جۇرت جاقسى كورەتىن حالىق اندەرىن اسەم داۋىسىمەن اۋەلەتە ورىنداعان ءانشى ەل ىقىلاسىنا بولەندى. الايدا تانىمال دارابوز جۇرت ۇناتقان ءداستۇرلى اندەردى عانا ورىنداۋمەن شەكتەلگەن جوق. وعان «ەر تارعىن», «ايمان-شولپان», «قىز جىبەك», ء«بىرجان-سارا», «اباي» وپەرالارىندا كۇردەلى پارتيالار مەن رولدەردى ورىنداۋ جۇكتەلدى. ءوزى دە بىرنەشە ءان شىعاردى.
قازاقتىڭ ءداستۇرلى ءان ونەرىن جانىنداي سۇيگەن ءانشىنىڭ داۋىسى دا ەرەكشە ەدى. بىردە اسپانعا اۋەلەپ, ەندى بىردە باياۋ سوققان سامالداي ەستىلەدى. ونىڭ وسىنداي اۋەزدى ءۇنى كەزىندە گرامپلاستينكاعا جازىلدى. اتىراۋ وبلىستىق تاريحي-ولكەتانۋ مۋزەيىندە سونداي پلاستينكانىڭ بىرنەشەۋى ساقتالىپ تۇر. سونىڭ بىرىندە عاريفوللا قۇرمانعاليەۆتىڭ ورىنداۋىنداعى «سمەت», «جىلىوي», «سەرى جىگىت ءانى, «ەكى جيرەن», «ادەمى قىز» اندەرى جازىلعان.
كەزىندە مۇنداي گرامپلاستينكالارداعى اندەردى تىڭداۋ ءۇشىن ارنايى پاتەفون شىعارىلدى. وسىنداي پاتەفوندى تەنور داۋىستى ءانشى دە ۇستاعان ەكەن. قازىر مۇنايلى ءوڭىر مۋزەيىنە قويىلعان بۇل پاتەفون كەلۋشىلەردى ەرەكشە قىزىقتىرادى.
«جىلدار جىلجىعان سايىن ەل ىقىلاسى اۋعان تانىمال تۇلعالار, اسىرەسە ۇلت ونەرىن دامىتۋعا زور ۇلەس قوسقان دارابوزدار ۇستاعان زاتتاردىڭ قادىرى ارتا بەرەدى. مۋزەيگە كەلگەن سايىن باتىس ايماقتاعى حالىق اندەرىنىڭ, مۇحيت تۋىندىلارىنىڭ كەيىنگى ۇرپاققا جەتۋىنە ايرىقشا سەپتىگى تيگەن ءانشىنىڭ بۇيىمدارىن قىزىقتايمىن», دەيدى جەرگىلىكتى قالامگەر قارجاۋباي سۇلتانعالي ۇلى.
اتىراۋ وبلىسى
