بۇل شەشىم بۇگىن ەلوردا ءماسليحاتىنىڭ سەسسياسىندا قابىلداندى. ءتيىستى ۇسىنىستى استانا قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ جاريالادى.
«جۋىردا, قىركۇيەك ايىندا, ەلىمىزگە يتاليا پرەزيدەنتى رەسمي ساپارمەن كەلدى. وسى كەزدەسۋ بارىسىندا مەملەكەت باسشىسى استاناداعى ورتالىق كوشەلەردىڭ بىرىنە ماركو پولونىڭ اتىن بەرۋدى تاپسىرعان بولاتىن», دەدى ول.
ماركو پولونىڭ ەسىمى بەرىلەتىن كوشە تۇران جانە قابانباي باتىر داڭعىلدارىن جالعايتىن ۋچاسكەدە ورنالاسقان.
ساكەن ەسىركەپتىڭ ايتۋىنشا, ايگىلى ساياحاتشى ماركو پولو (XIII–XIV عع.) ەۋرازيا حالىقتارىنىڭ تاريحىن زەرتتەۋگە زور ۇلەس قوسقان جانە قازىرگى قازاقستان اۋماعىن مەكەندەگەن اتا-بابالارىمىز تۋرالى قۇندى دەرەكتەر قالدىرعان.
«ول جەرورتا تەڭىزىنەن قىتايعا دەيىنگى ۇزاق ساپار شەگىپ, جول بويىنداعى ەلدەردىڭ تۇرمىس-تىرشىلىگىن ەگجەي-تەگجەيلى سيپاتتاعان. ونىڭ جازبالارىندا قىپشاقتار, تۇركىلەر جانە التىن وردا تۋرالى ماڭىزدى مالىمەتتەر بار», دەدى ول.
بۇدان بولەك, مادەني ىنتىماقتاستىق اياسىندا قازاقستان مەن يتاليا اراسىنداعى بايلانىس نىعايىپ كەلە جاتقانى ايتىلدى.
«جاقىندا يتاليا استاناسى – ريمدە, ۆيللا گراتسيولي ساياباعىندا ۇلى قازاق اقىنى ابايدىڭ ءبيۋستى رەسمي تۇردە اشىلدى», دەدى ساكەن ەسىركەپ.
سونىمەن قاتار, استانادا تاعى ەكى كوشەگە اتاۋ بەرۋ ۇسىنىلدى:
-
ە15 كوشەسىنە — مۇحاممەد الي دجيننا;
-
ە754 كوشەسىنە — سوفيا اتاۋى بەرىلەدى.
