وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى پولىمبەت حاسانوۆتىڭ مالىمەتىنشە, مۇمكىندىگى شەكتەۋلى جاندارعا ءتۇرلى الەۋمەتتىك قىزمەت كورسەتەتىن ءتورت ارنايى الەۋمەتتىك ساۋىقتىرۋ ورتالىعى جۇمىس ىستەيدى. ورتالىقتاردا جىل باسىنان بەرى 1 456 ادامعا الەۋمەتتىك قىزمەت كورسەتىلدى. 17 مىڭنان استام مۇگەدەكتىگى بار ادام ارنايى پورتال ارقىلى قاجەتتى قۇرالدار الىپ, ءتۇرلى الەۋمەتتىك قىزمەتتى پايدالاندى.
«ونىڭ ىشىندە 6 797 ادام مىندەتتى گيگيەنالىق قۇرالدار, 5 019 ادام ساناتوري-كۋرورتتىق ەم الدى. 2 115 ادام پروتەزدىك-ورتوپەديالىق, 1 040 ادام تيفلوتەحنيكالىق, 1 001 ادام جەكە كومەكشى قىزمەتىمەن, 434 ادام سۋردوتەحنيكالىق, 538 ادام ارناۋلى ءجۇرىپ-تۇرۋ قۇرالدارىمەن, 205 ادام ىمداۋ ءتىلى قىزمەتىمەن قامتىلدى», دەيدى پ.حاسانوۆ.
مەملەكەتتىك الەۋمەتتىك تاپسىرىس اياسىندا مۇگەدەكتەردى تاسىمالدايتىن 130 ينۆاتاكسي بار. مۇنداي كولىكتەر ءجۇرۋى قيىن 3 346 ادامدى 200 173 رەت تاسىمالدادى.
«مۇنداي جۇمىستار مۇقتاج جاندارعا قامقورلىق كورسەتۋ, قولايلى ورتا قۇرۋ باعىتىنداعى مەملەكەتتىك ساياساتتىڭ ناتيجەسىن كورسەتەدى. بۇل ءىس-شارالار ەرەكشە قولداۋدى قاجەت ەتەتىن ادامداردىڭ ءومىر ءسۇرۋ ساپاسىن ارتتىرۋعا, ورتاعا تولىق بەيىمدەلۋىنە مۇمكىندىك بەرىپ وتىر», دەيدى باسقارما باسشىسى.
مۇمكىندىگى شەكتەۋلى جانداردىڭ اراسىندا قول قۋسىرىپ قاراپ وتىرمايتىندار دا بار. سونىڭ ءبىرى – 53 جاستاعى اسىلاي اقبەرگەنوۆا.
«جول اپاتىنان كەيىن جۇلىنىم زاقىمدانىپ, اۋىر جاراقات الدىم. جاراقاتتىڭ سالدارىنان ارباعا تاڭىلسام دا تاعدىردىڭ اۋىر سىناعىنا مويىمادىم. سول كەزدە 16 جاستا ەدىم. بىراق ومىرگە قۇلشىنىسىمدى جوعالتپاي, 2009 جىلى «مۇگەدەك الەمى» قوعامىندا ەڭبەك جولىمدى باستادىم. ينۆاتاكسي قىزمەتىندە ءۇش جىل ديسپەتچەر بولىپ جۇمىس ىستەدىم», دەيدى ول.
بۇدان سوڭ اسىلاي جۇمىسىن اتىراۋ قالاسىنداعى №7 ەمحانانىڭ تىركەۋ بولىمىندە جالعاستىردى. مۇندا پسيحولوگ-رەابيليتولوگ رەتىندە قينالعان جانداردىڭ قالىپتى ومىرگە بەيىمدەلۋىنە كومەگىن كورسەتەدى. 2021 جىلدان بەرى «Biz de adambyz» قوعامدىق قورىنا جۇگىنگەن مۇمكىندىگى شەكتەۋلى جاندارعا ءۇمىت ساۋلەسىن جاعىپ كەلەدى.
ء«تۇرلى اداممەن جۇمىس ىستەيمىن. كوبىنەسە زپر, زرر, راس دياگنوزى قويىلعان بالالار, ءتۇرلى جاراقات العان ەرەسەكتەر كەلەدى. ولاردىڭ جان ازابىن جاقسى بىلەمىن. ويتكەنى ءوزىم دە ارباعا تاڭىلعاننان كەيىن كۇيزەلىستە بولعانمىن. بىراق ءومىرىمدى ءوزىم عانا وزگەرتە الاتىنىمدى ءتۇسىندىم. سول ساتتەن ءومىر سۇرۋگە قۇلشىنىسىم ارتتى, قىزىعۋشىلىعىم وياندى», دەيدى ول.
ا.اقبەرگەنوۆا بي ونەرىنە دە بەت بۇردى. ون جىل اربادا وتىرىپ, بي بيلەدى. بۇل ونەرى جەمىسىن بەرىپ, ەلىمىزدىڭ ءۇش دۇركىن چەمپيونى اتاندى. حالىقارالىق سايىستارعا قاتىسىپ, جۇلدەلى ورىنداردى يەلەندى. سونداي-اق پارا وق اتۋدان جەڭىمپاز بولدى. قيىندىققا قارسى تۇرعان قايسار جان جەتىستىكتەرى ءۇشىن «جانشۋاق» سىيلىعىمەن ماراپاتتالدى.
اتىراۋ وبلىسى
