سۋرەتتى تۇسىرگەن – اۆتور
كەزەكتى رەيدكە وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى مەن تابيعاتتى قورعاۋ پوليتسياسىنىڭ ماماندارى شىققان. قىراعى كوزدەر قىبىر ەتكەن قيمىلدى قالت جىبەرمەك ەمەس. وتكەن ايدا ءتورت اۋە رەيدى جاسالىپ, 9 دانا مايقاراعايدى زاڭسىز كەسكەنى انىقتالعان. جىل باسىنان بەرى تابيعاتقا زيان تيگىزگەن 200 ازاماتقا اكىمشىلىك حاتتاما تولتىرىلىپ, 2 قىلمىستىق ءىس قوزعالىپتى. از كورسەتكىش ەمەس.
قاتپار-قاتپار تاۋ-تاستى ارالاي ۇشىپ شىقتىق تا, باتىس التايدىڭ قويناۋىنان باستاۋ الاتىن ءۇبى وزەنىن بويلاي جونەلدىك. ءموپ-ءمولدىر وزەننىڭ قاپتالى قالىڭ قاراعاي, قايىڭ... ءبىر ۋاقىتتا تىكۇشاق شۇعىل اينالدى-داعى, وزەن جاعاسىنداعى شاعىل تاستى الاڭقايعا قونا كەتتى. جاعادا بالىقتان بالىقشى كوپ. قازداي ءتىزىلىپ, قارماق لاقتىرىپ تۇر. وكىنىشتىسى, بالىقشىلار جايعاسقان تۇس قوقىسقا تولى. ينسپەكتورلار ەسكەرتۋ جاساپ, تابيعاتتى تازا ۇستاۋ كەرەكتىگىن ەستەرىنە سالدى. تۇسىنگەن ادام قوقىس تاستاماسا كەرەك.
قالتا تەلەفونداعى كارتاعا قاراپ وتىرمىز, ءۇبى باستاۋ الىپ جاتقان جاققا قاراي ۇشتىق. اڭ جورتقان كور قۋىس. ادام اياعى باسپاعان جەر وسى شىعار دەي بەرگەنىمدە, سىڭار سوقپاقپەن اۋىر جۇك كولىگى جۇيتكىپ بارادى ەكەن. اككى ۇشقىشتار كەسە-كولدەنەڭ جولعا قونا كەتتى. ينسپەكتورلار ىتقىپ-ىتقىپ شىقتى-داعى توقتاعان كولىككە جۇگىرە جونەلدى. تەكسەرۋ كەزىندە ەكى قاپ جاڭا اۋلانعان بالىق شىقتى. ونىڭ ۇستىنە قارماقپەن ەمەس, رۇقسات ەتىلمەگەن شانىشقى تەمىرمەن اۋلاعان. مۇندايدا زاڭ قاتال. تابيعات جاناشىرلارى زاڭعا سايكەس اكىمشىلىك كودەكستىڭ 383-بابى, 3-بولىگى بويىنشا حاتتاما تولتىرىپ, سوتقا جولدادى.
ايتقانداي, اۋەدەن جاسالاتىن رەيد جۇمىستارى ءالى جالعاسادى. سوندىقتان تابيعاتتا ءتارتىپ بۇزىپ, سان سوعىپ قالماڭىزدار!
شىعىس قازاقستان وبلىسى,
ريددەر قالاسى
