ەڭ الدىمەن مەكتەپكە دەيىنگى تاربيەدەن باستاپ, تەحنيكالىق جانە كاسىپتىك ءبىلىم بەرۋگە دەيىنگى بارلىق دەڭگەيدە وڭ سيپاتتاعى وزگەرىستەردىڭ ءورىس العانىن ەكپىن ءتۇسىرىپ ايتا كەتۋىمىز كەرەك. الدىمەن, بالالىقتىڭ بەسىگى – بالاباقشا جايىن تىلگە تيەك ەتەلىك. وڭىردە بۇگىندە 592 مەكتەپكە دەيىنگى ۇيىم جۇمىس ىستەيدى. ءسال عانا تاراتىپ ايتاتىن بولساق, ونىڭ ىشىندە 274 بالاباقشا مەن 318 شاعىن ورتالىق بار. جىل باسىنان بەرى 9 جاڭا بالاباقشا مەن بىرنەشە شاعىن ورتالىق پايدالانۋعا بەرىلدى. مەملەكەتتىك جانە جەكەمەنشىك ۇيىمداردىڭ سەرىكتەستىك ەسەبىنەن بالالارعا ارنالعان زاماناۋي وقۋ جانە ويىن الاڭدارى ىسكە قوسىلدى. قولدانىستاعى 8 بالاباقشا زامان تالابىنا ساي جوندەلىپ, كەڭەيتىلىپ, قوسىمشا 308 ورىن اشىلدى.
ەندى ءبىلىم وشاقتارىنداعى جاڭارۋ جايىن ايتا كەتەلىك. وقىرمانعا تۇسىنىكتى بولۋى ءۇشىن بىرقاتار دەرەكتەر كەلتىرە كەتۋگە ءتيىستىمىز. وڭىردەگى 524 جالپى ءبىلىم بەرەتىن ءبىلىم وشاقتارىندا 140559 وقۋشى ءبىلىم الۋدا. ولاردىڭ ىشىندە 13548-ءى بيىل مەكتەپ تابالدىرىعىن العاش اتتاعان بۇلدىرشىندەر. بۇل دەرەكتەردى كەلتىرىپ وتىرعان سەبەبىمىز, وقۋشىلار سانىنىڭ ءبىرشاما ارتۋى. ءبىر جاقسىسى, الەۋمەتتىك قولداۋ شارالارى تۇراقتى داستۇرگە اينالىپ, ۇزبەي جۇرگىزىلىپ كەلەدى. بۇل بولاشاققا جاسالىپ جاتقان قامقورلىق دەپ ايتساق ارتىقتىعى بولماس. ءداستۇرلى «مەكتەپكە جول» اكتسياسى اياسىندا 16427 وقۋشىعا كومەك كورسەتىلىپ, جالپى سوماسى 693,5 ميلليون تەڭگە جۇمسالدى. بالالاردىڭ 72 پايىزى بيۋدجەت قاراجاتى ەسەبىنەن قولداۋ تاپسا, قالعان بولىگى دەمەۋشىلەر مەن قايىرىمدىلىق قورلارىنىڭ جاناشىرلىعىن كورىپ كەلەدى. وسى ارادا ايرىقشا بولە-جارا ايتاتىن جاي, «اق نيەت» قايىرىمدىلىق قورى بيىل وقۋشىلارعا 1517 مەكتەپ سومكەسىن كەڭسە تاۋارلارىمەن قوسا ۇلەستىردى.
