ماۋلەن اشىمباەۆ جارىسقا قاتىسۋشىلارعا ءىلتيپات ءبىلدىرىپ, جىل وتكەن سايىن ەلىمىزدە بوچچا قارقىندى دامىپ كەلە جاتقانىن اتاپ ءوتتى. مەملەكەت باسشىسى قاسىم-جومارت توقاەۆتىڭ پاراسپورتشىلاردى قولداۋ, ينكليۋزيۆتى, كەدەرگىسىز ورتا قالىپتاستىرۋ باعىتىنداعى تاپسىرمالارىن ورىنداۋ اياسىندا مۇددەلى تاراپتارمەن بىرلەسىپ كەشەندى جۇمىس جۇرگىزىلىپ جاتىر. ەل كۋبوگى – سول اۋقىمدى جۇمىستىڭ ءبىر بولىگى. سونداي-اق فەدەراتسيا وكىلدەرى مەن جاتتىقتىرۋشىلار اتالعان سايىس قازاقستاندا بوچچانى دامىتۋعا, دارىپتەۋگە, سپورتتىق شەبەرلىك دەڭگەيىن ارتتىرۋعا جانە ۇلتتىق قۇرامانى جاساقتاۋعا باعىتتالعانىن ايتتى.
«پرەزيدەنت قاسىم-جومارت توقاەۆ ەلىمىزدە ينكليۋزيا مادەنيەتىن ودان ءارى دامىتۋ جانە مۇمكىندىگى شەكتەۋلى ازاماتتاردىڭ سپورت ارقىلى دا قوعام ومىرىنە تولىققاندى قاتىسۋى ءۇشىن قاجەتتى جاعداي جاساۋ ماڭىزدى مىندەت ەكەنىن ۇنەمى ايتىپ كەلەدى. بۇل رەتتە بوچچا ايرىقشا مانگە يە. سەبەبى بۇل – ءتارتىپ قالىپتاستىرىپ, ستراتەگيالىق ويلاۋدى دامىتاتىن جانە مۇمكىندىگى شەكتەۋلى ازاماتتاردىڭ ورتاعا بەيىمدەلۋىنە ىقپال ەتەتىن سپورت ءتۇرى. سىزدەر بوچچادان قازاقستان كۋبوگى جولىنداعى جارىسقا قاتىسۋ ارقىلى قوعامدا ماڭىزدى قۇندىلىقتاردى ناسيحاتتايسىزدار. سونداي-اق سىزدەردىڭ تاباندىلىقتارىڭىز بەن ەڭبەكقورلىقتارىڭىز زامانداستارىڭىزدى ىنتالاندىراتىنى انىق», دەدى بوچچا فەدەراتسياسىنىڭ پرەزيدەنتى.
ايتا كەتەيىك, جارىس 9-14 قاراشا كۇندەرى وتەدى. وندا 11-14 جاس ارالىعىنداعى جاسوسپىرىمدەر مەن 15 جاستان اسقان ەرەسەكتەر جەكە, جۇپتىق جانە كوماندالىق سايىستار بويىنشا باق سىنايدى. جارىس جولىندا ەلىمىزدىڭ 15 وڭىرىنەن: استانا, الماتى, شىمكەنت قالالارى مەن باتىس قازاقستان, اتىراۋ, ماڭعىستاۋ, اقتوبە, سولتۇستىك قازاقستان, قاراعاندى, جامبىل, تۇركىستان, پاۆلودار, شىعىس قازاقستان, اباي جانە جەتىسۋ وبلىستارىنان كەلگەن 120 پاراسپورتشى ءوزارا مىقتىنى انىقتايدى.
ەل كۋبوگى جولىنداعى بايراقتى باسەكەنى مۇمكىندىگى شەكتەۋلى سپورتشىلاردى سپورتتىق دايارلاۋ ورتالىعىنىڭ, استانا قالاسىنىڭ دەنە شىنىقتىرۋ جانە سپورت باسقارماسىنىڭ ۇيىتقى بولۋىمەن, سونداي-اق سەرىكتەستەر مەن دەمەۋشىلەردىڭ قولداۋىمەن قازاقستان بوچچا فەدەراتسياسى ۇيىمداستىرعانىن اتاپ وتكەن ءجون.
