جاقىندا جاپونيانىڭ جاڭادان سايلانعان پرەمەر-ءمينيسترى تاكايچي ساناە جاڭا ۇكىمەت جاساقتادى. ول 21 قازاندا وتكەن پارلامەنتتىك داۋىس بەرۋدە 237 داۋىس جيناپ, ەل ۇكىمەتىن باسقارۋعا مۇمكىندىك الدى. جاڭا مينيسترلەر كابينەتىندە تەگى ۇيعىر ساياساتكەر ارفيا ەريدىڭ ەسىمى ەرەكشە اتالادى. ول جاپونيا سىرتقى ىستەر ءمينيسترىنىڭ ورىنباسارى بولىپ بەكىتىلدى. ارفيا ەري جەكە الەۋمەتتىك اككاۋنتىندا تاكايچي ساناە مەن سىرتقى ىستەر ءمينيسترى توشيميتسۋ موتەگيمەن جۇمىس ىستەگەنىن ماقتان تۇتاتىنىن ايتتى.
ء«بىز جاپونيانىڭ ديپلوماتيالىق مۇمكىندىكتەرى مەن حالىقارالىق كوشباسشىلىعىن ودان ءارى نىعايتۋدا بەلسەنە جۇمىس ىستەي بەرەمىز», دەپ جازدى ا.ەري.
ارفيا ەري جاپونيانىڭ فۋكۋوكا پرەفەكتۋراسىنىڭ كيتاكيۋسيۋ قالاسىندا شىعىس تۇركىستاننان كوشىپ كەلگەن ۇيعىر وتباسىندا دۇنيەگە كەلگەن. ول 11 جاسىندا جاپونيا ازاماتتىعىن العان. ەري اقش-تاعى اتاقتى دجوردجتاۋن ۋنيۆەرسيتەتىنىڭ تۇلەگى, 7 تىلدە ەركىن سويلەيدى, بۇۇ مەن جاپونيا بانكىندە جۇمىس ىستەگەن. قازىر ليبەرالدىق-دەموكراتيالىق پارتيانىڭ مۇشەسى رەتىندە ول – پارلامەنتتىڭ تومەنگى پالاتاسىندا چيبا پرەفەكتۋراسىنىڭ 5-وكرۋگىنەن سايلانعان وكىل. 36 جاستاعى ارفيا ەري – جاپون پارلامەنتىنىڭ ەڭ جاس مۇشەسى. 2023 جىلى Time جۋرنالى ونى «الەمدەگى ەڭ ىقپالدى 100 جاس كوشباسشىنىڭ ءبىرى», دەپ اتادى.
ال ۇلتى جاپون ساياساتكەر توميو وكامۋرا – قازىر چەحيا پارلامەنتىنىڭ سپيكەرى. وكامۋرا جاپونيادا دۇنيەگە كەلگەن, اناسى – چەح, ال اكەسى – جاپون. ونى اناسى التى جاسىندا, اعالارى وساما مەن حاياتومەن بىرگە چەحوسلوۆاكياعا الىپ كەتەدى. وكامۋرا كەيىنىرەك جاپونياعا قايتا ورالادى, الايدا كينوتەاتردا پوپكورن ساتۋشىسى بولىپ جۇمىس ىستەگەن كەزىندە جەرگىلىكتى تۇرعىنداردىڭ وعان دەگەن قارىم-قاتىناسى وعاش كورىنىپ, ول پراگاعا قايتا ورالادى. 1990 جىلدارى ول تۋريزم جانە مەيرامحانا يندۋسترياسىندا جۇمىس ىستەيدى. ودان سوڭ چەحيا تەلەارناسىندا رەاليتي-شوۋ جۇرگىزىپ, بىرتىندەپ ساياساتقا ارالاسا باستادى.
2012 جىلى وكامۋرا جەرگىلىكتى سايلاۋدا جەڭىسكە جەتىپ, سەناتقا قابىلدانادى. وسىلايشا, جاپون تەكتى جىگىت بۇرىننان قالىپتاسقان سوتسيال-دەموكراتيالىق ءداستۇرى بار ەلدىڭ سپيكەرى, ەلدەگى ءۇشىنشى لاۋازىمدى شەنەۋنىك دەڭگەيىنە كوتەرىلدى. سەناتتاعى ارىپتەستەرىمەن قيعاش كەلەتىن تۇسى دا جازىلىپ ءجۇر.
