«بۇل ماسەلەنىڭ قوعامدا قىزۋ تالقىلانىپ جاتقانىنا بەس جىلدىڭ ءجۇزى بولدى. وسى ۋاقىت ارالىعىندا بىرنەشە رەت دەپۋتاتتىق ساۋال جولدانىپ, بارلىق دالەل مەن دەرەك ەگجەي-تەگجەيلى قارالدى. بىراق قاسيەتسىز توپ قاسيەتتى كيىز ۇيىمىزدە تايراڭداپ, ۇلتتىق فولكلوردا گوموسەكسۋاليزم بار دەپ تۇتاس حالىققا جالا جاپتى. مۇنداي باسسىزدىققا جول بەرۋگە بولمايدى», دەدى دەپۋتات.
ونىڭ ايتۋىنشا, لگبت وكىلدەرى مەكتەپتەرگە بارىپ, زاڭسىز ۇگىت-ناسيحات جۇرگىزىپ, حالىق قالاۋلىلارىنا قارسى اقپاراتتىق شابۋىل ۇيىمداستىرعان. ء«بىزدىڭ جەكە باسىمىزعا ءوتىپ, كەلەمەجدەدى. بۇل – زاڭ شىعارۋشى ورگاننىڭ وكىلدەرىنە قىسىم جاساۋ, ادام قۇقىعىن اياققا تاپتاۋ», دەپ اتاپ ءوتتى ول.
دەپۋتات قوعام تاراپىنان بۇل ۇردىسكە قارسى E-petition.kz مەملەكەتتىك پلاتفورماسىندا باستاما كوتەرىلىپ, 50 مىڭ ازاماتتىڭ قولى جينالعانىن ەسكە سالدى. سونداي-اق, جاڭبىرشين بۇۇ-نىڭ بالا قۇقىقتارى تۋرالى كونۆەنتسياسىندا بالانى زياندى اقپاراتتان قورعاۋ مىندەتى كورسەتىلگەنىن, ال جەنەۆا دەكلاراتسياسى ءار مەملەكەتتىڭ ءداستۇرلى وتباسىلىق ساياسات جۇرگىزۋ قۇقىعىن بەكىتەتىنىن اتاپ ءوتتى.
«2022 جىلى اقش-تىڭ ءوزى جەنەۆا دەكلاراتسياسىن قابىلداپ, پرەزيدەنت دونالد ترامپ ءبىر جىنىستى نەكەلەرگە تىيىم سالىپ, تەك ايەل جانە ەر جىنىسىن مويىنداۋ تۋرالى جارلىق شىعاردى. بۇل شەشىمدى امەريكا جوعارعى سوتى زاڭدى دەپ تانىدى. ياعني, ءبىز تۇگىلى, الەمنىڭ وزگە ەلدەرى دە مۇنداي تەرىس باعىتتاردى قوعامعا جات دەپ باعالاپ وتىر», دەدى ە. جاڭبىرشين.
ونىڭ ايتۋىنشا, لگبت-نى ناسيحاتتاۋعا تىيىم سالۋ نورمالارى ەشقانداي ادام قۇقىعىن شەكتەۋگە باعىتتالماعان, قايتا ۇلتتىق قاۋىپسىزدىكتى, ءداستۇرلى وتباسىلىق ينستيتۋتتى جانە رۋحاني يممۋنيتەتتى قورعاۋعا ارنالعان. «دەربەس مەملەكەتتىڭ ىشكى ىسىنە ارالاسۋعا, ەڭ باستىسى, ونىڭ ۇلتتىق زاڭدارىنا قىسىم كورسەتۋگە ەشقانداي ۇيىمنىڭ قۇقىعى جوق. بۇل نورمالار ۇلتتىڭ مۇددەسىن قورعاۋعا باعىتتالعان», دەپ قورىتىندىلادى حالىق قالاۋلىسى.