وبلىس مەكتەپتەرىنىڭ 69 پايىزى شاعىن جيناقتى ءبىلىم وشاقتارى. اۋىل مەكتەبى مەن قالا مەكتەبى اراسىنداعى ءبىلىم ساپاسىن تەڭەستىرۋ ماقساتىندا «اۋىل مەكتەبى – ساپا الاڭى» جوباسى ءبىرشاما تابىستى جۇرگىزىلۋدە. بۇگىنگى تاڭدا ماڭىزى ەرەكشە جوباعا 18 تىرەك جانە 54 ماگنيتتىك مەكتەپ قاتىسىپ وتىر. مۇعالىمدەردىڭ كاسىبي الەۋەتىن ارتتىرۋ باعىتىندا اۋقىمدى جۇمىستار جۇزەگە اسىرىلۋدا. ءوڭىردىڭ 270 پەداگوگى جاساندى ينتەللەكت, 212 مۇعالىم مەديا جانە تسيفرلىق ساۋاتتىلىق كۋرستارىنان ءوتتى. «Esen Foundation» جانە «BAQ jana mektebi» جوبالارى اياسىندا 500 ءپان مۇعالىمى مەن 30 مەكتەپتىڭ 90 اكىمشىلىك قىزمەتكەرى ءبىلىمىن جەتىلدىردى. سونىمەن قاتار پەداگوگتەرگە ادىستەمەلىك جانە پسيحولوگيالىق قولداۋ كورسەتەتىن ء«بىلىمدى جاستار» وداعى مەن «زەرتتەۋشى ۇستاز» جوباسى ۇستازدار قاۋىمىنا تىڭ سەرپىن بەرۋدە. ءوڭىر وقۋشىلارى ءار جىل سايىن رەسپۋبليكالىق جانە حالىقارالىق وليمپيادالاردا ۇزدىك ناتيجە كورسەتىپ كەلەدى. 2024–2025 وقۋ جىلىندا وقۋشىلار توقساننان استام زياتكەرلىك سايىستار مەن عىلىمي جوبالارعا قاتىسىپ, رەسپۋبليكالىق دەڭگەيدە 204 مەدال, حالىقارالىق دەڭگەيدە 61 ماراپاتقا يە بولدى. كوكشەتاۋداعى ء«بىلىم-يننوۆاتسيا» ليتسەي-ينتەرناتىنىڭ شاكىرتتەرى بولگاريادا وتكەن حالىقارالىق ينفورماتيكا وليمپياداسىندا قولا مەدال الىپ, ەل مەرەيىن اسىردى. بۇگىندە وبلىستىڭ 8 مەكتەبى قازاقستاننىڭ ۇزدىك 100 وليمپيادالىق مەكتەبىنىڭ قاتارىنا ەنگەنى دە ايتا قالارلىق جەتىستىك دەۋىمىز كەرەك.
ءوڭىردىڭ بارلىق مەكتەپتەرى جوعارى جىلدامدىقتى ينتەرنەتپەن 100 پايىز قامتىلعان. 210 مەكتەپ «Starlink» سپۋتنيكتىك بايلانىس جۇيەسىن پايدالانادى. مەكتەپتەردە 46 مىڭنان استام كومپيۋتەر, 1858 ينتەراكتيۆتى پانەل ورناتىلعان. بۇل جاعداي وقۋشىلاردىڭ تسيفرلىق ورتادا ساپالى ءبىلىم الۋىنا جاعداي جاساپ وتىر.
بيىل 34 ءبىلىم وشاعىنا كۇردەلى جوندەۋ, 43 نىسانعا اعىمداعى جوندەۋ جۇمىستارى جاسالدى. بۇل ماقساتقا 8,6 ميلليارد تەڭگە قاراجات ءبولىندى. 20 ءبىلىم وشاعىنا رەنوۆاتسيا جاسالىپ, زاماناۋي جابدىقتارمەن قامتاماسىز ەتىلدى.
ءبىلىم كۇنى 3 جاڭا مەكتەپ ەسىكتەرىن ايقارا اشىپ, وقۋشىلار مەن اتا-انالاردى قۋانىشقا بولەدى. جاڭا ءبىلىم وشاقتارى تسەلينوگراد اۋدانىنىڭ جاڭاجول اۋىلىندا, ستەپنوگورسك قالاسىنىڭ بەستوبە كەنتىندە جانە جارقايىڭ اۋدانىنىڭ ءبىرسۋات ەلدى مەكەنىندە سالىندى. وبلىس ورتالىعىنداعى 588 ورىندىق ء«بىلىم-يننوۆاتسيا» ليتسەيىنىڭ قۇرىلىسى اياقتالىپ, وقۋ ۇدەرىسى باستالىپ كەتتى. ششۋچينسك قالاسىندا 300 ورىندىق ءىت-ينتەرنات جانە كوكشەتاۋدا 500 ورىندىق №10 مەكتەپ جەكە ينۆەستيالار ەسەبىنەن بوي كوتەردى. 2024–2025 وقۋ جىلدارى «كەلەشەك مەكتەپتەرى» ۇلتتىق جوباسى اياسىندا 9 مەكتەپ ىسكە قوسىلىپ, تسەلينوگراد اۋدانىنداعى ءبىلىم وشاقتارىنداعى ورىن تاپشىلىعى 8 ەسەگە, وبلىس ورتالىعىنداعى تاپشىلىق 1,5 ەسەگە ازايدى.
