فوتو: pinterest.com
قما الماتى قالاسى بويىنشا دەپارتامەنتىنىڭ مالىمەتىنشە, ءۇش جىل بويى ءبىر توپ ادام ارنايى حالىققا قىزمەت كورسەتۋ ورتالىعىنىڭ قىزمەتكەرلەرىمەن ىمىرالاسىپ, كولىكتەردى باستاپقى تىركەۋ ءۇشىن تولەنەتىن الىمدى اينالىپ وتەتىن قىلمىستىق سحەما قۇرىپ كەلگەن.
سحەما ۇيىمداستىرۋشىلارى دەلدالدار ارقىلى الىم تولەۋدەن جالتارعىسى كەلەتىن كولىك يەلەرىن تاۋىپ وتىرعان. زاڭسىز تىركەۋدى جاسىرۋ ءۇشىن اۆتوكولىكتەر جالعان تۇلعالاردىڭ اتىنا راسىمدەلگەن.
احقو قىزمەتكەرلەرى اقپاراتتىق جۇيەگە جالعان مالىمەتتەر ەنگىزىپ, 132 كولىكتى زاڭسىز تىركەۋگە قويعان. سونىڭ سالدارىنان مەملەكەتكە 1,2 ملرد تەڭگەدەن استام زالال كەلتىرىلگەن.
تەرگەۋ بارىسىندا تولەنبەگەن الىمداردىڭ ءبىر بولىگى – 273 ميلليون تەڭگە ەرىكتى تۇردە وتەلدى.
سوت كىنالى ءۇش تۇلعانى 3 جىلدان 4 جىل 6 ايعا دەيىنگى مەرزىمگە باس بوستاندىعىنان ايىرۋ تۋرالى ۇكىم شىعاردى. سونىمەن قاتار قىلمىستىق جولمەن الىنعان 7 اۆتوكولىك تاركىلەندى.
