ءوز قارجىسىنا تانك جاساتقان

ءوز قارجىسىنا تانك جاساتقان تۇڭعىش ۇجىمشار توراعاسىنىڭ ەسىمى ەلەۋسىز قالىپ بارادى «قىزىل ارميانىڭ بروندى تانك كۇشتەرىنە قوسقان ۇلەسىڭىز ءۇشىن, تەمىرباەۆ جولداس, مەنىڭ سالەمىم مەن قىزىل ارميانىڭ ءىلتيپاتىن قابىل الىڭىز. ءسىزدىڭ تىلەگىڭىز ورىندالادى», دەگەن ماتىندەگى جەدەلحات جەرگىلىكتى مەملەكەتتىك مۇراعاتتا ساقتاۋلى تۇر. ونى 1943 جىلدىڭ 28 اقپانىندا لەنين اۋدانى «جاڭالىق» ۇجىمشارىنىڭ توراعاسى تولەگەن تەمىرباەۆتىڭ ءوز ەسەبىنەن 130 مىڭ سومدى مايدان قورىنا اۋدارعان وتانسۇيگىشتىك قاسيەتىن جوعارى باعالاعان ي.ۆ.ستالين ارنايى جولداعان. 17 جىل تابان اۋدارماستان ۇجىم­شارعا جەتەكشىلىك ەتكەن ازامات سانالى عۇمىرىن تۋعان جەرىن كور­كەيتۋگە جۇمساپ, ات ۇستىندە ءوت­كەرگەن جان. قيىن-قىستاۋ كەزەڭ­دە ءار جەردە بىتىراي قونعان اۋىل­داردىڭ باسىن بىرىكتىرىپ, ۇلكەن ەلدى مەكەنگە اينالدىرعان. سوعىس كە­زىندە «ءبارى دە مايدان ءۇشىن, ءبارى دە جەڭىس ءۇشىن!» ۇرانىنا جەر­لەس­تەرىن جۇمىلدىرعان. زور ۇيىم­داستىرۋشىلىق قابىلەتىمەن يگى ءىس­تەرگە جەتەلەي بىلگەن. بالا-شا­عا­نىڭ اۋزىنان جىرىپ, جيناپ-تەرگەن قاراجاتىن مايدان قورىنا جىبەرۋ ارقىلى ەڭسەنى ەزگەن اۋىر تۇرمىس تەزىرەك كەلمەسكە كەتسە ەكەن دەگەن يگى تىلەكتەن تۋعانىن اڭعارۋ قيىن ەمەس. – سوعىس جىلدارى اكەمىز ۇجىم­شاردىڭ قامىمەن تاڭ اتقاننان كەش باتقانعا دەيىن تۇزدە جۇرگەندىكتەن, 6 بالاسىن تىزەسىنە وتىرعىزىپ, ەركەلەتۋگە ۋاقىتى بولعان ەمەس. ءومىر­دەن ەرتە وزدى. ەڭگەزەردەي بيىك تۇلعاسى, ءار ءسوزىن وي ەلەگىنەن وتكى­زىپ سويلەيتىن بولمىسى, ماقتان­شىلىقتى ۇناتپايتىن مىنەزى ەل ۇيىتقىسى بولۋعا جاراتىلعانداي اسەر قالدىراتىن, – دەيدى 70-تەردەن اسقان قىزى ءمارزيا اپاي. اۋىلداستارىنىڭ ۇجىم­داسۋىنا زور ۇلەس قوسىپ, تىلدا ەرەن ەڭبەكتىڭ ۇلگىسىن كورسەتكەن ونىڭ ەسىمى قالاي ۇلىقتاسا دا جاراسادى. وسى جاعىن مەكتەپ ۇجىمدارى, جەرگىلىكتى اكىمدىكتەر ەسكەرسە, وتكەنگە قۇرمەتتىلىكتىڭ ءبىر بەلگىسى بولار ەدى. گۇلگۇل قۋاتقىزى. سولتۇستىك قازاقستان وبلىسى, ەسىل اۋدانى.