چەح ەلىنىڭ ساياساتىن جۇرگىزۋگە اتسالىسىپ وتىرعان وتانداسىمىزدى دا ەرەكشە اتاپ وتۋگە بولادى. ءجاميلا الماسقىزى ستەحليكوۆا (ورداباەۆا) – قازاق ۇلتىنان شىققان چەح ساياساتكەرى. 2007 جىلدىڭ 9 قاڭتارىنان 2009 جىلدىڭ 23 قاڭتارىنا دەيىن ول ادام جانە ازشىلىق قۇقىقتارى ءمينيسترى جانە چەحيا ۇكىمەتى جانىنداعى ادام قۇقىقتارى جونىندەگى كەڭەستىڭ توراعاسى قىزمەتتەرىن اتقاردى.
ول ي.سەچەنوۆ اتىنداعى ءبىرىنشى ماسكەۋ مەملەكەتتىك مەديتسينا ۋنيۆەرسيتەتىندە ءبىلىم العان. 1988 جىلى سولتۇستىك چەحيانىڭ حومۋتوۆ قالاسىنا قونىس اۋدارعاننان كەيىن ول قوڭىر كومىر ءوندىرۋ ونەركاسىبىندە قورشاعان ورتانى قورعاۋ مەن ەلدى مەكەندەردى ساقتاۋ ماسەلەلەرىمەن اينالىسىپ, از ۇلتتاردىڭ جەرگىلىكتى وكىلدەرىنىڭ, ەڭ الدىمەن, سۋدەتتىك نەمىستەردىڭ, ەۆرەيلەر مەن سىعانداردىڭ تاعدىرى تۋرالى دەرەكتەر جيناعان. ال 1998 جىلى ول حومۋتوۆ قالالىق كەڭەسىنىڭ دەپۋتاتى بولىپ سايلانىپ, 2010 جىلعا دەيىن قالالىق كەڭەستە ۇزدىكسىز قىزمەت ەتتى, ەكى مارتە قالالىق كەڭەستىڭ دەپۋتاتى بولدى. 1998 جىلى جاسىلدار پارتياسىنا قوسىلىپ, ۋستيناد لابەم ايماعىنداعى ايماقتىق ۇيىمنىڭ توراعاسى, جاسىلدار پارتياسى توراعاسىنىڭ ورىنباسارى بولىپ سايلاندى. 2007 جىلدىڭ قاڭتارىنان 2009 جىلدىڭ قاڭتارىنا دەيىن ءجاميلا ستەحليكوۆا چەحيانىڭ ادام جانە ازشىلىق قۇقىقتارى ءمينيسترى قىزمەتىن اتقاردى. ول چەحياداعى وزگە ۇلتتان شىققان العاشقى مينيستر بولدى.
ستەحليكوۆا مينيستر بولعان كەزىندە سىعان ەتنوسى ازاماتتارىنىڭ الەۋمەتتىك جاعىنان از قامتىلعان ادامداردىڭ تۇراتىن اۋماقتارىنداعى الەۋمەتتىك ينتەگراتسيا جونىندەگى اگەنتتىك قۇرعان. ادىلەت مينيسترلىگىمەن بىرلەسە وتىرىپ, ول ادامداردى اڭدۋعا قارسى زاڭ مەن «تەڭدىك اكتىسى» – كەمسىتۋشىلىككە قارسى زاڭ جوباسىن ازىرلەدى. الايدا ونىڭ كەيبىر زاڭ جوبالارى قوعامدىق قولداۋعا يە بولمادى. ول 2009 جىلى 23 قاڭتاردا ۇكىمەتتى قايتا قۇرۋ كەزىندە وتستاۆكاعا كەتتى.
ودان كەيىن ءجاميلا ستەحليكوۆا ليبەرالدى ەكولوگيا پارتياسىنا قوسىلىپ, 2014 جىلدىڭ 16 اقپانىنداعى قۇرىلتاي سەزىندە وسى ۇيىمنىڭ باسشىلىعىنا سايلاندى. ول – ۇكىمەت جانىنداعى ادام قۇقىقتارى جونىندەگى ۇلتتىق كەڭەستەگى ءبىر كوميتەتتىڭ مۇشەسى. 2021 جىلى 24 ماۋسىمدا وتكەن ليبەرالدى ەكولوگيا پارتياسىنىڭ سەزىندە ول پارتيا توراعاسى ورنىندا قالدى.
الەمدە ۇلتىنا, تەگىنە قاراماي ازاماتتاردىڭ ساياسات باسپالداعىنان كوتەرىلۋى قاشاندا وقىپ-توقىعاننىڭ وزاتىنىن دالەلدەيدى.