بۇگىنگى تاڭدا جۇمىسشى كادرلاردى دايارلاۋعا ايرىقشا ءمان بەرىلىپ وتىرعانى بەلگىلى. وڭىردە 28 كوللەدج جۇمىس ىستەيدى. وندا 19 702 مىڭ ءبىلىم الۋشى جاڭا زامان تالابىنا ساي ءتالىم-تاربيە الۋدا. ءبىر ايتا كەتەرلىگى, 16367-ءى تەگىن ءبىلىم الۋدا. ولارعا جان-جاقتى جاعداي تۋعىزۋ قاراستىرىلعان. جاڭا جاتاقحانالار كەزەڭ-كەزەڭىمەن پايدالانۋعا بەرىلۋدە. وبلىس ورتالىعىنداعى جوعارى تەحنيكالىق, اقان سەرى اتىنداعى جوعارى مادەنيەت كوللەدجدەرىندە 300 ورىندىق جاتاقحانالار ىسكە قوسىلدى. كۇنى كەشە عانا ازاماتتىق قورعاۋ جوعارى كوپسالالى كوللەدجىنىڭ 450 ورىندىق جاڭا جاتاقحاناسىنا پايدالانۋعا بەرىلدى. جىل باسىنان بەرى جۇمىسشى ماماندىقتارى جىلى اياسىندا اۋقىمدى جۇمىس جۇرگىزىلۋدە. بۇل شارالار بىرنەشە باعىتتى قامتىپ, نەگىزىنەن, جۇمىسشى ماماندىعىن مارتەبەسىن ارتتىرۋعا, تەحنيكالىق جانە كاسىپتىك ءبىلىم بەرۋ جۇيەسىن ەڭبەك نارىعىنىڭ تالاپتارىنا جاقىنداتۋعا, سونداي-اق, جاستار ءۇشىن مۇمكىندىكتەر اياسىن كەڭەيتۋگە باعىتتالعان. جۇمىسشى ماماندىقتارى جىلىنىڭ رەسمي باستاماسى رەتىندە وبلىس ورتالىعىندا وتكەن «جۇمىسشى ماماندىقتارى جىلى: جاڭا مۇمكىندىكتەر اشىلادى» اتتى جاستار فورۋمى ۇيىمداستىرىلدى. ءىس-شاراعا ەكى مىڭنان استام ادام قاتىسىپ, ارقيلى تاقىرىپتاعى كورمەلەر, شەبەرلىك سىنىپتارى, فورسايت-سەسسيالار جانە پىكىرتالاستار ۇيىمداستىرىلدى. فورۋمدا جۇمىسشى ماماندىقتارىنىڭ ماڭىزدىلىعى اتاپ ءوتىلىپ, جاستاردى جۇمىسپەن قامتۋعا ىقپال جاسالدى. جىل جوسپارى اياسىندا كادر قاجەتتىلىگىن انىقتايتىن وڭىرلىك كارتا – جاڭا ماماندىقتار مەن قۇزىرەتتەر اتلاسى ازىرلەندى. قۇجاتتا وڭدەۋ ونەركاسىبى, اۋىل جانە ورمان شارۋاشىلىعى, قىزمەت كورسەتۋ سالاسى بويىنشا جاڭا, ترانسفورماتسيالاناتىن جانە جويىلىپ بارا جاتقان ماماندىقتار قامتىلعان. بۇل اقپارات بولشاشاقتا ءبىلىم بەرۋ ءۇردىسىن جوسپارلاۋعا جانە ەڭبەك نارىعىندا سۇرانىسقا يە مامانداردى دايارلاۋعا نەگىز بولادى.
ءبىلىم سالاسىنداعى وسىناۋ وزگەرىستەر مەن جەتىستىكتەر ءوڭىر تۇرعىندارىنىڭ ورتاق ەڭبەگىنىڭ جەمىسى. بىلىمگە سالىنعان ينۆەستيتسيا – ەل ەرتەڭىنە سالىنعان ينۆەستيتسيا دەۋىمىز كەرەك.
اقمولا وبلىسى
