سۋرەتتەردى تۇسىرگەندەر – ا.دۇيسەنباەۆ, ە.ۇكىباەۆ
ستۋدەنتتەردىڭ قازاق ءتىلىن ۇيرەنۋگە ىنتاسى زور
پرەزيدەنت وسى ساپارىندا ماسكەۋ مەملەكەتتىك حالىقارالىق قاتىناستار ينستيتۋتىنىڭ ستۋدەنتتەرىمەن اڭگىمەلەستى.
ستۋدەنتتەر مەملەكەت باسشىسىنا قازاقشا ءتىل قاتتى. ولار پرەزيدەنت قاسىم-جومارت توقاەۆتىڭ كىتاپتارىندا كورىنىس تاپقان ديپلوماتيا مەن اشىقتىق قاعيدالارى ماسكەۋ مەملەكەتتىك حالىقارالىق قاتىناستار ينستيتۋتىندا ۇلگى رەتىندە وقىتىلاتىنىن جەتكىزدى.
سونىمەن قاتار جاستار اباي قۇنانباي ۇلى شىعارماشىلىعىنا زور قىزىعۋشىلىقپەن قارايتىنىن ايتتى.
– اقىننىڭ «ادامزاتتىڭ ءبارىن ءسۇي, باۋىرىم دەپ» دەگەن دوستىق تۋرالى وي ورامدارى وتە ەرەكشە. رەسەي مەن قازاقستان – ماڭگىلىك دوستىقتىڭ قوس قاناتى دەپ ەسەپتەيمىز. ەكى ەلدى, ەكى حالىقتى رياسىز, شىنايى دوستىق قارىم-قاتىناس بايلانىستىرادى, – دەدى جاستار.
مەملەكەت باسشىسى ستۋدەنتتەردىڭ قازاق ءتىلىن ۇيرەنۋگە دەگەن ىنتاسىنا جوعارى باعا بەرىپ, ولارعا ساتتىلىك تىلەدى.
– ماسكەۋ مەملەكەتتىك حالىقارالىق قاتىناستار ينستيتۋتى – وتە بەدەلدى جوعارى وقۋ ورنى. بۇكىل الەمگە تانىمال. قازاقستان بۇگىندە دەربەس مەملەكەت. مەنىڭ ويىمشا, ماسكەۋ مەملەكەتتىك حالىقارالىق قاتىناستار ينستيتۋتىندا العان بىلىمدەرىڭىز بولاشاقتا مول پايداسىن تيگىزەدى. ويتكەنى ءتۇرلى ەلدەر تۋرالى, ونىڭ ىشىندە رەسەيدىڭ بۇرىننان كەلە جاتقان وداقتاسى قازاقستان جايىندا كوپ ماعلۇمات ءبىلۋ سىزدەرگە كەيىن جۇمىسقا ورنالاسۋعا, سونداي-اق الەمدە جانە وڭىرلىك دەڭگەيدە باسەكەگە قابىلەتتى مامان بولۋعا كومەكتەسەدى, – دەدى پرەزيدەنت.
قازاقستان مەن رەسەي پرەزيدەنتتەرى بەيرەسمي كەزدەسۋ وتكىزدى
مەملەكەت باسشىسى رەسەي پرەزيدەنتىنە ەرەكشە سىي-قۇرمەتى ءۇشىن ريزاشىلىعىن ءبىلدىردى.
– قۇرمەتتى ۆلاديمير ۆلاديميروۆيچ, ەڭ الدىمەن, ماسكەۋگە, وسىناۋ قاسيەتتى جەرگە تابانىم تيگەن ساتتەن باستاپ كورسەتىلگەن ەرەكشە سىي-قۇرمەت ءۇشىن سىزگە ريزاشىلىعىمدى بىلدىرەمىن. جاڭا عانا پروتوكول اسپەكتىلەرى جونىندە ايتىلدى. شىن مانىندە, رەسەي استاناسىنداعى ىستىق ىقىلاس مەنى قاتتى تاڭعالدىردى ءارى قۋانتتى. ەكىجاقتى ىنتىماقتاستىق ستراتەگيالىق سەرىكتەستىك, وداقتاستىق قاتىناستار سيپاتىنا يە. بارلىق باعىتتا بىرلەسە جۇمىس اتقارىپ كەلەمىز. مەملەكەتتەرىمىز اراسىندا ەشقانداي تۇيتكىل جوق. ماسەلە تۋىنداعان كۇننىڭ وزىندە پرەزيدەنتتەر مەن ۇكىمەتتەر باسشىلارىنىڭ كۇش-جىگەرى ارقاسىندا وڭ شەشىمىن تابادى. ءسىزدىڭ شاقىرۋىڭىزدى زور ىقىلاسپەن قابىل الدىم. راسىندا, بۇگىن بەيرەسمي جاعدايدا پىكىر الماسامىز. مەنىڭ وزىڭىزبەن تالقىلاعىم كەلەتىن ءبىراز پىكىر-پايىمىم بار, – دەدى قاسىم-جومارت توقاەۆ.
ال ۆلاديمير پۋتين قازاقستان پرەزيدەنتىمەن جۇزدەسكەنىنە قۋانىشتى ەكەنىن جەتكىزدى.
– قۇرمەتتى قاسىم-جومارت كەمەل ۇلى, ەڭ الدىمەن, سىزگە ۋاقىت تاۋىپ, كەلىسكەنىمىزدەي, مەملەكەتتىك ساپارمەن كەلگەنىڭىز ءۇشىن العىس ايتامىن. بۇعان شىن جۇرەكتەن قۋانىشتىمىن. ارينە, ءبىز ۇدايى بايلانىستامىز. الايدا مەملەكەتارالىق قاتىناستاردا مۇنداي پروتوكولدىق دۇنيەلەر دە ماڭىزدى. بۇگىن بەيرەسمي جاعدايدا كەزدەسىپ, بارلىق وزەكتى ماسەلە بويىنشا اڭگىمەلەسەمىز. ال ەرتەڭ ارىپتەستەرمەن بىرگە ەكىجاقتى قارىم-قاتىناستىڭ كۇن ءتارتىبىن قاراستىرامىز جانە كەلەشەگى زور باعىتتارعا نازار اۋدارامىز. جالپى العاندا, ءبىز وسى جىلدى وتە جاقسى ناتيجەلەرمەن اياقتايمىز, سونداي-اق تاياۋ كەلەشەككە ارنالعان جوسپاردى ورىندايمىز دەپ ويلايمىن, – دەدى رەسەي پرەزيدەنتى.
