مەديتسينالىق ۇيىمداردى ۇزدىكسىز قامتاماسىز ەتۋ ءۇشىن بىرىڭعاي ديستريبيۋتور 21 ملرد تەڭگە كولەمىندە تومەندەتىلمەيتىن ءدارى-دارمەك قورىن قۇرعان. مۇراتوۆتىڭ ايتۋىنشا, بۇل قور 2–3 ايلىق قاجەتتىلىكتى وتەپ, ونكولوگيا, قانت ديابەتى, قان ۇيۋىنىڭ بۇزىلۋى, اعزالاردى ترانسپلانتاتسيالاۋ سياقتى اۋرۋلار بويىنشا نەگىزگى باعىتتاردى قامتيدى.
«سوزىلمالى اۋرۋلاردىڭ ءبىر بولىگىن تمككك پاكەتىنەن ءمامس-كە اۋىستىرۋعا قاراماستان, بارلىق مەملەكەتتىك كەپىلدىكتەر تولىعىمەن ساقتالادى, قارجىلاندىرۋ كولەمى وزگەرىسسىز قالادى. تەك قارجىلاندىرۋ كوزى وزگەرتىلدى. قانت ديابەتى, رەۆماتويدتى ارتريت, تسەرەبرالدى سال اۋرۋى جانە باسقا دا سوزىلمالى اۋرۋلارى بار پاتسيەنتتەر قاجەتتى پرەپاراتتاردى تولىق كولەمدە الۋدى جالعاستىرادى», — دەدى تيمۋر مۇراتوۆ.
سوڭعى بەس جىلدا امبۋلاتوريالىق ءدارى-دارمەكپەن قامتاماسىز ەتۋگە ارنالعان قارجىلاندىرۋ 115 ملرد تەڭگەدەن 262 ملرد تەڭگەگە دەيىن, ياعني ءبىر جارىم ەسەگە جۋىق ارتقان. قازاقستان بۇگىندە تۇرعىندارىن تەگىن ءدارى-دارمەكپەن قامتاماسىز ەتەتىن ەلدەردىڭ قاتارىندا. ءبىر تۇرعىنعا شاققانداعى شىعىن كولەمى 50 اقش دوللارىنان اسادى.
پرەزيدەنتتىڭ باعا بەلگىلەۋ جۇيەسىن رەفورمالاۋ جونىندەگى تاپسىرماسىنا سايكەس, مينيسترلىك گەنەريكالىق پرەپاراتتاردىڭ باعاسىن تۇپنۇسقادان 30%-عا تومەندەتتى. رەفەرەنتتىك ەلدەردىڭ جاڭارتىلعان ءتىزىمى مەن حالىقارالىق دەرەكقورعا قوسىلۋ ناتيجەسىندە 7,8 مىڭنان استام ءدارى اتاۋىنىڭ باعاسى قايتا قارالدى.
«ناتيجەلەر قازىردىڭ وزىندە بايقالدى: مونيتورينگ قورىتىندىسى بويىنشا 2025 جىلدىڭ قازان ايىندا سۇرانىسقا يە پرەپاراتتاردىڭ اراسىندا باعانىڭ ورتا ەسەپپەن 11%-عا تومەندەۋى بايقالدى», — دەدى دەنساۋلىق ساقتاۋ ۆيتسە-ءمينيسترى.
بىرىڭعاي ديستريبيۋتوردىڭ ساتىپ الۋ تيىمدىلىگىنىڭ ارقاسىندا 70,5 ملرد تەڭگە ۇنەمدەلىپ, ول قاراجات قوسىمشا ءدارى-دارمەك الۋعا جۇمسالعان. سونىمەن بىرگە دارىلەردى تاڭبالاۋ جانە قاداعالاۋ جۇيەسى ەنگىزىلىپ, نارىق اشىقتىعى ارتىپ, سالىق ءتۇسىمى 24%-عا كوبەيگەن.
