ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا بىرىڭعاي تسيفرلىق پلاتفورمانى ەنگىزۋ باعىتىندا اتقارىلعان جۇمىستاردى باياندادى. ونىڭ مالىمەتىنە باقساق دەنساۋلىق ساقتاۋ, ءبىلىم بەرۋ, مادەنيەت پەن سپورت سالالارىنداعى 16 ۇيىم تولىق تسيفرلاندىرىلعان. شىلدەدەن بەرى 9 مىڭنان استام ۇيىمنىڭ شتاتتىق كەستەلەرى دەكلاراتسيادان ءوتىپ جاتىر.
تسيفرلىق باقىلاۋ ناتيجەسىندە الەۋمەتتىك سالاداعى بىرقاتار بۇزۋشىلىق انىقتالعان. اتاپ ايتقاندا 40 مىڭعا جۋىق ازاماتقا رەسمي ەڭبەك شارتى بولماعانىمەن, زەينەتاقى جارنالارى اۋدارىلعان. كەيبىر قىزمەتكەرلەر ءبىر ايماقتاعى مەكتەپتە شتاتتا بولعانىمەن, وزگە وبلىستارداعى ۇيىمدارعا جالعان ەڭبەك شارتىن راسىمدەگەن. 9,6 مىڭ مەكتەپتىڭ شتات كەستەسىندە تىزىلىمدە جوق, ۇيىم باسشىلارى وزدەرى قوسقان 75 لاۋازىم تابىلدى.
مينيستر بتسپ-نى «ادام يگىلىگىنە باعىتتاۋ» كونتسەپتسياسىن تانىستىردى. پلاتفورمادا 4,5 ملن ادامنىڭ دەرەگى قامتىلعان. جاڭا ءتاسىل الەۋمەتتىك قولداۋدىڭ بارلىق ءتۇرىن – ااك پەن جاردەماقىلاردان باستاپ, مەكتەپكە دەيىنگى ءبىلىم مەن سپورت سەكتسيالارىن سۋبسيديالاۋعا دەيىن – ءبىر جۇيەدە كورسەتۋدى كوزدەيدى.
پرەمەر-مينيستر تسيفرلاندىرۋ ناقتى ناتيجەگە جەتكىزۋى كەرەكتىگىن اتاپ ءوتتى. اۆتوماتتاندىرۋ مەن الەۋمەتتىك الاياقتىققا قارسى شارالاردىڭ ارقاسىندا 2024 جىلى بيۋدجەتكە 299 ملرد تەڭگە قايتارىلعان. الداعى ءۇش جىلدا قوسىمشا 135 ملرد تەڭگەنى ۇنەمدەۋ جوسپارلانىپ وتىر.
جيىندا جەكەمەنشىك مەكتەپتەردى قارجىلاندىرۋ تەتىكتەرىن جەتىلدىرۋ ماسەلەسى دە قارالدى. بۇعان دەيىن مەملەكەتتىك ءبىلىم بەرۋ تاپسىرىسىنا بولىنەتىن قاراجاتتىڭ اشىقتىعىن ارتتىرۋ ماقساتىندا «قارجى ورتالىعى» اق قارجى مينيسترلىگىنە بەرىلگەن ەدى.
قارجى ءمينيسترى ءمادي تاكيەۆتىڭ ايتۋىنشا, e-Qazyna.kz پورتالىندا ىسكە قوسىلعان OrtaBilim سەرۆيسى ءبىلىم بەرۋ مەكەمەلەرىنىڭ قىزمەتىن اۆتوماتتى باقىلاۋعا مۇمكىندىك بەرەدى. جۇيە رۇقسات قۇجاتتارىن, وقۋشىلار سانىن, مەكتەپ قۋاتتىلىعىن سالىستىرىپ, دەرەكتەردىڭ دۇرىستىعىن تەكسەرەدى.
تەكسەرۋ بارىسىندا ايتارلىقتاي زاڭبۇزۋشىلىقتار انىقتالعان. وندا 745 جەكەمەنشىك مەكتەپتىڭ 155-ءى ءوز كىرىسىن جاسىرعان. تسيفرلاندىرىلعان 427 مەكتەپتىڭ 30%-ى ءوز قىزمەتىن ماقساتقا ساي جۇرگىزبەگەن. مىسالى, تۇركىستان وبلىسىندا مەكتەپ رەتىندە تىركەلگەن نىسان – تويحانا, شىمكەنتتە – ساۋدا ورتالىعى بولىپ شىققان. بۇعان قوسا 64 مەكەمەدە وقۋشىلار سانى جوبالىق قۋاتتىلىقتان ەكى ەسەگە ارتىق. الماتى وبلىسىندا 60 ورىندىق مەكتەپكە 702 وقۋشى قابىلدانعان. ال استانادا 241 ورىندىق مەكتەپ قۇجاتتارىندا 1 003 وقۋشى كورسەتىلگەن. جالعان مۇعالىمدەر مەن قوسارلانعان قارجىلاندىرۋ فاكتىلەرى ءجيى تىركەلگەن.
OrtaBilim جۇيەسى مۇنداي زاڭسىزدىقتارعا توسقاۋىل قويىپ, بيۋدجەت قاراجاتىن ماقساتسىز جۇمساۋدى بولدىرماۋعا باعىتتالعان. بۇگىندە جەكەمەنشىك مەكتەپتەردىڭ 86%-ى جاڭا جۇيە ارقىلى اۆتوريزاتسيادان ءوتتى. كەلەسى جىلدىڭ قاڭتارىنان باستاپ قارجىلاندىرۋ تولىقتاي جاڭا تالاپتارمەن رەتتەلەدى.
ولجاس بەكتەنوۆ جاعدايدىڭ وتە كۇردەلى ەكەنىن ايتىپ, جاۋاپتى ورگاندارعا ءتارتىپ ورناتۋدى تاپسىردى. «مەملەكەت جوق وقۋشىلار ءۇشىن ءجيى اقشا تولەپ كەلگەنى بەلگىلى بولدى. بۇل سالادا زاڭسىز يندۋستريا پايدا بولدى. بىردە-ءبىر تەڭگە جوسىقسىز ادامداردىڭ قالتاسىنا تۇسپەۋگە ءتيىس», دەدى پرەمەر-مينيستر.
جيىن سوڭىندا پرەمەر-مينيستر ەڭبەك جانە حالىقتى الەۋمەتتىك قورعاۋ, قارجى, وقۋ-اعارتۋ مينيسترلىكتەرىنە, سونداي-اق ءوڭىر اكىمدىكتەرىنە بىرقاتار تاپسىرما جۇكتەدى. ونىڭ قاتارىندا تسيفرلاندىرۋدى جەدەلدەتۋ, زاڭسىز سحەمالاردى تۇبىرىمەن جويۋ, الەۋمەتتىك قولداۋ شارالارىن ناقتى مۇقتاج ازاماتتارعا باعىتتاۋ, ءبىلىم بەرۋ سالاسىنداعى قارجىلاندىرۋ ءتارتىبىن قاتايتۋ, جاڭا پلاتفورمالاردى تولىق ەنگىزۋ جونىندە شارا بار..
ۇكىمەت الەۋمەتتىك قولداۋ مەن ءبىلىم بەرۋ سالاسىن قارجىلاندىرۋعا بولىنەتىن بيۋدجەت قاراجاتىنىڭ ءار تەڭگەسىن ءتيىمدى پايدالانۋدى باستى مىندەت رەتىندە قويىپ وتىر.
