بۇل تۋرالى ۇكىمەتتىڭ ءباسپاسوز قىزمەتى مالىمدەدى.
ۇكىمەت مەملەكەت باسشىسىنىڭ وڭىرلىك كولىك حابتارىن دامىتۋ جانە اۋە قاتىناسى قاۋىپسىزدىگىن ارتتىرۋ جونىندەگى تاپسىرمالارىن ورىنداۋ شەڭبەرىندە بالقاش قالاسىنىڭ اۋەجايىن رەكونسترۋكتسيالاۋعا ارناۋلى مەملەكەتتىك قوردان 945 ملن تەڭگە ءبولدى.
نىساندى رەكونسترۋكتسيالاۋ جولاۋشىلارعا قىزمەت كورسەتۋ ساپاسىن جاقسارتۋعا جانە اۋە ايلاعىنىڭ نەگىزگى پارامەترلەرىن حالىقارالىق ستاندارتتارعا سايكەستەندىرۋگە مۇمكىندىك بەرەدى. ونىڭ وتكىزۋ قابىلەتى 30%-دان استامعا ارتادى.
قازىرگى ۋاقىتتا جۇمىستاردىڭ ەداۋىر كولەمى ورىندالعان. اتاپ ايتقاندا, اۋەجايدىڭ نەگىزگى عيماراتى مەن قوسالقى نىساندارىنىڭ شاتىرى جوندەلىپ, تەرەزەلەر ورناتىلىپ, كارىز جۇيەسى جانە سۋ قۇبىرىنىڭ نەگىزگى جەلىسى جاڭارتىلدى. سونداي-اق كارىز-سورعى ستانساسى, ترانسفورماتورلىق قوسالقى ستانسا, جەلدەتۋ جانە جىلىتۋ جۇيەلەرى ورناتىلدى.
سونىمەن قاتار اۋەجاي قىزمەتىن قامتاماسىز ەتۋ ءۇشىن ءبىرىنشى كەزەكتە قاجەتتى ارنايى اەرودروم تەحنيكاسىن ساتىپ الۋ جۇمىستارى جۇرگىزىلۋدە. بۇگىندە اەرودرومدىق ءورت ءسوندىرۋ كولىگى, جىلجىمالى تراپ, شاعىن اۆتوبۋس جانە اەرودرومعا ارنالعان جانارماي قۇيۋ كولىگى ساتىپ الىنعان.
پرەزيدەنت جولداۋىن جۇزەگە اسىرۋ اياسىندا ەلىمىزدە اۆياتسيالىق ينفراقۇرىلىمدى دامىتۋ بويىنشا كەشەندى جۇمىستار جۇرگىزىلىپ جاتقانىن اتاپ ءوتۋ ماڭىزدى. ول استانا, الماتى, شىمكەنت, اقتوبەدە جانە باسقا دا ءىرى قالالارداعى جەتەكشى اۋەجايلاردى مۋلتيمودالدى حابتارعا اينالدىرۋ ءۇشىن اۋقىمدى جاڭعىرتۋ جۇمىستارىن قامتيدى. سونىمەن قاتار نەگىزگى تۋريستىك ايماقتاردا (قاتونقاراعاي, زايسان, كەندىرلى) جاڭا اۋەجايلار سالۋ جانە وڭىرلىك اۋە ايلاقتارىن قالپىنا كەلتىرۋ جۇمىستارى جۇرگىزىلۋدە.
