مەرەيتويلىق مونەتا

  وسكەمەندە ۇلى وتان سوعى­سىنىڭ ارداگەرلەرىنە « ۇلى جەڭىسكە 70 جىل» مەرەيتويلىق مونەتاسى تاپسىرىلدى. ءار جاس سارباز ءۇشىن سوعىستا بولعان ساقا جاۋىنگەردىڭ وتانعا دەگەن سۇيىسپەنشىلىگى, بەيبىتشىلىكتى قادىرلەۋ جونىندە شەرتكەن سىرى تاعىلىمداما ىسپەتتى. سوندىقتان ەرتىس وزەنىنىڭ سول جاعالاۋىنداعى شىعىس وڭىرىنەن شىققان 109 كەڭەس وداعىنىڭ باتىرىنىڭ قۇرمەتىنە ارنالعان مۋزەي-قورىق كەشەنىندە وتكەن شاراعا ۇلى وتان سوعىسىنىڭ ارداگەرلەرى, قالا باسشىلىعى, ۇرمەلى اسپاپتار وركەسترى جانە 5518, 27943 اسكەري بولىمدەرىمەن بىرگە قازاقستان قارۋلى كۇشتەرىنىڭ قاتارىنا شاقىرىلۋشىلار دا قاتىستى. وسكەمەن قالاسى قورعانىس ىستەرى باسقارماسىنىڭ باستىعى, پولكوۆنيك ادىلەت ساقاۋوۆ مەرەيتويلىق مونەتالاردى تاپسىرۋ ساتىندە بۇگىنگى ۇرپاققا بەيبىتشىلىك سىيلاعان اعا بۋىن وكىلدەرىنە, سوعىس جانە تىل ارداگەرلەرىنە قۇرمەت كورسەتىپ, «سىزدەردىڭ ەرلىككە تولى ءومىر جولدارىڭىز تاۋەلسىز ەلىمىزدىڭ ءار جاس ساربازى ءۇشىن ۇلكەن ۇلگى-ونەگە», – دەدى. وتان قورعاۋشىلار كۇنى قار­ساڭىندا شىعىسقازاق­ستاندىقتار قازاقستان قارۋلى كۇشتەرىنىڭ قاتارىنا الىنعان جەرلەستەرىن سالتاناتتى تۇردە شىعارىپ سالدى. سونداي-اق, شارا بارىسىندا 27943 اسكەري ءبولىم ۆزۆودى قويان-قولتىق ۇرىس تاسىلدەرىن تاماشا مەڭگەرگەندىكتەرىن بايقاتقان كورىنىستەر قويسا, وبلىستىق فيلارمونيا انشىلەرى پاتريوتتىق اندەر شىرقادى. دۋمان اناش, «ەگەمەن قازاقستان». وسكەمەن.