ەستۋ قابىلەتى زاقىمدانعان سپورتشىلار اراسىندا ءتورت جىلدا ءبىر وتەتىن ءدۇبىرلى دودا بيىل ەرەكشە تاريحي مانگە يە — سۋردليمپيادالىق قوزعالىستىڭ 100 جىلدىعىمەن تۇسپا-تۇس كەلدى.
سالتاناتتى شەرۋدە ەلىمىزدىڭ كوك بايراعىن سۋردو دزيۋدودان قازاقستان رەسپۋبليكاسىنىڭ سپورت شەبەرلەرى, XXIV جازعى سۋردليمپيادا ويىندارىنىڭ جۇلدەگەرلەرى ايدوس تۇگەلباەۆ پەن اننا كراموروۆا كوتەرىپ شىقتى.
«ەلىمىزدىڭ تۋىن حالىقارالىق ارەنادا كوتەرىپ شىعۋ – ءاربىر سپورتشى ءۇشىن ەڭ ۇلكەن ابىروي. بۇل – ماعان ارتىلعان زور سەنىم ءارى ۇلكەن جاۋاپكەرشىلىك. وسى سەنىمدى اقتاۋ ءۇشىن بار كۇش-جىگەرىمدى سالامىن», – دەدى ايدوس تۇگەلباەۆ.
سونداي-اق, ۇلتتىق سۋردليمپيادا كوميتەتىنىڭ پرەزيدەنتى سەرىك ساپيەۆ سپورتشىلارعا قولداۋ كورسەتىپ, ءوز پىكىرىن ءبىلدىردى.
«بۇل ويىندار - سپورتشىلارىمىزدىڭ ەڭ جوعارى دەڭگەيدە باسەكەگە قابىلەتتى ەكەنىن دالەلدەيتىن مۇمكىندىك. قازاقستاندىق كوماندا ۇلكەن دايىندىقتان ءوتتى, ءاربىر سپورتشى جارىس جولىنا ءبىر ماقساتپەن - ەل ابىرويىن اسقاقتاتۋ ءۇشىن شىعادى», - دەدى ول.
اشىلۋ سالتاناتى توكيو مەتروپوليتەن گيمنازياسى سپورت كەشەنىندە ءوتتى. شارانى ەستۋ قابىلەتى زاقىمدانعان سپورتشىلار سپورتىنىڭ حالىقارالىق كوميتەتى (ICSD) پرەزيدەنتى ادام كوسا اشىپ, بارلىق قاتىسۋشى ەلدەرگە ساتتىلىك تىلەدى.
باعدارلامانىڭ كوركەمدىك بولىگى جاپونيانىڭ ۇلتتىق مادەنيەتىن كورسەتىپ, ەستيتىن جانە ەستۋ قابىلەتى زاقىمدانعان جاندار اراسىنداعى بايلانىستى نىعايتۋعا باعىتتالدى. ساحنالىق قويىلىمدار سۋردليمپيادانىڭ 100 جىلدىق تاريحىن, ونىڭ رۋحىن جانە مادەنيەتتەر اراسىنداعى ءوزارا تۇسىنىستىك پەن بىرلىكتى دارىپتەۋدى ماقسات ەتتى.
بيىلعى ويىنداردا 81 ەلدەن 3000-عا جۋىق سپورتشى قاتىسىپ, 21 سپورت تۇرىنەن 209 ديستسيپلينادا باق سىنايدى.قازاقستان ۇلتتىق قۇراماسى 78 سپورتشىدان قۇرالعان جانە 8 سپورت ءتۇرى بويىنشا ەل نامىسىن قورعايدى.
ۇلتتىق قۇراما ءۇشىن العاشقى جارىستار 16 قاراشادا سۋردو دزيۋدو مەن سۋردو بادمينتوننان باستالادى. كەيىن جارىس كەستەسىنە سايكەس جەڭىل اتلەتيكا, ۇستەل تەننيسى, ءجۇزۋ, گرەك-ريم كۇرەسى, تاەكۆوندو جانە ەركىن كۇرەس دودالارى جالعاسادى.
