سۋرەتتى تۇسىرگەن – تۇرار قازانعاپوۆ
جەڭىس تۇعىرىنا كوتەرىلگەن وتانداستارىمىزدىڭ اراسىنان ۇستەل تەننيسشىلەرىن بولە-جارا اتاپ وتۋگە بولادى. باستاپقى باسەكەلەردە قارسىلاستارىنىڭ بارلىعىن باس كوتەرتپەي ۇتقان ءبىزدىڭ جىگىتتەر شيرەك فينالدا قاتاردى قاپى قالدىردى. جارتىلاي فينالدا تۇركيانى 8:3 ەسەبىمەن تىزە بۇكتىردى. باس جۇلدە ءۇشىن باسەكەدە يران ەلىنىڭ وكىلدەرى دە ايتارلىقتاي قارسىلىق كورسەتە المادى. ولاردى 8:1 ەسەبىمەن ەڭسەردى. كيريلل گەراسيمەنكو, الان قۇرمانعاليەۆ, ايدوس كەنجەعۇلوۆ جەكەلەگەن سايىستاردا ايقىن باسىمدىق تانىتسا, جۇپتىق ويىندا دا جەڭىس تويىن تويلادى. ءسويتىپ, ۇستەل تەننيسىنەن جەرلەستەرىمىز يسلاميادانىڭ جەڭىمپازى اتاندى.
اۋىر اتلەتتەر جارىسىندا ەدىگە ەمبەردى (79 كگ) جۇلقىپ كوتەرۋدە ءۇشىنشى, سەرپە كوتەرۋدە ەكىنشى ورىندى يەلەندى. قوسسايىس قورىتىندىسى بويىنشا 343 (152+191) كگ كورسەتكىشپەن قولا مەدالعا قول جەتكىزدى. قانداسىمىز مىسىرلىق ابدەلراحمانەلسايەد پەن ازەربايجاندىق راۆين الماممادوۆتان عانا قالىپ قويدى.
جارىستىڭ العاشقى كۇندەرى قوس قولانى قورجىنعا سالعان ايبات مىرزامۇراتوۆ تاعى دا ولجاعا كەنەلدى. بۇل جولى ول 200 مەترگە براسس ادىسىمەن جۇزۋدە ءۇشىنشى ناتيجە كورسەتتى. ايباتتىڭ الدىن تۇركيالىق دورۋك يوگۋرتچۋوگلۋ مەن الجيرلىك دجاۋاد سيوۋد وراپ كەتتى.
يسلام ىنتىماقتاستىعى ويىندارىنىڭ اشىلۋ سالتاناتىندا ەلىمىزدىڭ كوك بايراعىن ۇستاپ شىققان تاعى ءبىر سپورتشىمىز التىن الىپ, الاش جۇرتىن قۋانىشقا بولەدى. زىلتەمىرشى نۇرعيسا ادىلەت ۇلى جاۋاپتى ساتتە وزىنە وسىنداي زور سەنىمنىڭ تەگىن ارتىلماعانىن ناقتى دالەلدەدى.
94 كگ سالماقتا سىنعا تۇسكەن نۇرعيسا العاشقى جاتتىعۋدا 175 كگ زىلتەمىردى جۇلقىپ كوتەرىپ, التىن الدى. الەم رەكوردشىسى ءارى بيىلعى الەم چەمپيوناتىنىڭ كۇمىس جۇلدەگەرى, يراندىق اليرەزا موەينيدىڭ ءوزىن ارتقا تاستادى. سەرپە كوتەرۋدە دە سىر بەرمەدى. سايىستىڭ بۇل تۇرىندە ول 210 كگ-دىق زىلتەمىردى باعىندىردى. قوسسايىستاعى ناتيجەسى – 385 كگ. ءسويتىپ, ن.ادىلەت ۇلىنىڭ اسقان شەبەرلىگىنىڭ ارقاسىندا ەلىمىزدىڭ قورجىنىنا ءۇش التىن مەدال ءتۇستى. تاعى ءبىر اۋىر اتلەتىمىز ايانات جۇماعالي (77 كگ) سەرپە كوتەرۋ مەن قوسسايىستا قولا مەدالدى ەنشىلەدى.
كوپ كەشىكپەي كاراتەشىلەر قۋانتتى. 84 كگ سالماق دارەجەسىندە سىنعا تۇسكەن نيكيتا تارناكين جارىس جەڭىمپازى اتاندى. شەشۋشى سىندا وتانداسىمىز يوردانيانىڭ ءدۇلد ۇلى مۇحاممەد ءادجافاريدى ۇتتى. 60 كگ سالماقتاعى جولامان بيعابىل جارتىلاي فينالدا جەڭىلىس تاپقانىمەن, ءۇشىنشى ورىن ءۇشىن تارتىستا ءباا-ءنىڭ وكىلى ابداللا حاممادتان باسىم ءتۇستى.
جۇزۋشىلەردىڭ 4×100 مەترلىك كەشەندى ءجۇزۋ ەستافەتاسىندا جەرلەستەرىمىز كۇمىس جۇلدە يەلەندى. كوماندانىڭ ساپىندا ادىلبەك مۋسين, ماكسيم سكازوبتسوۆ, ايبات مىرزامۇراتوۆ, گلەب كوۆالەنيا ونەر كورسەتتى.
سونداي-اق وزبەكستاننىڭ تۋى استىندا ونەر كورسەتكەن قانداسىمىز, بوكسشى ماديار دانياروۆ 60 كگ سالماق دارەجەسىندە دارا شىقتى.
