تاراپتار وسى جازدا استانا مەن تيانتسزيندە وتكەن قازاقستان مەن قىتاي باسشىلارى كەلىسسوزدەرىنىڭ قورىتىندىسى بويىنشا قول جەتكىزگەن ۋاعدالاستىقتاردى ىسكە اسىرۋ بارىسىن قاراستىردى.
كەزدەسۋ كۇن ءتارتىبىنىڭ باستى ماسەلەسىنىڭ ءبىرى ءوزارا ساۋدانى اسىرەسە اۋىل شارۋاشىلىعى سالاسىندا ارتتىرۋ بولدى. قىتاي ستاتيستيكاسىنا سايكەس بيىلعى قاڭتار-قىركۇيەكتە قازاقستان مەن قىتاي اراسىنداعى ساۋدا اينالىمى 35,4 ملرد دوللاردى (+7,4%) قۇرادى, ونىڭ ىشىندە قازاقستاننىڭ قىتايعا ەكسپورتى 13,5 ملرد دوللارعا (+9,9%) جانە قىتايدان يمپورت 21,9 ملرد دوللارعا (+6,9%) جەتتى.
«قىتاي نارىعى قازاقستاننىڭ استىق ەكسپورتى ءۇشىن ۇلكەن قىزىعۋشىلىق تۋدىرادى. كەيىنگى ەكى جىلدا قىتايعا استىق ەكسپورتى بەس ەسەدەن استام ءوسىپ, 1,4 ملن تونناعا جەتتى. مەملەكەت باسشىلارىنىڭ تاپسىرمالارىن ورىنداۋ ءۇشىن بىزگە قىتايعا استىق ەكسپورتىن 2 ملن تونناعا دەيىن ۇلعايتۋ بويىنشا قوسىمشا شارالاردى قابىلداۋ قاجەت», دەدى س.جۇمانعارين.
وسى ماقساتقا جەتۋ ءۇشىن قىتاي ءالى دە لوگيستيكانى ايتارلىقتاي باياۋلاتاتىن جەكەلەگەن شەكتەۋلەردى ساقتاپ وتىرعاندىقتان, شەكاراداعى استىق قابىلداۋ پۋنكتتەرىنىڭ وتكىزۋ مۇمكىندىگىن ارتتىرۋ قاجەت ەكەنىن باسا ايتتى.
تاراپتار قازاقستاننىڭ قىتايعا داقىل جانە مال ەكسپورتىن كەڭەيتۋ الەۋەتىن تالقىلادى. قازىر ەكى ەل اراسىندا قىتاي نارىعىنا وتاندىق 34 ءتۇرلى داقىل جانە مال ونىمدەرىن ەكسپورتتاۋ بويىنشا حاتتامالار بار. قىتاي نارىعىنا جىبەرىلگەن ەكسپورتتاۋشىلار تىزىمىنە 2 865 جەرگىلىكتى كاسىپورىن كىرەدى.
قازاقستان تاراپى قىتايعا قاۋىن مەن ماقتا تۇقىمىن ەكسپورتتاۋدى اشۋعا ءوتىنىم بەردى. كەزدەسۋدە جاڭا ونىمدەرگە ارنالعان فيتوسانيتارلىق تالاپتاردى ۇيلەستىرۋ ۇدەرىسىن باستاۋ ۇسىنىلدى. مال شارۋاشىلىعى مەن وڭدەلگەن ونىمدەردىڭ, اسىرەسە سالقىنداتىلعان قوي مەن سيىر ەتى, ەت ونىمدەرى جانە قۇرعاق بيە ءسۇتى ەكسپورتىنىڭ كولەمى مەن تۇرلەرىن ارتتىرۋعا ەرەكشە نازار اۋدارىلدى.
سونداي-اق قازاقستاننىڭ ۆەتەرينارلىق قىزمەتتەرى تەكسەرۋلەرىنىڭ ناتيجەسى بويىنشا قازاقستاننىڭ سولتۇستىك-باتىس جانە ورتالىق ايماقتارىنان سالقىنداتىلعان ەت ەكسپورتىنا قويىلعان شەكتەۋلەردى الىپ تاستاۋ ماسەلەسى تالقىلاندى.
ليۋ گوچجۋن ەكى ەلدىڭ نارىقتارىنا اۋىل شارۋاشىلىعى ونىمدەرىن جەتكىزۋ بويىنشا ءتيىستى ۆەدومستۆولار اراسىنداعى ۇيلەستىرۋدى كۇشەيتۋدى قوسا العاندا, جوعارى دەڭگەيدەگى ۋاعدالاستىقتاردى جۇزەگە اسىرۋ ءۇشىن بىرلەسىپ جۇمىس ىستەۋدى جالعاستىرۋعا دايىن ەكەنىن ءبىلدىردى.
