فوتو: kazgazeta.kz
بيىل اباي وبلىسىنان 451 سپورتشى قازاقستاننىڭ ۇلتتىق قۇراماسىنا ەندى. مەيىرلان راحانوۆتىڭ ايتۋىنشا, بۇل كورسەتكىش سوڭعى ءۇش جىلدا تۇراقتى ءوسىمدى كورسەتىپ وتىر.
ء«بىزدىڭ سپورتشىلار حالىقارالىق ارەنادا وزدەرىن سەنىمدى تۇردە كورسەتىپ ءجۇر. ازيا جانە الەم چەمپيوناتتارىندا 183 مەدال جەڭىپ السا, ەل ىشىندەگى جارىستاردا 1 200-دەن استام جۇلدە يەلەندى. بۇل – وڭىردە بۇقارالىق جانە كاسىبي سپورتتى دامىتۋ بويىنشا جۇيەلى جۇمىستىڭ ناتيجەسى», دەدى اكىمنىڭ ورىنباسارى.
وبلىستا 48 سپورت فەدەراتسياسى جۇمىس ىستەيدى, 26 مەكەمەدە 14 مىڭنان استام ادام تۇراقتى تۇردە جاتتىعادى.
اباي وبلىسىندا 150 217 جاس ازامات تۇرادى – بۇل ءوڭىر حالقىنىڭ تورتتەن ءبىرى. وبلىس اكىمى بەرىك ءۋاليدىڭ باستاماسىمەن بيىل جاستار ساياساتى جونىندەگى جەكە باسقارما قۇرىلدى.
«جىل باسىنان بەرى 149 بوس ورىندار جارمەڭكەسى وتكىزىلدى, وعان 1,5 مىڭنان استام جاس قاتىستى. وڭىرلىك جۇمىسپەن قامتۋ كارتاسى اياسىندا 7 106 جاس جۇمىسقا ورنالاستى. ونىڭ ىشىندە 411-ءى – ۇلتتىق جوبالار بويىنشا, 2 307-ءى – جارمەڭكەلەر ارقىلى, 2 596-سى – «10 مىڭ تۇرعىنعا 100 جۇمىس ورنى» پرەزيدەنتتىك باستاماسى اياسىندا, ال 1 792-ءسى – سۋبسيديالاناتىن جۇمىس ورىندارىنا ورنالاسقان», دەيدى م.راحانوۆ.
سپيكەردىڭ ايتۋىنشا, جاستاردى تۇرعىن ۇيمەن قامتۋ ماسەلەسى دە باقىلاۋدا تۇر. كەزەكتە 15 549 ادام تۇر, ال بيىل ءتۇرلى تۇرعىن ءۇي باعدارلامالارى ارقىلى 413 جاس پاتەر العان.
اباي وبلىسىنىڭ مادەنيەت سالاسى دا جۇيەلى تۇردە دامىپ كەلەدى. وڭىردە 296 مادەنيەت مەكەمەسى جۇمىس ىستەيدى, وندا ەكى مىڭنان استام مامان, نەگىزىنەن اۋىلدىق جەرلەردە, ەڭبەك ەتىپ ءجۇر.
«جىل باسىنان بەرى ونداعان ماڭىزدى ءىس-شارا ءوتتى, سونىڭ ىشىندە «اباي ەلى – ونەر كەنىشى» بايقاۋى 1 500-گە جۋىق قاتىسۋشىنى جينادى. جەڭىمپازدارعا 1 ميلليون تەڭگەدەن سىياقى بەرىلدى. ابايدىڭ 180 جىلدىعىنا وراي 50 مىڭنان استام ادام قاتىسقان 100-گە جۋىق ءىس-شارا ۇيىمداستىرىلدى», دەيدى ول.
6 مادەني نىسان جوندەۋدەن ءوتتى, ونىڭ ىشىندە شار جانە قاراۋىل اۋىلدارىنداعى مادەنيەت ۇيلەرى, ف.م. دوستوەۆسكي مۇراجايى, اباي اتىنداعى تەاتر, وبلىستىق كىتاپحانا جانە مۇراعات بار. رەسپۋبليكالىق بيۋدجەت ەسەبىنەن ولكەتانۋ مۇراجايىنىڭ كۇردەلى جوندەۋى جۇرگىزىلۋدە, ال ءۇرجار اۋدانىنىڭ جوعارعى ەگىنسۋ اۋىلىندا «اۋىل – ەل بەسىگى» باعدارلاماسى اياسىندا 100 ورىندىق اۋىل كلۋبى سالىنىپ جاتىر.
«كەلەشەك مەكتەبى» ۇلتتىق جوباسى اياسىندا وڭىردە 2 700 ورىندىق ءتورت جاڭا مەكتەپ پايدالانۋعا بەرىلدى. اباي وبلىسىندا 177 بالاباقشا مەن 191 شاعىن ورتالىق جۇمىس ىستەيدى, كەزەكتە شامامەن 5,8 مىڭ بالا بار.
«كەزەكتى ازايتۋ ءۇشىن بيىل بەس جەكەمەنشىك بالاباقشا اشىلدى, ماقانشى اۋىلىندا 140 ورىندىق بالاباقشا سالۋ بويىنشا قۇجاتتار دايىندالىپ جاتىر. وبلىستا 311 مەكتەپ بار, جاڭا وقۋ جىلىندا 100 مىڭنان استام وقۋشى ءبىلىم الۋدا. سەمەيدە 500 ورىندىق وقۋشىلار سارايىنىڭ قۇرىلىسى جىل سوڭىنا دەيىن اياقتالادى», دەدى مەيىرلان راحانوۆ.
ونىڭ ايتۋىنشا, سونداي-اق سەمەي مەن اۋىلداردا جاڭا مەكتەپتەر سالىنىپ جاتىر, ال «قازاقستان حالقىنا» قورى ارقىلى 36 مەكتەپكە 58 زاماناۋي وقۋ كابينەتى بەرىلدى. تاعى 4 وقۋ ورنىنىڭ ارقايسىسى 250 ميلليون تەڭگەگە جابدىقتار مەن جيھازبەن قامتاماسىز ەتىلدى.
اباي وبلىسى
