فوتو: اشىق دەرەككوز
بۇل جونىندە اقش مەملەكەتتىك دەپارتامەنتى ارنايى نۇسقاۋلىق شىعارعان. ۆەدومستۆو سوزىلمالى اۋرۋلارى بار ادامدار بولاشاقتا مەملەكەت رەسۋرستارىن كوپ قاجەت ەتۋى مۇمكىن دەپ ەسەپتەيدى. KFF Health News حابارلاۋىنشا, جاڭارتىلعان نۇسقاۋلار اقش-تىڭ شەتەلدەگى ەلشىلىك وكىلدىكتەرىنە جىبەرىلگەن.
ء«وتىنىش بەرۋشىنىڭ دەنساۋلىق جاعدايىن ەسكەرۋ قاجەت. جۇرەك-قان تامىر اۋرۋلارى, تىنىس الۋ جۇيەسى اۋرۋلارى, ونكولوگيالىق دەرتتەر, ديابەت, زات الماسۋ بۇزىلىستارى, نەۆرولوگيالىق جانە پسيحيكالىق اۋرۋلار ەمدەۋگە جۇزدەگەن مىڭ دوللار شىعىندى تالاپ ەتۋى مۇمكىن», دەلىنگەن قۇجاتتا.
ەندى ۆيزالىق وفيتسەرلەر ءوتىنىش بەرۋشىنىڭ مەديتسينالىق شىعىندارىن ءوزى وتەي الاتىنىن دا باعالاۋى ءتيىس. سونىمەن قاتار, ونىڭ جاقىن تۋىستارىنىڭ, بالالارى نەمەسە قارت اتا-اناسىنىڭ دەنساۋلىعى دا ەسەپكە الىنادى. ەگەر ولاردا سوزىلمالى اۋرۋلار, مۇگەدەكتىك نەمەسە ارنايى كۇتىمدى قاجەت ەتەتىن جاعدايلار بولسا, بۇل شەشىمگە اسەر ەتەدى. سەبەبى مۇنداي كۇتىم ءوتىنىم بەرۋشىنىڭ جۇمىس ىستەۋىنە كەدەرگى كەلتىرۋى مۇمكىن.
بۇعان دەيىن ۆيزا راسىمدەۋ كەزىندە تەك جۇقپالى اۋرۋلار, ەكپەلەر جانە پسيحيكالىق دەنساۋلىق ماسەلەلەرى قاراستىرىلاتىن. ەندى بۇل تىزىمگە جۇرەك-قان تامىرلارى, تىنىس الۋ جۇيەسىنىڭ اۋرۋلارى, قاتەرلى ىسىك, ديابەت, زات الماسۋ بۇزىلىستارى جانە نەۆرولوگيالىق دەرتتەر كىرەدى. الايدا جاڭا تالاپتار گۋمانيتارلىق ساناتتاعى ءوتىنىش بەرۋشىلەرگە – بوسقىندارعا قولدانىلمايدى.