سالاداعى تسيفرلاندىرۋ باعىتىندا ەلەكتروندىق رەتسەپت جۇيەسى ەنگىزىلدى. بۇل ءدارى جازۋ ۋاقىتىنىڭ ەكى ەسەگە قىسقارۋىنا مۇمكىندىك بەردى. الداعى ۋاقىتتا مينيسترلىك جاساندى ينتەللەكتتى ءدارى-دارمەك قاجەتتىلىگىن بولجاۋ مەن جالعان رەتسەپتتەردى انىقتاۋدا قولدانباق.
قازاقستاندا قازىرگى تاڭدا 20 476 دارىلىك زات پەن مەديتسينالىق بۇيىم تىركەلگەن, ونىڭ 15%-دان استامى وتاندىق ونىمدەر. ددۇ ۇسىنعان ومىرلىك ماڭىزدى دارىلەر تىزىمىندە قازاقستاندىق پرەپاراتتاردىڭ ۇلەسى 37%-دى قۇرايدى.
پرەمەر-مينيستر ولجاس بەكتەنوۆ ءوز سوزىندە دارىلىك زاتتاردىڭ ساپاسى مەن قاۋىپسىزدىگىنە ەرەكشە نازار اۋدارىلاتىنىن ايتتى.
«دارىلىك زاتتار مەن مەديتسينالىق بۇيىمداردىڭ ساپاسىن باقىلاۋدىڭ نارىقتان ىرىكتەپ ساتىپ الۋدى جانە دەنساۋلىق ساقتاۋ ۇيىمدارىنان ىرىكتەۋدى كوزدەيتىن قوسىمشا فورماتى ەنگىزىلدى. مۇنداي ءتاسىل كونترافاكتىلىك ءونىمنىڭ ىشكى نارىقتا پايدا بولۋىنا جول بەرمەيدى», — دەدى ۇكىمەت باسشىسى.
ەلدە 10 مىڭنان استام ءدارىحانا جۇمىس ىستەيدى, ونىڭ 2700-ءى اۋىلدىق جەرلەردە ورنالاسقان. شالعاي ايماقتاردا 11 جىلجىمالى ءدارىحانا پۋنكتى قىزمەت كورسەتەدى.
«اۋىلدىق جەرلەردە ءدارىحانالاردىڭ قولجەتىمدىلىگىن جاقسارتۋ ءۇشىن كەلەسى جىلى اۋىلدىڭ مەديتسينالىق ۇيىمدارىندا ءدارىحانا پۋنكتتەرىنىڭ اشىلۋىن ۇيىمداستىرۋدى جوسپارلاپ وتىرمىز. قازىردىڭ وزىندە 2 174 ءدارىحانا ءتيىستى ءدارىحانا پراكتيكاسىنىڭ ستاندارتتارىنا سايكەستىگىن راستادى», — دەدى تيمۋر مۇراتوۆ.
ولجاس بەكتەنوۆ ەلدىڭ فارماتسەۆتيكالىق نارىعىن دامىتۋدا جاڭا تاسىلدەر قابىلدانعانىن اتاپ ءوتتى.
«مەملەكەت باسشىسى ءوز ءدارى-دارمەكتەرىنىڭ سانى مەن اسسورتيمەنتىن ارتتىرۋ بويىنشا ماڭىزدى مىندەت قويدى. ول ءۇشىن ءدارى-دارمەكتەر مەن مەديتسينالىق بۇيىمداردى تىركەۋدىڭ جەڭىلدەتىلگەن تەتىگى ەنگىزىلدى. ناتيجەسىندە قازاقستاندا جاڭا پرەپاراتتى تىركەۋ 2–5 جىلدان 100 جۇمىس كۇنىنە دەيىن قىسقاردى. بۇل, ارينە, ءبىزدىڭ حالىقتىڭ ەڭ جاڭا ءدارى-دارمەكتەرگە, ەمدەۋ ادىستەرىنە جانە دياگنوستيكاسىنا قولجەتىمدىلىگىن ارتتىرادى», — دەدى پرەمەر-مينيستر.
ۇكىمەت باسشىسى قورىتىندى سوزىندە بولشەك ساۋدا سەگمەنتىندە ءدارى-دارمەك باعاسىنىڭ نەگىزسىز وسۋىنە جول بەرمەۋ ءۇشىن ءتيىستى شارالار قابىلداۋدى تاپسىردى.
