوگيا, وڭىرلىك فارماتسەۆتيكالىق ورتالىق قۇرۋ جوسپارى – جاڭا پرەپاراتتاردى كلينيكاعا دەيىنگى سىناقتان وتكىزۋگە باعىتتالعان. ال روبوتتاندىرىلعان ەمدەۋ, قالدىقتاردى بيولوگيالىق وڭدەۋ, شەمىرشەك رەگەنەراتسياسى بويىنشا زەرتتەۋلەردە نازارعا الىندى.
ولجاس بەكتەنوۆ مەديتسينالىق تەحنولوگيالار سالاسىنداعى عىلىمي جۇمىستىڭ ماڭىزىنا توقتالىپ, سالالىق مينيسترلىكتەرگە وتاندىق ازىرلەمەلەردى پراكتيكالىق قولدانۋعا ەنگىزۋ ءۇشىن قولداۋ كورسەتۋدى تاپسىردى.
ۇكىمەت باسشىسىنىڭ ساپارى ەلىمىز ونكولوگيا, يادرولىق مەديتسينا مەن بيومەديتسينالىق زەرتتەۋلەر سالاسىندا سەرپىندى دامۋ جولىنا تۇسكەنىن كورسەتتى. جاساندى ينتەللەكت, پروتوندىق تەراپيا, راديوفارماتسەۆتيكا ءوندىرىسى, جاڭا عىلىمي ينفراقۇرىلىم – بۇلاردىڭ بارلىعى ەل ازاماتتارىنىڭ جوعارى تەحنولوگيالىق, ءدال ءارى قولجەتىمدى مەديتسينالىق كومەك كورسەتۋگە باعىتتالعان.
مەملەكەت مەديتسيناداعى وزىق تەحنولوگيالاردى ۇلتتىق دەڭگەيدە جۇيەلى دامىتۋعا باسىمدىق بەرىپ وتىر.
