فوتو: اشىق دەرەككوز
گولوۆكين 2022 جىلى 17 قىركۇيەكتە لاس-ۆەگاستا مەكسيكالىق ساۋل كانەلو الۆارەستەن جەڭىلگەننەن كەيىن رينگكە شىقپادى. دەگەنمەن, سول ۋاقىتتا تانىمال سپورتشى رەسمي تۇردە مانسابىن اياقتاعانىن جاريالاعان جوق.
2024 جىلدىڭ 26 اقپانىندا گولوۆكين قازاقستان ۇلتتىق وليمپيادالىق كوميتەتىنىڭ پرەزيدەنتى بولىپ سايلاندى, ال قىركۇيەكتە World Boxing-ءتىڭ وليمپيادالىق كوميسسياسىنىڭ توراعاسى اتانىپ, بوكستىڭ وليمپيادا باعدارلاماسىندا قالۋىنا ۇلكەن ۇلەس قوستى.
43 جاستاعى گولوۆكين سوڭعى جىلدارى سپورتتىق قىزمەتكەر رەتىندە جۇمىس ىستەدى. Asia Boxing پرەزيدەنتى پيچاي چۋنحاۆادجيرامەن كەزدەسۋدە ول قازاقستاندا سوڭعى رەت جەكپە-جەككە شىعۋ مۇمكىندىگىن قاراستىرىپ جۇرگەنىن ايتقان.
«مەن بوكستى بىلەمىن. بوكس – مەنىڭ ءومىرىم. مەن ارقاشان بارىمدى سالىپ ەڭبەك ەتتىم. ءيا, مەن قازىر 43 جاستامىن, بىراق ءالى دە بوكستاپ ءجۇرمىن. مۇمكىن, تاعى ءبىر جەكپە-جەگىمدى قازاقستاندا وتكىزەرمىن», دەدى گولوۆكين.
