ۆالەنتينا ۆاسيلەۆنا بار شارۋاسىنا مەيلىنشە مۇقيات, ەڭبەكقور ادام. وسى ادال ەڭبەگىنىڭ ارقاسىندا ارىپتەستەرىنىڭ اراسىندا شىنايى قۇرمەت پەن بەدەلگە يە. مالساق جاننىڭ ەڭبەگىنىڭ ارقاسىندا بىرنەشە جىل بويى بۇزاۋلارى شەتىنەگەن ەمەس. ءار ساۋىن سيىردان 176 978 كەلى ءسۇت ساۋىپ, كوش باستاپ كەلەدى. ەڭبەگى دە ەلەنبەي قالعان ەمەس, 2023 جىلى اۋىل شارۋاشىلىعى مينيسترلىگىنىڭ قۇرمەت گراموتاسىمەن ماراپاتتالدى. 2022 جىلى اۋدانداعى «ۇزدىك بۇزاۋشى» اتالىمى بويىنشا اۋدان اكىمىنىڭ العىس حاتىنا يە بولدى.
– سەرىكتەستىكتە تابان اۋدارماستان جيىرما جىل بويى جۇمىس ىستەپ كەلەمىن. راس, ساۋىنشى بولۋ وڭاي ەمەس. «سيىردىڭ ءسۇتى تىلىندە» دەگەن ءسوز بار. زەر سالىپ ويلاپ قاراساڭىز, شىنىندا دا سولاي. ارينە, ءىرى قارانىڭ تۇقىمى اسەر ەتەتىن دە بولار, دەگەنمەن, باققان مالىڭنىڭ يگىلىگىن كورۋ ءۇشىن جان اياماي جۇمىس ىستەۋ كەرەك, – دەيدى ۆالەنتينا گورودوۆا, – قازىر جىلدار بويى جيناعان تاجىريبەمدى جاستارعا ۇيرەتىپ ءجۇرمىن. ىرىس ۇمتىلعانعا ۇيىرىلەدى. كەز كەلگەن ماماندىق قادىرلى. بوزالا تاڭنان تۇرىپ, سيىر ساۋىپ, ادال ەڭبەك ەتەتىن ادامداردىڭ اتقارعان جۇمىسى ەلەنۋى قانات بىتىرەدى. ەگەر ءدال وسىنداي كوزقاراس بولسا اۋىل جاستارى دا بۇل ماماندىقتى قۇرمەتتى ساناپ, جۇمىس ىستەر ەدى. «بەلاعاش» سەرىكتەستىگى اۋدانداعى ىرگەلى شارۋاشىلىقتىڭ ءبىرى. بۇل جەردە بىزگە بارلىق جاعداي جاسالىپ وتىر.
ساۋىنشى وزىنە جۇكتەلگەن مىندەتتى مەيلىنشە جاۋاپكەرشىلىكپەن اتقارادى. بالكىم, تابىس سىرى دا وسىندا جاتقان شىعار. ورتاق ىسكە جان-تانىمەن بەرىلۋى بۇگىندە بالبارماق ساۋىنشىنى ۇشپاققا شىعارىپ وتىر. وندىرىستىك مىندەتتەردى مۇلتىكسىز ءارى تابىستى ورىنداپ, تۇراقتى ناتيجەگە قول جەتكىزۋ ءۇشىن تاباندىلىق كەرەك ەكەندىگى بەلگىلى. «مالدىڭ جايىن باققان بىلەدى» دەگەندەي, كۇندەلىكتى جۇمىسىن تاپ-تۇيناقتاي ەتىپ اتقاراتىنىڭ ارقاسىندا ىرىزدىق مولشىلىعىن جاساپ, ءتولىن امان ءوسىرىپ, وزاتتار قاتارىنا قوسىلۋمەن بىرگە, وتباسىندا دا ۇلگىلى جان. اۋىلداستارى باقىتىن ەڭبەكتەن تاپقان ادامعا زور قۇرمەتپەن قارايدى.
– وسى جىلدى «جۇمىسشى ماماندىقتارى جىلى» دەپ اتاپ, قاراپايىم ادامداردىڭ ادال ەڭبەگىنە كوڭىل اۋدارۋ ەل بولاشاعىن ويلاعان كورەگەندىكتەن تۋىنداپ وتىر, – دەيدى ساۋىنشى, – ەسەلى ەڭبەك ەل نازارىنان تىس قالماي, اركىم ءوزىنىڭ باعاسىن الاتىن بولسا, جاستار دا ەڭبەكتىڭ قادىرىن بىلەر ەدى.
جاقسى اۋدانى,
اقمولا وبلىسى
