بەلارۋستىك ستريمەر جانە ينفليۋەنسەر Mellstroy (شىن اتى – اندرەي بۋريم) ورىس ءتىلدى ينتەرنەت كەڭىستىگىندە داۋلى, ۇشقارى كونتەنتىمەن تانىلعان. 2017 جىلى Twitch پەن YouTube پلاتفورمالارىندا ويىن ستريمدەرىنەن باستاعان ول كەيىن «trash-ستريم» فورماتىنداعى تىكەلەي ەفيرلەرگە كوشىپ, اۋديتورياسىن جىلدام ۇلعايتقان. ونىڭ جازىلۋشىلارى – نەگىزىنەن تمد جاستارى.
رەسمي دەرەكتەرگە سايكەس, اندرەي الەكساندروۆيچ بۋريمگە قاتىستى ىزدەۋ ءىسى 15 قاراشادا استانادا تىركەلگەن. ىزدەۋ شارالارىن باس قالانىڭ ەكونوميكالىق تەرگەپ-تەكسەرۋ دەپارتامەنتى جۇرگىزىپ جاتىر.
«ونلاين-كازينونى جارنامالاۋ ماقساتىندا بلوگەر ءتۇرلى روزىگرىشتار مەن چەللەندجدەر جاريالاعان.
قاتىسۋشىلارعا TikTok, YouTube Shorts جانە وزگە دە الەۋمەتتىك جەلىلەردە Mellstroy.game برەندى, كازينو لوگوتيپتەرى جانە سايتقا سىلتەمەلەر كورسەتىلگەن ۆيدەوروليكتەر ءتۇسىرۋ ۇسىنىلعان.
بۇعان دەيىن بۋريم تىكەلەي ەفير كەزىندە ادامدى ۇرعانى ءۇشىن رەسەي فەدەراتسياسىندا تۇزەۋ جۇمىستارىنا مىندەتتەلىپ, ايىپپۇل ارقالاعان», دەلىنگەن قارجىلىق مونيتورينگ اگەنتتىگىنىڭ حابارلاماسىندا.
